Áskerı sherý: el aıbyny aıshyqtaldy

Keshe, Konstıtýsııa kúnine jáne el Táýelsizdiginiń 20 jyldyǵyna oraı elimizdiń bas qalasyndaǵy «Qazaq eli» monýmenti aldynda el Prezıdenti – Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaevtyń qatysýymen áskerı sherý ótti. Sherý bastalmas buryn sap túzegen lekter men minber aldynan synaptaı syrǵyǵan Qazaqstan Respýblıkasynyń Memlekettik týyn kótergen tý ustaýshy top sherý basynan oryn aldy. Osy kezde Qorǵanys mınıstri Ádilbek Jaqsy­bekov áskerlerdiń sherýge ázirligi tý­ra­ly general-leıtenant Murat Maı­keev­tiń raportyn qabyldaǵan soń, Qa­zaq­stan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaevty Qarýly Kúshter ásker­leriniń barlyq túrleri men tekteriniń jaýyngerleri qarsy aldy. «Qazaq eli» alańynan estilgen aıbyndy daýys tikeleı efırmen berilgen translıasııa arqyly búkil elge tarap jatty. Osy­dan keıin Elbasy N.Nazarbaev sap túze­gen áskerlerdi aralap, alǵash ret parad­ty ózi qabyldady. Odan ári Memleket basshysy ornyna kelip, áskerıler men barsha Qazaqstan halqyn Konstıtýsııa kúnimen quttyqtady. Konstıtýsııa kúnine arnalǵan ás­ke­rı paradta sóılegen sózin Elbasy: «Ar­mysyzdar, áskerıler!» dep bastady. Azattyǵymyzdyń aıshyqty aıǵaǵy bolǵan Ata Zań – táýelsizdiktiń teńdes­siz tartýy! Barshańyzdy osy ulyq merekemen – Konstıtýsııa kúnimen shyn júrekten quttyqtaımyn! Halyq – bı­lik­tiń qaınar kózi, Konstıtýsııa – kóp­tiń kıeli sózi, dedi odan ári Memleket basshysy. Qazaqstan halqynyń qalaýymen ómirge kelgen Negizgi Zańymyz – táýel­siz­dikpen egiz uǵym! Biz kemel Konstı­týsııany Táýelsizdik arqyly qabyl­dadyq. Ata Zań – bizdiń azattyq alǵaly atqarǵan barlyq isterimizdiń altyn tarazysy bolyp tabylady. Búginde dúnıe júzi moıyndaǵan órkendi ónege­leri­miz Ata Zańymyzdyń aıasynda júze­ge asyp keledi. Biz táýelsizdik arqyly ǵasyrlyq máni bar orasan zor jetistikterge qol jetkizdik. Uly dalada jańa turpatty qýatty memleket quryp, ulys­ty uıystyrdyq. Elimizdiń irgesin bútindep, shekara­myz­dy bekemdedik, dep jalǵastyrdy odan ári óz sózin Joǵarǵy Bas qolbas­shy. Ekonomıkalyq áleýetimiz eselep artyp, shýaqty Otanymyz bereke men birliktiń kıeli mekenine aınaldy. Ar­qa­nyń tósinde azattyǵymyzdyń asqaq nyshany bolǵan ásem Astanany tur­ǵyz­dyq. Álem jurtshylyǵy aldynda mereıimiz artyp, abyroıymyz asqaqtady. Elordada ótken ǵasyr sammıti, Azıada oıyndary, Shanhaı yntymaqtastyq uıymy men Islam úmbetiniń basqo­sý­lary – buǵan dálel. Biz osylaısha táýelsizdiktiń 20 jy­lynda Qazaq elin dúnıe júzine pash ettik. Ata Zań arqyly asqar asýlardy al­ǵan biz búginde jańa kezeńge qadam bas­tyq. Elimiz endi ınnovasııalarǵa negizdelgen ındýstrııalyq damý jolyna bet aldy. Sondyqtan biz baıandy isteri­miz­diń bastaýy bolǵan bas qujatymyzdy ardaqtaýymyz kerek! Konstıtýsııa kúnin sońǵy jyldary ózge merekeden bólekshe atap ótýimiz be­ker