Qazaqstan Respýblıkasynyń Zańy: № 35-VI QRZ

Osy Zań qarsy barlaý qyzmetiniń quqyqtyq negizderin jáne ony júzege asyrý zańdylyǵynyń kepildikter júıesin aıqyndaıdy.

1-bap. Osy Zańda paıdalanylatyn negizgi uǵymdar

Osy Zańda mynadaı negizgi uǵymdar paıdalanylady:

1) abonentter jáne (nemese) abonenttik qurylǵylar arasyndaǵy qosylýlar týraly aqparatty jedel alý – abonentter jáne (nemese) abonenttik qurylǵylar arasyndaǵy qosylýlardyń kúni, ýaqyty, uzaqtyǵy týraly aqparatty jáne olar týraly ózge de aqparatty jasyryn alý;

2) adamdy, oryndy jedel aýdıo- jáne (nemese) beınebaqylaý – beıne-, aýdıotehnıkany ne ózge de tehnıkalyq quraldardy paıdalana otyryp, jeke tulǵanyń sóılegen sózin jáne ózge de aqparatty, onyń áreketterin, sondaı-aq belgili bir orynda bolyp jatqan oqıǵalardy, prosester men qubylystardy jasyryn qujattaý;

3) aqparatty jınaýǵa, óńdeýge, berýge jáne saqtaýǵa arnalǵan qurylǵylardan aqparatty jedel túsirip alý – kompıýterlerden, apparattyq-baǵdarlamalyq keshenderden jáne aqparatty jınaýǵa, óńdeýge, berýge jáne saqtaýǵa arnalǵan basqa da qurylǵylardan aqparatty tehnıkalyq quraldarmen jáne (nemese) baǵdarlamalyq qamtylymmen jasyryn túsirip alý;

4) aqparatty resmı alý – qujattardy, materıaldardy, elektrondyq aqpa­rattyq resýrstardy tikeleı zerdeleý, kórsetilgen aqparatty biletin nemese bilýi múmkin jeke jáne zańdy tulǵalarǵa suraý salýlar joldaý arqyly qarsy barlaý qyzmetiniń mindetterin sheshý úshin mańyzy bar aqparatty alý;

5) baılanys jelisiniń jedel monıtorıngi – baılanys jelisi arqyly be­riletin aqparattan barlaý-nuqsan keltirý áreketiniń belgilerin jasyryn tabý;

6) baqylanatyn jetkizilim – barlaý-nuqsan keltirý áreketin júzege asyrý úshin paıdalanylatyn nárseler men zattardy satyp alý, ótkizý, berý, ornyn aýystyrý prosesin jasyryn baıqaý jáne qujattaý;

7) baqylaý maqsatynda satyp alý – barlaý-nuqsan keltirý áreketin júzege asyrý úshin paıdalanylatyn nárseler men zattardy satyp alý jóninde jalǵan óteýli mámile jasaý;

8) barlaý aksııasy – Qazaqstan Respýblıkasynyń ulttyq qaýipsizdigine nuqsan keltirip, málimetterge qol jetkizý, olardy jınaý;

9) barlaý jáne (nemese) nuqsan keltirý aksııalaryn áshkereleý – barlaý-nuqsan keltirý áreketin júzege asyrý belgileriniń, faktileri men jaǵdaı­larynyń jıyntyǵyn tabý;

10) barlaý-nuqsan keltirý áreketi – shet memleketterdiń arnaýly qyzmetteri, ózge de sheteldik uıymdar, sondaı-aq jekelegen adamdar júzege asyratyn barlaý jáne (nemese) nuqsan keltirý aksııalary;

11) barlaý-nuqsan keltirý áreketiniń belgileri – barlaý jáne (nemese) nuq­san keltirý aksııalarynyń júrgizilýi múmkin ekendigin kýálandyratyn áreket­terdiń, oqıǵalardyń, prosester men qubylystardyń aıryqsha erekshelikteri;

