Otansúıgish patrıottary bar el baqytty

Keshegi kúni kenshiler qalasy – Eki­bas­tuzda bastalǵan respýblıkalyq III Patrıottar forýmy ary qaraı oblys ortalyǵynda jalǵasty. «Birligimiz jarasqan!» atty res­pýblıkalyq jastar forýmyna elimizdiń ár oblysynan top-top bolyp, júzderi jarqyn alaý jastyq kóńilmen myńǵa tarta stýdent jastar keldi. Elimizdiń egemendigi men eldigin pash etetin memlekettik rámizderimizdi ardaqtaıtyn otansúıgish jastar sherýi Ertis ózeni jaǵalaýynan bastaldy. Kók baıraq týdy kótergen patrıot jastar oblys ortalyǵyndaǵy «Dańq» alańynda batyrlar rýhyna taǵzym etti. Ulttyq rámizder elimizdiń ótkeni jáne bolashaǵy arasyndaǵy sabaqtas­tyq­ty bildiredi. Halqymyzdyń rýhyn, ult­tyq sanasyn, qaharmandyǵyn, danaly­ǵyn aıshyqtaıtyn elimizdiń jańa ta­rıhy­nyń qasterli betteri deýge bolady. Endeshe, jastardy pat­rıot­tyq sezimge tárbıeleýde onyń mán-maǵy­nasyn túsin­di­rýimiz kerek. Forýmnyń da kóz­degen maq­saty osy. Bul jóninde Qa­zaq­stan Jastar kongresiniń atqarýshy dırek­to­ry Nurlan Sydyqov málimdedi. Forým aıasynda jastar sherýi uıym­das­tyryldy. Maqsaty – árbir jastyń boı­ynda óziniń Otanyna degen, óz eliniń rámizderine degen qurmet sezimin oıatý. Iá, Otannyń ózi osy jelbiregen kók týdan, eldik belgilerden, ánurannan basta­la­dy. Búgin olardyń júzderinde erekshe bir tolqý bar. Bir mezette búkil elimizdiń jastary oryndaǵan án­uran bizdiń oblys ortalyǵynda da shyr­qal­dy. «Meniń elim, meniń Qazaqstanym» degen sózder týǵan jerge degen súıispenshilikti, bolashaqqa degen senimdilikti aıshyqtady. Otanǵa degen sheksiz qurmetti bir-aq sózge syı­ǵyzyp tur. «Men birligi jarasqan eldiń ulany­myn» degen jastar sherýi «Dańq» ala­ńy­na kelip jetti. Osy jerde Halyq Qah­ar­m­any Ba­qyt­jan Ertaev sóz sóıledi: «Bizdiń babalary­myz jeńis alyp keldi. Biz tarıhqa bas ıemiz. Elimiz jasasyn, jastar osy joldy jalǵastyrsyn! – dedi aýǵan soǵysynyń ardageri. – Bul kúnderi elimizdiń kók baıraǵy basqa da táýelsiz memleketterdiń týlarymen qatar Birikken Ulttar Uıymynyń Nıý-Iorktegi shtab-páterinde jelbirep tur. Olımpıada kezinde elimizdiń sportshylary qurmetine kóteriledi. Eltańbamyz ulttyq teńge­mi­zde beınelegen. Memlekettik rámiz­der ǵa­ryshkerlermen birge kók júzinde, ǵa­ryshta da bolyp qaıtty». Mine, osyndaı qundylyqtardy jastar bilýleri úshin jyl saıyn Rámizder kúni atalyp ótedi. Jigerli jastardyń merekelik sherýi elimizdiń qunydylyqtaryn qasterlep, mártebesin asqaqtatyp, jas­tar­dy bir jerge toptasýǵa úndeıdi. Bári de osy bir kúnniń shynaıy mánin uǵyp, qoldaryna ustaǵan kók týlaryn jelbiretip, ásem jaǵalaýdy naǵyz merekege aı­nal­dyrdy. Sherýge qatysqan jastar Rá­mizder kúni birliktiń, tatýlyqtyń, dos­tyq­tyń mekeni elimizge arnap ánder shyr­qady. Sonymen qatar, «Kók baıraq týy­myz», «Máńgilik eltańba», «Qasıetti