emes. «Qazaq eli» alańyndaǵy áskerı parad memleketimizdiń aıbynyn asyryp, qýat-kúshin tanytatyn dástúr­li sharaǵa aınaldy. En dalany erkin jaılaǵan elimizde ejelden erlerdiń enshisi Otan qorǵaý bolǵan! Babadan qutty mura bolǵan bul qasterli boryshty búginde antqa adal erler atqarýda. О́skeleń urpaq eli úshin qasyq qanyn qıǵan jaýjúrek baba­la­ry­myzdyń dańqty jolyn laıyqty jalǵastyrýda, degen Prezıdent – Qa­zaq­stan Respýblıkasy Qarýly Kúshte­ri­niń Joǵarǵy Bas qolbasshysy Nur­sul­tan Nazarbaev odan ári el tynysh­ty­ǵyn qas qaqpaı kúzetý mereıli már­te­be, asqaq abyroı ekendigin atap kór­setti. Bizdiń ulttyq áskerimiz – ulys­tyń berik qorǵany, táýelsizdiktiń my­ǵym tiregi! Memleket aıbyndy armııa­myzdyń árdaıym qynaptaǵy qylyshtaı babynda bolýyna zor mán beredi. Bú­gingi shara – sonyń jarqyn aıǵaǵy. Bizdiń elimiz halqymyzdyń ta­rıhyn­daǵy orasan zor oqıǵa – Qazaq­stan Táýelsizdiginiń 20 jyldyǵyna ja­qyn­dap keledi. Merekelik saltanattar sa­na­tynda Konstıtýsııa kúni aıryqsha oryn alady. Búginde elimizdiń barlyq óńirlerinde patrıotızm rýhymen jigerlengen merekelik sharalar ótip jatyr. Bizdiń azamattarymyzdy búkilhalyq­tyq merekemen shyn júrekten qut­tyq­taımyn! О́z sózinde Elbasy Ata Zańnyń el damýyndaǵy tarıhı róline joǵary baǵa berdi. Bizdiń birligimizdiń qýaty – bul bizdiń halqymyzdyń barlyq urpaq­ta­ry­­nyń shynaıy baılyǵy. Qazaqstan aza­mattary Táýelsizdiktiń ortaq týy as­tynda dostyq pen beıbitshilik rý­hyn­da ómir súrýde. Qazaqstan halqy Assambleıasynyń kúnnen-kúnge ósip kele jatqan róli, Álemdik jáne dástúrli dinder jetekshileriniń sezderi – mu­nyń bári búkilhalyqtyq uıyǵan keli­sim­niń berekeli jemisi. Konstıtýsııa bar­lyq qazaqstandyqtarǵa birdeı múm­kindik berdi. Bizdiń Negizgi Zańymyzdyń basty qundylyǵy da osynda. Biz barlyǵymyz birige otyryp, jańa eldiń irgetasyn qaladyq. Munda Shyǵys pen Batys mádenıeti ortaq úılesim tapty. Bar bolǵany 20 jyldyń ishinde biz tabysty ekonomıka qurdyq, dedi Elba­sy. Búginde Qazaqstan álemniń eń qar­qyndy damyǵan 50 eliniń qataryna nyq qadam basty. Qazir barlyq qala­larda, aýdan ortalyqtarynda, aýyl­dar­da jańa aýrýhanalar, búgingi zaman­nyń mektepteri ashylýda. Tipti, ja­handyq daǵda­rys jaǵdaıynda biz eńbekaqy men zeı­net­aqyny ósirýdemiz. Bizdiń barlyq jetistikterimizge bir­lik­tiń, qoǵamy­myz­daǵy kelisimniń, el Kons­tıtýsııasynyń basty qundylyq­ta­ryn berik saqtaýy­myz­dyń arqa­synda qol jetkizildi. Keshe bizdiń qasıetti jerimizdi on­da­ǵan jyldar boıy qasiretke býyp kelgen Semeı ıadrolyq polıgonyn jabý týra­ly Jarlyqqa men qol qoıǵan kúnge týra 20 jyl toldy. Biz shyn mánindegi osy tarıhı qadam arqyly búkil adam­zat­tyń izgilikti damýyna ólsheýsiz úles qostyq, dedi quttyqtaý sóziniń sońyna qaraı N.Nazarbaev. Or­taq úıimizdiń ty­nysh­tyǵyn kózdiń qa­ra­shyǵyndaı saqtaý – sizderdiń qasıetti pa­ryzdaryńyz! Sizder