12) barlaý-nuqsan keltirý áreketiniń faktileri – barlaý jáne (nemese) nuqsan keltirý aksııalarynyń júrgizilýin kýálandyratyn áreketter, oqıǵalar, prosester men qubylystar;

13) jasyryn qyzmetker – qarsy barlaý qyzmetin júzege asyratyn organǵa jatatyndyǵy shıfrlanǵan qyzmetker, áskerı qyzmetshi;

14) jedel baıqaý – jeke tulǵalardyń áreketterin, qoǵamdyq orynda bolyp jatqan oqıǵalardy, prosesterdi, onyń ishinde tehnıkalyq quraldardy, fototúsirilimdi, beınebaıqaýdy jáne aýdıojazbany paıdalana otyryp, jasyryn ańǵarý;

15) jedel endirý – qarsy barlaý qyzmetin júzege asyratyn organnyń qyzmetkerin, áskerı qyzmetshisin ne qupııa kómekshini jedel qyzyǵýshylyq tanytyp otyrǵan obektiniń ortasyna jasyryn engizý;

16) jedel kirý – turǵyn, qyzmettik, óndiristik jáne ózge de úı-jaıǵa, ǵımaratqa, qurylysqa, qoımaǵa, kólik quralyna nemese jergilikti ýchaskege olardy zerttep-qaraý, sondaı-aq qarsy barlaý is-sharalaryn daıyndaý jáne júrgizý maqsatynda jasyryn kirý;

17) jedel eksperıment – qylmysqa arandatýdy bolǵyzbaıtyn, qoldan jasalǵan, baqylanatyn jaǵdaılarda áreketterdi, prosesterdi jasyryn zerdeleý arqyly qarsy barlaý aqparatyn alý;

18) jekelegen tulǵalar – shet memleketterdiń arnaýly qyzmetteriniń, ózge de sheteldik uıymdardyń atynan nemese solardyń múddelerinde ne derbes áreket etetin jeke tulǵalar, sondaı-aq Qazaqstan Respýblıkasynyń zańnamasyna sáıkes qurylǵan zańdy tulǵalar;

19) qarsy barlaý aqparaty – barlaý-nuqsan keltirý áreketiniń belgileri, faktileri jáne ony júzege asyrýǵa yqpal etetin jaǵdaılar týraly málimetter;

20) qarsy barlaý qyzmeti – Qazaqstan Respýblıkasynyń arnaýly memlekettik organdary júzege asyratyn, Qazaqstan Respýblıkasynyń ulttyq múddelerin barlaý-nuqsan keltirý áreketinen qorǵaý jónindegi qarsy barlaý jáne uıymdastyrý is-sharalarynyń júıesi;

21) qarsy barlaýmen qamtamasyz etý – barlaý-nuqsan keltirý áreketinen oqshaýlaý sharalarynyń júıesi;

22) qarsy barlaý saýalyn qoıý – saýal qoıylǵan adamnyń sózderinen qarsy barlaý aqparatyn jarııa nemese jasyryn alý;

23) qarsy barlaý isi – qarsy barlaý is-sharalarynyń materıaldaryn júıeleý, qarsy barlaý aqparatyn tekserý jáne baǵalaý boıynsha oqshaýlandyrylǵan is júrgizý;

24) qarsy barlaý is-sharasy – barlaý jáne (nemese) nuqsan keltirý aksııalarynyń aldyn alýǵa, olardy áshkereleýge jáne jolyn kesýge baǵyttalǵan jarııa jáne jasyryn is-qımyldar;

25) qupııa kómekshiler – on segiz jasqa tolǵan, áreketke qabiletti, qarsy barlaý qyzmetin júzege asyratyn organmen qupııalylyq negizde (onyń ishinde kelisimshart boıynsha da) yntymaqtasyp jumys isteıtin nemese buryn yntymaqtasyp jumys istegen jeke tulