ShERÝGE QATYSÝShYLAR LEBIZI
Kerimbaı OITBAEV, Daıyndyq lageri shtaby bastyǵynyń orynbasary, podpolkovnık:
– Árbir jaýynger úshin paradqa qatysý – mártebe. Osy sherýge biz jyl saıyn qatysyp kelemiz. Jylda Konstıtýsııa kúnine bir aıdan astam ýaqyt qalǵanda Astana qalasynyń irgesindegi áskerı bólimge kelip, paradty laıyqty deńgeıde ótkizý úshin daıyndyq jumystaryn bastaımyz. Bıyl parad el Táýelsizdiginiń 20 jyldyǵy qarsańynda ótkiziletin bolǵandyqtan, biz oǵan erekshe daıyndaldyq.
Áskerı bólimge 18 shilde kúni kelip, onyń janynan shatyrly qalashyq tiktik. Osy jerge bizdiń áskerı qurylym birinshi bolyp keldi. Kelgen kúni daıyndyqqa bilek sybana kirisip kettik. Qazir bir aı boıy tańerteńnen keshke deıin bolǵan jattyǵýlarymyz áskerı paradta óz jemisin berdi dep oılaımyn. Bıylǵy sherýge qatysqan 28 áskerı toptyń bári alǵa qoıǵan maqsatty laıyqty oryndap shyqty. Bizdiń paradqa daıyndyǵymyzǵa mınıstr Ádilbek Jaqsybekov pen general-leıtenant Murat Maıkeev joǵary baǵasyn bergen bolatyn. Sherýde bizdiń jaýyngerler basshylyqtyń sol senimin aqtady dep aıta alamyn.
Elimizdi qorǵaý – árbir azamattyń paryzy. Al ásker qatarynda bolý ár adamnyń azamattyq boryshy. Qazir bizdiń Qarýly Kúshterimiz – álemdegi ozyq tehnologııalarmen jaraqtanǵan, sany men sapasy úılesim tapqan ásker.
Mırgúl О́SEROVA, «Shyǵys» óńirlik qolbasshylyǵy 44793 áskerı bóliminiń radıotelegrafısi:
– Áskerge kelisim-shartpen 2008 jyly keldim. Osy paradqa ekinshi ret qatysyp otyrmyn. Áskerı sherýge qatysqanym ózim úshin emes, barlyq týǵan-týysqandarym úshin de abyroı, mártebe. Osyny byltyr paradqa alǵash ret qatysqanymda sezindim. Paradqa bir aı daıyndaldyq. Daıyndyǵymyz jaqsy ótti. Basshylyq bir aı boıy bizge barlyq jaǵdaıdy jasap otyrdy. Daıyndyq kezinde basqa óńirlerden kelgen názik jandy áskerılermen tanystyq. Keıin dostasyp kettik. Osy jaǵdaı jyl saıyn qaıtalanady.
Bıylǵy paradqa áıelderdiń eki qoraby qatysqanyn bilesizder. Onyń bireýi – medbıkeler bolsa, ekinshi qorapty áskerı is júrgizýshiler qurady. Barlyǵy 191 adam boldy. Osy áıelderdiń bári elimiz boıynsha 8 000 áskerılerdiń arasynan irikteldi. Sondyqtan osynshama adamnyń arasynan sýyrylyp shyqqan 191 qyz paradqa qatysqany úshin ózderin baqytty sezinedi dep oılaımyn.
Bolashaqta, kelisim-shartym bitkennen keıin de áskerı qyzmetti jalǵastyrsam deımin. Oǵan eshkim qarsy emes. Men elime, Otanyma qyzmet etýdi ózime paryz sanaımyn.
Aıbat ÁBDIR, «Ońtústik» óńirlik qolbasshylyǵy artıllerııa brıgadasy 29 108 áskerı bóliminiń bólimshe komandıri:
– Áskerı paradqa alǵash ret qatysyp otyrmyn. Bizdiń Saryózek garnızonynan sherýge 80 jaýynger, 7 ofıser keldi. Olardyń bári Astanadaǵy elimizdiń bas alańynda sherýge qatysqanyn maqtanysh kóredi. Daıyndyq kezinde osy jóninde qurdastarymmen áńgimelesip, syr bóliskenimde bilgenimdi aıtyp otyrmyn.
Bıylǵy parad el Táýelsizdiginiń 20 jyldyǵyna arnalǵanyn bilesizder. Osyndaı sharalar elimiz Qarýly Kúshteriniń kúsh-qýatyn, qorǵanys qabiletin kórsetý úshin ǵana emes, árbir azamattyń boıynda otansúıgish sezimdi qalyptastyrý úshin ótetini sózsiz. Endi buıyrtsa, kelesi jyly da paradqa qatysý oıymda bar.