bizdiń táýelsiz Ota­ny­myzdy qorǵaısyzdar, Konstıtýsııa kúzetin­de tursyzdar! Qazaq­stan – bul Konstıtýsııa kúni áskerı parad ótkizetin birden-bir memleket. Bul bizdiń qaıtalanbas dástúri­miz. Ol memleketi­miz­diń qýatyn, bizdiń beıbit jetistikterimiz – qoǵamymyzdyń birligi men tutastyǵyn pash etedi. Men sizderdiń ár­qaısylaryńyzǵa, óz­derińizdiń joǵary paryzdaryńyzǵa laıyq bolyńyzdar degim keledi! Jaý­yn­gerlik rýhty nyǵaıtyńyzdar, áskerı sheberlikti arttyryńyzdar! Qazaqstan­dyq shekaralardyń qaýipsizdigi men myz­ǵymas beriktigi sizderdiń qoldary­ńyz­da! Qazaqstan Qarýly Kúshteri jasasyn! Táýelsizdiktiń 20-shy jylyndaǵy búgingi Konstıtýsııa kúniniń mańyzy aıryqsha, dedi sóziniń qorytyndy­syn­da Elbasy. Búgingi mereıli mereke dú­nıe júzi musylmandarynyń ulyq meı­ramy – Oraza aıtpen tuspa-tus kelip otyr. Elimizdegi musylman jamaǵatyn qasıetti merekemen shyn júrekten quttyqtaımyn! Ata Zańdy ardaq tutqan ónegeli elimiz órkendeı bersin! Táýel­siz­digimiz tuǵyrly, Konstıtýsııamyz ǵu­myrly, eldigimiz máńgi bolsyn! Ulttyq armııamyzdyń aıbyny arta bersin! Otanymyz – Qazaqstan jasasyn! Mereke qutty bolsyn! Elbasynyń sózinen keıin áskerı sherý bastaldy. Jaıaý jáne áskerı tehnıkamen jyljyǵan Qurlyq áskerleriniń, Áýe qorǵanysy kúshteri men Áskerı-teńiz kúshteriniń, Ishki áskerler men Shekara qyzmetiniń, respýblıkalyq Ulan men Tótenshe jaǵdaılar mınıstr­li­gi­niń eń úzdik áskerı qyzmetshileri saltanatpen sap túzep ótti. Bıylǵy paradtyń bir ereksheligi – tamyz aıynyń 25-inen bastap el Prezıdenti – Qazaqstan Respýblıkasy Qarý­ly Kúshteriniń Joǵarǵy Bas qolbas­shy­sy Nursultan Nazarbaevtyń Jarly­ǵy­men Qarýly Kúshterimizde jańa, jetildirilgen merekelik jáne kúndelikti kıip júretin áskerı kıim úlgiciniń engizilgendigi. Keshe áskerı qyzmetkerlerimiz sherýde jańa áskerı kıim úlgisin tuń­ǵysh ret kıip shyqty. Ekinshisi – qazaqstandyqtardyń bu­ǵan deıin buryn-sońdy kórmegen ja­saq­tar men jańa áskerı tehnıkany eli­mizdiń bas alańynan alǵash ret ta­ma­sha­laýy boldy. Konstıtýsııa kúni, el Táý­el­sizdiginiń 20 jyldyǵy qarsańynda ótken áskerı sherýge 2500 áskerı qyz­metker, 130-dan astam qarý-jaraq pen áskerı tehnıka, sondaı-aq 60-tan astam ushaq pen tikushaq qatysty. Qazaqstan­dyq áskerı qyzmetkerler qurlyqta, áýe­de kúrdeli áskerı tehnıkany basqa­rý­dyń joǵary sheberligin tanytty. Bıylǵy jyly áskerı sherýdi Keńes Odaǵynyń Batyry, Halyq Qaharmany, armııa generaly Saǵadat Nurmaǵam­betov atyndaǵy respýblıkalyq «Jas ulan» mektebiniń jas barabanshylar ro­tasy ashty. Olardan soń Qorǵanys mınıstrligi Ortalyq apparatynyń ofıserleri men Qazaqstan armııasynyń basty soqqy bere alatyn Qurlyq ás­ker­leriniń ofıserleri júrip ótti. Bulardy ókshe­lep saltanatty sap túze­gen «Ońtústik» jáne «Shyǵys» óńirlik qolbas­shy­ly­ǵynyń áskerı qyzmetshi­le­ri kórindi. Sherýdi raketa jáne artıllerııa