Qazaq kúresi órken jaıyp keledi

Bıylǵy 29 shilde kúni gazetimizde Qaraǵandy oblysyndaǵy menshikti tilshimiz Qaırat Ábildınovtiń ulttyq kúresimizdiń qazirgi jaı-kúıi men keleshegi týraly «Qazaq kúresi: ózgerte bergennen ne utamyz?» degen maqalasy jaryq kórgen edi. Osyǵan oraı redaksııaǵa maqalaǵa ún qosqan hattar kele bastady. Búgin solardyń birine oryn berip otyrmyz. Sońǵy kezde elimizdiń bas basylymy «Egemen Qazaqstanda» qazaq kúresiniń jaı-kúıine baılanysty kóptegen materıaldar jaryq kórdi. Munda sport mamandary men qazaq kúresiniń janashyrlary atalǵan máselege baılanys­ty ózderin tolǵandyryp júrgen jaıttardy ortaǵa tastady. Osyǵan oraı men de eki-úsh aýyz pikirimdi aıta ketkendi jón kórip otyrmyn. Aıtaıyn degenim, keıingi kezde Oral óńirinde de qazaq kúresiniń damýyna jańa serpin berildi. Sporttyń osy túrine degen oń kózqaras qalyptasa bastady. Sonyń nátıjesinde oblys­ta ulttyq kúrestiń órken jaıýyna qajetti barlyq jaǵdaılar týǵyzyldy desem artyq ketpeıtin shyǵarmyn. Bul úshin birinshi kezekte qoıylyp otyrǵan talaptarǵa saı jattyǵatyn oryndar belgilendi. Sonymen birge, qajetti sporttyq qural-jabdyqtar tolyq jasaqtaldy. Búgingi kúni qaıta jańǵyryp kele jatqan ulttyq sport túrleriniń ishinde osy qazaq kúresine degen halyqtyń nazary erekshe bolyp otyr. Munyń ózi sporttyń osy túri boıynsha ár túrli deńgeıdegi saıystar men jarystardy kóbirek uıymdastyrý qajettigin kórsetedi. Mysaly, biz qyrkúıek aıynyń aıaǵynda oblystyq dene shynyqtyrý jáne sport basqarmasynyń qoldaýymen «Jaıyqtyń arystary – qazaqtyń barystary» atty respýblıkalyq týrnır ótkizdik. Atalǵan báseke batysqazaqstandyq qazaq kúresiniń ókilderimen birge oǵan janashyrlyq bildirip júrgen jankúıerlerdiń mereıin de bir kóterip tastady. Jalpy, qazaq kúresiniń keń óris alyp, serpindi túrde damýyna «Qazaqstan barysy» jobasy ıgi yqpalyn tıgizip kele jatqanyn aıta ketken lázim. Bul úderisti bizdiń óńirden de baıqaýǵa bolady. Qazirgi tańda oblysymyzdyń túpkir-túpkirinde tól sportymyzǵa degen qyzyǵýshylyq kún sanap artyp keledi. Alystaǵy aýdandar men shalǵaıdaǵy aýyldarda balalar men jastardyń qazaq kúresi úıirmelerine kóptep kelip jatqany da osy pikirimizdiń bir dáleli. Bul jerde, árıne, bapker-mamandardyń jetispeýshiligi de baıqalyp qala­dy. Degenmen, bolashaqta bul tyǵy­ryqtan jol taýyp shyǵý joldaryn izdestirý– basty nazarda bolmaq.  Ivat ERIShEV, Batys Qazaqstan oblysynyń qazaq kúresinen aǵa jattyqtyrýshysy ORAL