Úlgi kórsetýdiń ornyna uıatqa qaldyrdy

Tártiptik keńestiń talqysyna túsken kez kelgen memlekettik qyzmetkerden maza qashady. О́ıtkeni, tártipsiz ketken qyzmetkerlerdi «ták-ták» dep jónge salyp otyratyn bul keńesten jaza arqalamaı shyqqandary neken-saıaq. Bıylǵy jyly Ádep jónindegi keńes 9 ret májilis ótkizip, 64 másele talqylap, olardyń arasynda 44 tártiptik is qaralypty. Memlekettik qyzmet isteri jáne sybaılas jemqorlyqqa qarsy is-qımyl agenttiginiń Jambyl oblysy boıynsha departament basshysynyń orynbasary – Ádep jónindegi keńes hatshylyǵynyń meńgerýshisi Dáýren Qaıpovtyń aıtýyna qaraǵanda, bıyl tártiptik isterdi qaraý nátıjesi boıynsha 34 laýazymdy tulǵaǵa tártiptik jaza qoldaný usynylypty. Onyń ishinde 24-i memlekettik qyz­metke kir keltiretin teris qylyq jasaǵany úshin, 10-y Ádep normalaryn buzǵany úshin jáne 10 is qysqartyldy. Ádep normalaryn buzǵany úshin memlekettik qyzmetshilerdiń 7-eýine sógis, 1-eýine qatań sógis, 2-eýine qyzmetine tolyq sáıkes emestigi jónindegi eskertý túrindegi tártiptik jaza qoldanyldy. Iаǵnı, bul qyzmetkerler – basqalarǵa úlgi bolýdyń ornyna ózderi zań buzýshylyqqa jol berip otyr degen sóz. Tipti jumystan tys ýaqytta qoǵamdyq oryndarda mas kúıinde ersi qylyqqa barǵan memlekettik qyzmetshiler de bar eken. Mysaly, Jambyl oblysy ákimdiginiń densaýlyq saqtaý basqarmasynyń bólim basshysy men Baızaq aýdany ákimdiginiń jetekshi mamany qoǵamdyq orynda alkogoldik ishimdik ishkeni úshin ákimshilik jaýaptylyqqa tartylǵan. Sondaı-aq, jergilikti polısııa jáne buqaralyq aqparat qural­dary ókilderimen birge reıdter júrgizgende qyzmettik avtokólik­terdi jumys ýaqytynan tys kezde tıisti qujattarsyz paı­dalanǵan faktiler de jıi kezdesipti. Ádep normalaryn buzýǵa jol bergeni úshin bul mem­lekettik qyzmet­shilerge só­gis tú­rindegi tártiptik jazalar qolda­nylǵan. Oralhan DÁÝIT, «Egemen Qazaqstan» Jambyl oblysy