Abel Sanches Golovkınniń qarsylasy týraly pikirin aıtty

Gennadıı Golovkınniń jattyqtyrýshysy Abel Sanches amerıkalyq boksshy Denıel Djeıkobspen óter jekpe-jek jaıly óz pikirin bildirdi. Bul týraly vesti.kz habarlady. «Dennı bilikti boksshylardyń biri. Ol Dmıtrıı Pırogqa ese jibergennen keıin segiz qarsylasyn nokaýtpen jeńgen. Biraq aldaǵy kezdesýde bári basqasha bolady. Golovkın osal adam emes. Ol Djeıkobsty da, onyń pikirin de syılaıdy. Menińshe, naýryz aıynda álem kútken shoýlardyń biri bolady», – dedi Sanches. Abel Sanches osyǵan deıin Djeıkobstyń jeti raýndtan uzaqqa shydaıtynyna kúmánmen qaraıtynyn aıtqan. Sonymen qatar, dúıim jurtqa aıqastan keıin amerıkalyq sportshynyń qazirgi suhbattaryn taǵy bir márte oqýǵa keńes berdi. «Onyń ásirese, oń qoly myqty. Biraq sharshy alańda Gennadııdiń alǵashqy soqqysynan keıin ol buǵan deıingi pikirin ózgertetin bolady», – dedi jattyqtyrýshy. Aıta keteıik, qos boksshynyń arasyndaǵy aıqas 18 naýryzda Nıý-Iork qalasyndaǵy Madison Square Garden arenasynda ótedi.