eseptoptary jalǵastyrdy. Odan keıin minber aldynda sap túzep «Batys» óńir­lik qolbasshylyǵy áskerı qyzmet­ker­leri men Qurlyq áskerleriniń te­ńiz jaıaý áskeri ótti. Qazaqstandyq «qara beretter» brıgadasy turaqty daıyndyqtaǵy quramalar arasynda úzdikter sanatynda. Igi jaýyngerlik dástúrleri men erlikke toly tarıhy teńiz jaıaý áskeriniń maqtanyshy. Olar­dyń urany «Biz qaıda bolsaq, jeńis sonda!» Taıaý arada «Batys» óńirlik qol­basshylyǵynyń jeke quramy «Orta­lyq-2011» halyqaralyq jedel-strate­gııalyq jattyǵýlarynda taǵy bir synǵa túsip, sheberlikterin ortaǵa salady. Odan ári alańǵa Qarýly Kúshter Joǵarǵy Bas qolbasshysynyń rezervi – Aeroutqyr áskerleri shyqty. Olardyń urany «Bizden basqa eshkim emes!» De­santshylar únemi jaýyngerlik ázirlikte turady. Ulttyq múddeni kózdeıtin kez kelgen tapsyrmany oryndaýǵa qashanda daıyn. Áskerı sherýge tuńǵysh ret mergender jasaǵy qatysty. Salqynqandylyq, tózimdilik, quralaıdy kózge atqan dáldik – mine, bul jasaqqa qajetti qa­sıetter. Sondaı-aq, sherýde Qurlyq áskerleriniń taýly-atqyshtar brıgada­sy­nyń áskerı qyzmetshileri de alǵash ret júrip ótti. Qurama taýly jaǵdaıda durys urys júrgizýi úshin barlyq qa­jetti zamanaýı jabdyqtarmen qamta­masyz etilgen. Bıylǵy áskerı sherý qatysýshy­lary­nyń ártektiligimen erekshelendi. Áıel áskerı qyzmetshilerdiń eki jasa­ǵy kóz qyzyqtyrdy. Birinshi bolyp minber aldynan sanıtarlyq nusqaýshy­lar­dyń toptastyrylǵan rotasy ótse, ekinshi bolyp áskerı azamattarmen bir sapta qolǵa qarý alyp jaýyngerlik tapsyrma oryndaýǵa ázir áıel áskerı qyzmetshilerdiń jasaǵy kórindi. Olar jaýyngerlik ázirlikti qamtamasyz etýge jáne Qarýly Kúshterdiń urysqa qabilettiligin arttyrýǵa laıyq. Áıelderdiń paradtyq eseptobyn áýe shebin qorǵaýshy – Áýe qorǵanysy kúsh­teri men elimizdiń áýe keńistiginiń qaýip­sizdigin senimdi qamtamasyz etýshi ásker tegi – Áskerı áýe kúshteri aýystyrdy. Sherýdi ofıser kadrlaryn daıarlaý­dyń ustahanasyna aınalǵan Qurlyq áskerleri Áskerı ınstıtýtynyń, Ra­dıo­elektronıka jáne baılanys áskerı-ınjenerlik ınstıtýtynyń, eki dúrkin Keńes Odaǵynyń Batyry Talǵat Bıgeldınov atyndaǵy Áýe qorǵanysy kúsh­teri Áskerı ınstıtýtynyń kýrsant­tary jalǵastyrdy. Qazaqstan armııasynyń bolashaq ofı­serleriniń leginen keıin Shoqan Ýá­lıhanov atyndaǵy Qazaqstan Res­pýb­lı­ka­sy Qorǵanys mınıstrliginiń Kadet korpýsy rotasy júrip ótti. Minber deńgeıine Áskerı polı­sııa­nyń toptasqan rotasy jaqyndady. Ás­kerı polısııa organdarynyń maqsaty tártip saqtaýdy qamtamasyz etý, qyl­mys pen quqyq buzýshylyqtyń aldyn alý, eskertý, anyqtaý jáne ashý bolyp tabylady. Qazaqstan Qarýly Kúshteri ókil­derinen keıin alańǵa Otanymyzdyń shebin qorǵaýshy Ulttyq qaýipsizdik komıteti Shekara akademııasynyń, Ishki ister mınıstrliginiń, Ulttyq qaýipsizdik ko­mıtetiniń, Tótenshe jaǵdaılar mı­nıstr­liginiń, respýblıkalyq Ulannyń jasaqtary sap