Osy jolǵy paradtyń taǵy bir ereksheligi, oǵan áskerı tehnıkalar men adam sany byltyrǵyǵa qaraǵanda kóptep qatysty. Áskerıler sany 2500 bolsa, tehnıkalardyń ishinen buryn sherýde kórsetilmegen qarý-jaraqtar usynyldy. Qysqasy, mundaı paradtar kez kelgen elge kerek dep oılaımyn.
Arystan ÁLIMBETOV, Qurlyq áskerleriniń raketa-áskerleri artıllerııasy, 36 803 áskerı bóliminiń kapıtany:
– Paradta Elbasy aıtqandaı, Qazaqstan – Konstıtýsııa kúni áskerı sherý ótkizetin álemdegi jalǵyz el. Qazir bul bizdiń biregeı dástúrimizge aınaldy. Bıylǵy parad úshinshi ret Ata Zań qabyldanǵan kúni ótkizildi. Osyndaı áskerı paradtardyń elimizdiń Qarýly Kúshterin nyǵaıtyp, qorǵanys qabiletin arttyrýda, azamattardy patrıottyq rýhta tárbıeleýde úlken ról atqaratyny anyq.
Osy sherýde men «Tochka – Ý» áskerı tehnıkasynda otyrdym. Bári jaqsy ótti. Alańda júrip bara jatqanda tehnıkany kórsetip, paradty ótizip jatqan elimiz úshin mereıiń ósip, qýanady ekensiń. Biz paradqa daıyndyq úshin barlyq jaǵdaıdy jasaǵan komandırlerimizge alǵys aıtamyz. Komandırimiz – podpolkovnık Kelesbaı Ábdiqulov. Astanaǵa 22 shilde kúni kelip, sodan beri sherýge daıyndyqqa qatysty barlyq jumystaryn atqardyq. Taǵy «Nur Islam» JShS-ine alǵysymyzdy bildiremiz. Kúnine úsh mezgil tamaq ázirlep, jaýyngerler úshin barlyq jaǵdaıdy jasady.
* * *
ShERÝDI TAMAShALAÝShYLAR LEBIZI
Hamıt OLJABAEV, soǵys jáne eńbek ardageri:
– Elimiz Táýelsizdiginiń 20 jyldyǵyna oraı jáne Konstıtýsııa kúnine baılanysty ótkizilgen áskerı sherý elimizdiń aıbynyn kórsetip qana qoıǵan joq, sonymen qatar, erteńimizge degen senimdi de arttyra tústi. Surapyl soǵys pen eńbek maıdanynda ósip-jetilgen aǵa urpaq – bizderdi osy sharany kórýge arnaıy shaqyrtqany qatty qýantty. Jasym 86-ǵa kelse de áskerılerdiń «Qazaq eli» monýmenti aldymen júrip ótýin óz kózimmen kórgim keldi. Onyń ústine áskerılerdiń kıimderin ózgertip, tehnıkalar jańartylyp jatqany kóńil qýantady, erteńge degen senimimizdi kúsheıte túsedi. Osyndaı ıgi isti uıymdastyryp, ózi basy-qasynda júrgen Prezıdentke úlken rahmetimdi jetkizgim keledi.
Keshegi qıyndyqtardy artqa tastap, kemel keleshekke kóz tastaǵan zamanda, osyndaı áskerı sherýlerdiń ótkizilýi jastarymyz úshin asa qajet dep esepteımin. О́skeleń urpaq elimizdiń aıbyny ári qorǵany sanalatyn áskerılerimizdiń ádemi sap túzep ótkeninen ónege alýǵa, solar sııaqty jeńimpazdar marshymen osyndaı alańdardan júrip ótýge talpynary sózsiz. Patrıotızmge tárbıeleýdiń bir tetigi osynda jatsa kerek. Qazirgi jastar tereń bilim alyp, bolashaq kóshine ilesýde dep nyq senimmen aıta alamyn. Endigi másele, sol jastarymyzdyń densaýlyǵyn nyǵaıtyp, olardy el qorǵaý isine erekshe baýlý kerek. Biz de óz tarapymyzdan jastardy Otanyn súıýge, eline aıanbaı eńbek etýge tárbıeleýden jalyqpaı, qolymyzdan kelgenin jasaımyz degim keledi.
Jumabaı KENJETAI, zeınetker:
– Qazaqstan jeke memleket bolyp otaý tikkennen keıin mynadaı áskerı sherýdiń ótýi zańdy da. Onyń elimiz táýelsizdiginiń 20 jyldyǵy men Konstıtýsııa kúnine oraılastyrylyp ótip jatýy osy sózimizdiń naqty dáleli bolsa kerek. Qazaqstan Qarýly Kúshteriniń qýatyna qarap, elimizdi qorǵaý salasyndaǵy jetistikterge kóz jetkizgendeı boldym. Ár memlekettiń ózin qorǵaı alatyndaı qaýqary bolýy kerektigin eskersek, áskerimizdiń qazirgi bet alysy jaman emes eken. Ata-babalarymyz ǵasyrlar boıy ańsap kelgen Táýelsizdigimizdiń 20 jyldyǵynda ótkizilip jatqan áskerı sherý el turǵyndarynyń kóńiline qýanysh pen senim arttyrady desem, artyq aıtqandyq bolmas.
