Kóterilis batyryna qurmet kórsetildi

Baıbosyn Tamabaev – bıyl júz jyl tolǵan 1916 jylǵy ult-azattyq kóterilisine qatysyp, týǵan halqynyń bostandyǵy úshin kúresken batyr babamyz. Tarıhtan belgili, sol kezdegi búkil qazaq jerinde burq etken tolqý Vernyı ýezin de qamtydy. Sondaı úlken bas kóterýlerdiń biri Úshqońyr taýy mańynda oryn alyp, oǵan ataqty Bekbolat Áshekeevtiń basshylyq etkeni málim. Mine, Baıbosyn atamyz qasyna ertken qyryq jigitimen Bekbolattyń qolyna qosylyp, el erkindigi úshin basyn báıgege tikken. Bul kóterilisshilerdiń de muzdaı qarýlanǵan jazalaýshylar otrıadyna qarsy tura almaı jeńiliske ushyraǵanyn bilemiz. Sonymen, 1916 jyly 8 qyrkúıek­te Boraldaı bıiginde Bekbolat Áshekeev­pen birge Baıbosyn Tamabaev ta darǵa asylǵan. Sol sııaqty, Dúısebek Qasymbekov, Ekeıbaı Satqynov, Ábilesh Bekbatyrov, Ábdirashov, Sypataev ólim jazasyna kesilgen. B.Tamabaev 1856 jyly týǵan. Vernyı ýezi, Úlken Almaty bolysynyń №1 aýylynda dúnıege kelgen. Kezinde bı de, bolys ta bolǵan dáýletti adam eken. Biraq, baı bolsa da, bar bolsa da halyq jaǵyna shyǵyp, patsha jarlyǵyna qatty qarsylyq bildirgenderdiń qataryna kirgen. ...Qaratóbe aýylyndaǵy orta mektep qazir B.Tamabaev atynda. Mektep ujymy dırektory Kúlpan Isabaevanyń basshylyǵymen, okrýg ákimi Baqytgúl Jumanbaeva jáne Q.Qosshyǵulovtyń kómek-qoldaýymen, osy ýaqytqa deıin batyr esimi men rýhyna arnalǵan birtalaı is-sharany júzege asyrypty. Endi, mine, qola músini ornatyldy. Ony jasatqan babamyzdyń tikeleı urpaqtary, aǵaıyndary eken. Aıtqandaı, batyrdyń Uly Otan soǵysyna qatysqan Berdibaı Ámireuly degen nemeresi bolǵan. Al ol kisiniń zaıyby, ıaǵnı, Baıbosynnyń nemere kelini Márııa áje Baımoldaqyzynyń qazir kózi tiri, jasy 94-te. Búginde osy Berdibaı men Márııanyń ul-qyzdary , nemereleri ósip, órken jaıyp otyr. Sońynan batyr rýhyna arnalyp as berildi. Berikbaı QADYQOV, jýrnalıst Almaty oblysy, Qarasaı aýdany