Astanada bas qosty

2-3 qyrkúıekte Astanada Qa­zaq Ulttyq mýzyka akademııa­syn­da Mıkael Tarıverdıev atyndaǵy organshylardyń VII Halyq­ara­lyq konkýrsynyń azııalyq aına­lymy ótedi. Oǵan elimizden jeti, Koreıa pen Japonııadan bir-bir úmit­kerden qatyssa, atalmysh baı­­qaýǵa syıly qonaq retinde belgili aktrısa Natalıa Arynba­sa­rova men Mıkael Tarıverdıev meıirimdilik qorynyń prezıdenti, konkýrstyń art-dırektory Vera Tarıverdıeva shaqyrylyp otyr. Al qazylar alqasynyń qura­myn­da Djeıms Devıd Krıstı (AQSh), Okýbo Naomı Masýı (Japonııa), Ǵabıt Nesipbaev (Qazaqstan), Lada Lobzına (Reseı) syndy álemge tanymal organshylar bar. Organshylar konkýrsynyń azııa­lyq aınalymy respýblıkada alǵash ret ótkizilgeli otyr. Son­daı-aq, bul baıqaýdyń kórnekti kompozıtor Mıkael Tarıver­dı­ev­tiń 80 jyldyǵymen sáıkes keletindigine de erekshe mán berilgen. Keshe joǵaryda atalǵan akademııa ǵımaratynda konkýrs jaıynda ót­kizilgen baspasóz máslıhatynda áıgili organshy Djeıms Devıd Krıstı óziniń bul baıqaýǵa tó­re­lik etetindigin Qazaq eliniń ózine de­gen qurmeti deı kele, kon­kýrsqa qatysqaly otyrǵan talanttardan mol úmit kútetindigin jetkizdi. Konkýrs aıaqtalǵannan keıin Qa­zaq Ulttyq mýzyka akademııa­sy­nyń organ zalynda «Az ı Iа» konserti ótedi. Konserttiń negizgi maqsaty – eýrazııalyq keńistik ıdeıa­synyń mańyzdylyǵyn jetkizý bolsa, baǵdarlamada Shyǵys taqyryptaryna bet burǵan Shy­ǵys, Reseı, Eýropa kompozıtor­la­rynyń týyndylary oryn­dal­maq. Atalǵan sharada sóz ben mý­zyka almasyp otyrsa, Oljas Sú­leı­menovtiń «Az ı Iа» kitaby men Shyńǵys Aıtmatovtyń «Ǵa­syr­­dan da uzaq kún», «Teńiz ja­ǵalaı júgirgen tarǵyl tóbet, «Qosh bol, Gúlsary!», «Aq keme», «Kassandra tańbasy» kitap­tarynan úzin­diler men óleńderdi Reseı men Qazaqstannyń eńbek sińirgen ár­ti­si Natalıa Aryn­ba­sarova oqıdy. Sonymen qatar, Mıkael Tarıverdıev atyndaǵy Halyqaralyq or­ganshylar kon­kýrsy aıasynda Hıroko Inoýe (Ja­ponııa), Lada Labzına (Reseı), Venera Seıitbattalova (Qa­zaqstan) syndy laýreattar tyń­dar­mandaryn óz óner­le­rimen tam­santady dep kútilýde. Ábdirahman QYDYRBEK. –––––––––––– Sýretti túsirgen Orynbaı BALMURAT.