О́zim ómir boıy aýyl sharýashylyǵynda ter tóktim. Qazir zeınetkermin, biraq soǵan qaramaı, myna nemerelerimdi tárbıelep júrgen jaıym bar. Solardyń rýhanı jandúnıesin baıytyp, «naǵyz qazaq» deıtindeı azamat bolyp jetilýine qolymnan kelgenniń bárin jasaýǵa tyrysýdamyn. Eldiń tutqasy osylar emes pe. Erteń osylar erjetip, myna aǵalary men ápkeleri sııaqty áskerı sherýlerde sap túzese, tóbemiz kókke jetkendeı bolmaı ma, eńbegimizdi aqtaǵany emes pe. Sondyqtan da óskeleń urpaqtyń boıyna otansúıgishtik pen rýhty sińirýge bir kisideı atsalysyp kelemin dep aıta alamyn. Osyndaı áskerı sherýdi óz deńgeıinde ótkizgen áskerılerge alǵysymdy aıtamyn.
Álııa TASEKEEVA, Qazaqstan Jastar kongresiniń múshesi:
– Áskerı sherýdiń ótkizilýi óte mańyzdy. Elorda turǵyndary men qonaqtary úshin ǵana emes, áskerı sherý elimizdiń barlyq óńirine tikeleı efır arqyly tarap otyr. Sonymen, áskerı sherýdiń eldigimizdiń rýhyn kóterý, ulttyq sanamyzdy oıatý jáne halyqty biriktirý baǵytynda alar orny erekshe. Áskerı áleýetimizdi kóre otyryp, turǵyndar ózderiniń erteńine degen senimin joǵaltpaq emes. Osydan elimizdiń órkendeý jolynda ekenin, óz azamattaryn qorǵaýǵa qaýqary jetetinin jáne qajet jaǵdaıda qamqorshy ekenin kórýge bolady.
Osy rette áskerı sherýdiń el táýelsizdigine oraılastyrylyp atalyp jatýy zańdy da. Eger tarıhqa kóz júgirtsek, elimiz táýelsizdik jolynda talaı buralań ótkelekterden ótti. Sondyqtan Qazaqstan Táýelsizdiginiń 20 jyldyǵy erekshe mańyzǵa ıe. Ekonomıkany damytýda ǵana emes, sonymen birge, áleýmettik salany kóterýde kóptegen sharýalar atqaryldy. Mine, jıyrma jylda jetken jetistigimizdi qorytyndylaýda osyndaı sharanyń qolǵa alynýy óte oryndy.
El Prezıdenti – Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaevtyń qatysýymen bastalǵan áskerı sherý bizdeı jastar úshin úlken mártebe. Osyny kórgen kóptegen jigitterimiz elimiz Qarýly Kúshteri qatarynan kóringisi keledi ǵoı degen oıdamyn. Men úshin ádemi kıim kıip, sappen júrip ótken ápkelerimniń sherýi qatty unaǵandyǵyn nesine jasyraıyn.
Bolat JAQANOV, Astana qalasy máslıhatynyń depýtaty:
– Bıylǵy áskerı sherýdiń el Táýelsizdiginiń 20 jyldyǵyna oraılastyrylyp ótkizilýi el mereıiniń ústemdigin aıshyqtap berdi. Qazirgi tańda Qazaqstan kóptegen jetistikterge jetip, halyqaralyq arenada ózindik ornyn tapqan el retinde belgili. Sonyń jarqyn bir kórinisi Qazaqstan Qarýly Kúshteriniń alańda sherýmen júrip ótýi der edim. Onyń ústine bul áskerılerdiń sherýi jastarymyzdy patrıotızmge tárbıeleýge ózindik úlesin qosatyn bolady.
Sonymen qatar, áskerı sherýdiń Konstıtýsııa kúninde ótkizilýi quqyqtyq memleket qurýdaǵy demokratııalyq qundylyqtardyń qoǵamymyzǵa dendeı ene bastaýyn pash etedi desem qatelespeımin. Biz zańdy qadirleý arqyly ǵana jetistikterge jetip, osyndaı aıtýly sharany ótkize alamyz. Elimizdegi turaqtylyq pen tatýlyq Elbasynyń sarabdal saıasatynyń arqasy desek, Nursultan Ábishulynyń sherýdiń aldynan júrip ótýi úlken áser qaldyrdy. Áskerı sherý sonysymen de mańyzdy jáne tartymdy.
-------------------------------------------------
Sýretterdi túsirgen Orynbaı BALMURAT