túzedi. Sherýge qaty­sýshylardyń barlyǵy Ata Zańymyzda kórsetilgen bizdiń Otanymyz ben el Táýelsizdigin saqtaý, qazaqstandyq­tar­dyń quqy men bostandyǵyn qorǵaý kúzetindegiler. Jaıaý jasaqtar sherýin Qazaqstan áskerı quramalary men bólimderiniń qa­rý-jaraǵy men áskerı tehnıkasy jal­ǵastyrdy. Minber aldynan Qarýly Kúsh­ter tekteriniń, atap aıtqanda, Qu­r­lyq áskerleri, Áýe qorǵanysy kúsh­teri jáne Áskerı-teńiz kúshteriniń týlary jelbiredi. Bıyl buryn kór­setilip júr­gen tehnıkalarmen birge, jýyrda qa­byl­danǵan jańa tehnıkalar óz qýat­taryn kórsetti. Birinshi bolyp Qurlyq áskerleri ózderiniń eń basty soqqy kúshterin usyn­dy. Bas alańnan Qarýly Kúsh­ter­diń negizgi tankisi – T-72B-niń 10 birligi júrip ótti. Budan soń Qurlyq ásker­leri qarýynyń jańa úlgisi, paradqa tuńǵysh ret qatysyp otyrǵan – tankke qoldaý beretin jaýyngerlik mashı­na­lary kórindi. Mashına jaýyngerlik tájirıbe negizinde jasalǵan. Joǵary qorǵanys qabiletimen, otty qýatymen jáne jeńil basqarylýymen erekshelenedi. Áskerı tehnıkanyń marshyn TOS-1 «Býratıno» aýyr ot shashatyn júıe jalǵastyrdy. Ol joıqyn kúshi bar túrli oq-dárilerdi paıdalana alady, jaýyngerlik jáne kóliktik-tıegish mashınalardan turady. Jaýyngerlik mashına reaktıvti snarıadtarǵa arnalǵan 30 uńǵydan turatyn qondyrǵy bolyp keledi. Nysanany kózdeý ǵylymnyń sońǵy jetistikterimen jasalǵan. Aýyr ot shashatyn júıe kóptegen aımaqtyq qaqtyǵystarda paıdalanylǵan. Alańda Qurlyq áskerlerine qarasty jaıaý áskerdiń jaýyngerlik mashınasy – BMP-2. Qurlyq áskerleri mehanıka­lan­dyrylǵan kolonnalarynyń sherýin «Stre­la-10M» zenıtti-zymyrandy kesheni jalǵas­tyrdy. Budan soń «Shtýrm-S» ózdiginen júretin tankke qarsy zymy­randy ke­shenniń jasaqtary shyqty. Odan keıin alańǵa desantty-shabýyldaýshy brıga­da­nyń Jaýyn­ger­lik týymen «Lend Rover» ótti. Sońynda «Hammer» avtokó­likterine mingen «Qaz­bat» qazaqstandyq bitimgershilik ba­tal­onynyń arnaıy maqsattaǵy rota­sy. Olardy jetildirilgen BTR-82A brondy transporterleri aýystyrdy, bul da bıylǵy paradtyń taǵy bir ja­ńalyǵy boldy. Kelesi kezekte sherýdi teńiz jaıaý áskeri brıgadasynyń Jaýyngerlik týyn BTR-80A bronetransporteriniń ús­tinde jelbiretip «qara berettiler» jalǵastyrdy. Osy kezde alańda meha­nı­kalandyrylǵan raketalyq-artıl­le­rııa­lyq polktyń quramynda 122 mıllımetrlik D-30 gaýbısalary kórindi. Odan ári olardy artıllerııalyq bata­reıa­nyń mınótine 7 dúrkin oq atatyn 152 mıllımetrlik «Msta-B» gaýbısa­lary almastyrdy. Bıyl paradta taǵy alańda ózdiginen júretin 240 mıllımetrlik «Tıfan» tralynda orna­las­ty­rylǵan «Tıýlpan» mınometi, ańyzǵa aınalǵan «Katıýshanyń» jalǵasy «Smerch», «Grad», «Ýragan» reaktıvti júıeleri, nysandardy radıolo­ka­sııa­lyq barlaýdan jáne avıasııanyń soq­qy­synan saqtaıtyn jyljymaly «Sıkada» radıo bógeýshi stansalary sap túzedi. Atalǵan áskerı tehnıkadan keıin Áýe shabýylyna