án­uran» dep atalǵan sherý baǵytymen mem­le­kettiń eldik, egemendik ulyq belgilerin kóte­rip, oblys ortalyǵynyń kóshelerin aralap júrip, «Astana» muz aıdyny sa­raıyna keldi. Osy jerde «Qazaqstan patrıottary­nyń forýmyna» qatysýshylar, olardyń ara­syn­da jastar, stýdentter, bilimdi saıysker jeńimpazdar, sportshylar bar, birgemiz – berik irgemiz, dep ózderiniń 2007 jyldan bastap atalyp kele jatqan elimizdiń Rámizder kúnin qurmettep, oǵan bas ıetinderin jetkizdi. Júzderi bal-bul janǵan jastar – «Jas Otan» jastar qa­na­tynyń músheleri keýdelerine qoldaryn qoıyp, kók týdyń qasyna kelip turdy. «Bizder jas patrıottar elimizdiń kók týyn árqashan berik qolda, myqty us­taımyz, Otan bireý, jastar árqashan senimen birge», desti olar. Ekinshi qatardaǵy sahna tórine sportshylar Elena Hrýstaleva, Muh­tar­han Dildábekov, aýǵan soǵy­sy­nyń ardageri Baqytjan Ertaev, jerlesimiz, beıbit kúni erlik kórsetken kapıtan Qadirjan Qazy­baev, ataqty ánshi Roza Rymbaeva shaqy­ryl­dy. Ánshi: «Otanyn súıetin osyndaı pat­rıottary bar el ba­qytty», – dedi. Rasynda da, biri ásem án­derimen, biri sporttaǵy jeńisimen eldiń týyn, rýhyn bıik kótergen, endi biri Otanyn qorǵap batyr atanǵan patrıotttar, mine, osylaı jastarǵa úlgi-ónege bolýda. Úshinshi qatarǵa soǵys ardagerleri kelip qosyldy. Úsh urpaq ókilderi osylaı kezdesti. Barlyǵyna da Elbasy Nursultan Nazarbaevtyń «Qazaqstandyq jol» atty kitaby syıǵa tartyldy. Rá­miz­der kúni qur­metine shyǵarylǵan arnaıy qurmetti belgilermen marapattaldy. Biz osy jerde Soltústik Qazaqstan obly­synan kelgen Dınara Berikqyzymen pikirlestik. Ol: «Júregi jerim, elim dep soqqan árbir patrıot jas úshin bul kún erekshe kún dep oılaımyn. Osyndaı mereke kúniniń bolǵany kerek, rámizderdiń qasıetin árbir jas uǵynyp, ony qadirlep ósýi tıis, patrıot degen jaı ǵana sóz emes, óziń ómir súrgen el úshin qyzmet jasaý, qajet kezinde Baqytjan aǵalardaı kúrese de bilý», – dedi. Kerekýlik Erke­bulan Aldabergenov bolsa: «Men ózimdi elimniń shynaıy patrıotymyn dep sanaımyn. О́zbekstannan kóship keldik, ne úshin keldik sonda, árıne, qazaǵym, elim, jerim dep keldik, endi osy eldiń birligi, bolashaǵy úshin qyzmet jasaımyn, jastar ana tilderin súısin, qurmettesin, barlyǵy ana tilińdi súıýden bastalady ǵoı», – dedi. Keń kólemdi ekrannan elimiz halyq­tary­nyń birligin aıǵaqtaıtyn kórinister kórse­tildi. Osy keń ekran arqyly eli­miz­diń ár oblysymen tikeleı baılanysqa shyqqan júrgizýshiler Petropavl, Shym­kent, Aty­raý, О́skemen jaqtarda ótip jatqan forým maqsatyna saı sol jerlerde turatyn elin, jerin súıetin patrıot­tardyń júrekjardy lebizderin bildirýlerine múmkindik jasady. El men jerge degen patrıottyq taqyrypta ánder oryn­daǵan ónerli toptar rámizder kúni merekesiniń sánin de mánin de keltirdi. Farıda BYQAI. Pavlodar oblysy.