Jaıaý patrýlder kólik toqtatpaıtyn boldy

2017 jyldan bastap quqyq qorǵaý organdary qyzmetkerleriniń kúzette júrý kezindegi jańa erejeleri engiziledi. Bul týraly Ortalyq kommýnıkasııalar qyzmetinde ótken baspasóz konferensııasynda Ishki ister mınıstrligi ákimshilik polısııa komıteti tóraǵasynyń birinshi orynbasary Álibek Keńesbaev málim etti. Onyń aıtýynsha, Ishki ister mınıstrligi ishki ister organdarynyń jol júrisin qadaǵalaý kezinde avtopatrýldeý ádisine tolyqtaı kóshýine, sondaı-aq jalpy jol júrisi qaǵıdalary buzýshylyqtarynyń úshten birin anyqtaýǵa múmkindik beretin foto jáne beınetirkeýdiń barlyq jerlerde engizilýine baılanysty 2017 jyldyń 1 qańtarynan bastap polısııa qyzmetkerleriniń taıaqshalardy qoldanbaıtyny týraly sheshim qabyldady. «Kólik quraldaryn toqtatý patrýldik avtokólikte ornalastyrylǵan arnaıy dybys jáne jaryq sıgnaldary, daýys zoraıtqysh jabdyqtar arqyly júzege asyrylatyn bolady. Keı jaǵdaılarda (JKO, TJ, keptelis jaǵdaılarynda) kólik quraldary kol qımylymen jáne bir mezgilde ysqyrý arqyly toqtatylatyn bolady», – dep atap ótti Á. Keńesbaev. Aıta keteıik, jańa erejeler AQSh, Batys Eýropa elderi jáne ózge da shet memleketterdiń ozyq tájirıbelerin eskere otyryp engizilgen. Aıdar О́risbaev, "Egemen Qazaqstan"