qarsy qorǵanys kúsh­teriniń aıbatty qarýlary kórindi. Olar zenıtti-raketalyq keshen S-125; S-200 jáne S-300, bular – uzaq qashyqtyqqa arnalǵan Áýe shabýylyna qarsy qor­ǵanys kúshteriniń júıesi jáne Áýe qorǵanysy kúshteriniń maqtanyshy. Elimizdiń bas alańynda ótken ásker­lerdiń saltanatty sherýinen keıin kók júzinde avıasııa qalyqtady. Áýe pa­radyn Qazaqstan Respýblıkasy Qarýly Kúshteriniń týyn jelbiretip armııalyq avıasııanyń Mı-17 tikushaqtary ashty. Sherýlik sapty MI-24 jaýyngerlik tikushaqtarynyń eki tizbegi jalǵas­tyr­dy. Birinshi tizbek «peleng», al ekinshisi «syna» jaýyngerlik tártibinde. Olar­dyń artynda «pıramıda» jaýyngerlik tártibinde armııalyq avıasııanyń kóp nysandy Mı-17 tikushaqtar býyny. Odan keıin áýede aýyr áskerı-kóliktik tikushaq Mı-26 kórindi, ony kóp ny­sandy Mı-17 tikushaqtary súıemeldedi. Olardyń sońynan MıG-29 joıǵysh ushaqtardyń súıemeldeýimen áskerı-kóliktik avıasııanyń Tý-154, Tý-134 jáne Il-76 ushaqtary ushyp ótti. Áýedegi sapta An-26 áskerı-kóliktik ushaqtyń býyny. Saptan qalyspaı Sý-25 joıǵysh ushaqtarynyń qos býyny men MıG-29, sońynan Sý-27 býyny ushyp ótti. Maıdandyq shabýyldaý­shy­lar «romb» jaýyngerlik tártibi boı­yn­sha qatarlasa ushty. Maıdandyq sha­býyldaýshylar kúndiz-túni kez kelgen aýa raıy jaǵdaıynda qarsylastyń jer­degi kúshin, brondy tehnıkasy men zymyran keshenderin joǵary dáldikpen joıa alady, sondaı-aq tómen bıikte ushyp bara jatqan áýe nysandaryn jeńil kózdeı alatynyn atap ótken jón. Astana aspanynda jańa tolqyn shabýyldaýshy-qaǵýshylardyń MıG-31 ushaqtary ótti. Áýe sherýin jurtshy­lyq­ty qaıtalanbas áserge bólegen Sý-27 ushaqtarymen «Jetisý suńqarlary» ushý toby aıaqtady. Olar ushýdyń «Báı­terek» atty joǵary ádisin saǵatyna 800 shaqyrym jyldamdyqta oryndady. «Nes­terov tuzaǵy» tárizdi asa qıyn fıgýra da kópshilikke usynyldy. Áskerı ushqyshtar óz isiniń maıtalman maman­dary ekenin taǵy bir dáleldedi. In­je­nerlik-shtýrmandyq esepteri men ush­qysh­tyq tájirıbelerin ushtastyra bilgen ushqyshtar tómen bıiktikte qatty jyldamdyqpen áýede ádemi ushyp ótti. Áskerler parady ádettegideı biriktirilgen áskerı orkestrdiń áýenderimen aıaqtaldy. Oǵan Qazaqstan Respýblıka­sy Qorǵanys mınıstrligi Áskerı-or­kestrlik qyzmetiniń bastyǵy – bas áskerı dırıjer, polkovnık Aleksandr Belıakov jetekshilik etti. Áskerı orkestrlerdiń negizgi mindeti jeke quramdy patrıottyq, áskerı jáne mádenı tárbıeleý, áskerı qyz­met­ti nasıhattaý, rásimderdi qamtamasyz etý, konserttik qyzmet, sondaı-aq qo­ǵam­dyq mańyzy bar sharalarǵa qatysý bolyp tabylady. Áskerı sherýge aı­ryqsha reńk berip, sarbazdar men sar­darlardy Qazaqstan áskeriniń qýaty men áleýetine baılanysty maqtanysh sezimine bólegen de osy orkestr áýeni boldy. Asqar TURAPBAIULY, Dastan KENJALIN. ----------------------------------------- Sýretterdi túsirgender S.BONDARENKO, B.OTARBAEV.