Frıstaıldyń has sheberi Iýlııa Galyshevaǵa artylar úmit kóp

Frıstaıl sheberi Iýlııa Galy­shevany bilmeıtinder búginde kemde-kem. 1992 jyly týǵan óske­mendik qarshadaı qyz shańǵyny shyrq úıirip qana qoımaı, onymen áýede aınalatyn kúrdeli sport túri boıynsha elimizdiń ulttyq quramasynyń beldi múshesi, halyqaralyq dárejedegi sport sheberi. Almatyda ótetin qysqy Ýnı­ver­sıadamyzdaǵy negizgi úmit­­ker­­lerimizdiń biri de – Iýlııa Galysheva. Esimi elge eleýli sportshy búginde ulttyq qurama jattyqtyrýshysy Elena Krýglyhında jattyǵyp júr. Týǵan eliniń týyn kóterýdi maqsat etken ol osy kúnderi Al­maty Ýnıversıadasyna jan-jaqty daıarlyq júrgizýde. Budan keıin 19-26 aqpanda Japonııanyń Sapporo qalasynda VIII qysqy Azııa oıyndaryna qatyspaq. Al 6-19 naý­ryzda Ispanııanyń Sıera-Nevada qalasynda jalaýyn kóteretin álem birinshiliginde baǵyn synaıdy. Budan basqa bul maýsymda halyqaralyq federasııanyń (FIS) kúntizbelik josparyna saı Álem kýbogynyń kezeńderi men el chempıo­naty bar. Árıne, munyń barlyǵy sportshy úshin az jaýap­kershilik emes. Eýropanyń eki dúrkin chempıo­ny, Vankýverdegi Olımpııa oıyndarynda mogýlden 11-orynǵa taban tiregen, Sochıdegi Olım­pıadada úzdik jetilikke engen, Álem jáne Eýropa kýboktarynyń ıegeri, qysqy Azııa oıyndarynyń absolıýtti chempıony sııaqty atan túıege júk bolarlyq ataq-abyroıy bar sportshyǵa artylar senim joǵary ekeni daýsyz. Álemdegi úzdik frıstaılshylar sapyna engen onyń qazir naǵyz kemeline kelgen shaǵy. Al sporttaǵy jetistikteriniń taǵy bir parasyna kóz júgirter bolsaq, 2011 jyly Fınlıandııada 18-20 jas arasyndaǵy sportshylar arasynda álem chempıony atanǵan. Dál osy jastaǵylar arasynda 2012 jyly Italııanyń Valmalenko qalasynda ótken álem birinshiliginde mogýlden altyn medal alsa, paralleldi mogýl boıynsha qola medalǵa qol jetkizdi. 2015 jyly Ispanııada ótken Búkil­álemdik Ýnıversıadanyń jeńim­pazy atandy. Sondyqtan, Iýlııa Galyshevanyń mártebeli jarys­tar men óz qatarlastarymen báse­kelerde jınaǵan tájirıbesi jet­kilikti. Bıylǵy maýsymda Álem kýbogynyń tuǵyryna eki már­te kóterilip, kúmis pen qola­ny en­shilegeni málim. «Buǵylar jazyǵy» atanǵan amerıkalyq Dır-Vellıde ótken jarysta kanadalyq Jıýstın Dıý­fýr-Lapýantqa eki ret ese jibe­rip, kúmisten eki márte alqa taqty. Iýlııa buǵan deıin frıstaıl tarıhynda esh sportshy jasaı almaǵan jańa salto ádisimen árip­testerin de, jankúıerlerin de tańǵaldyryp júr. Dýman ANASh, «Egemen Qazaqstan» Shyǵys Qazaqstan oblysy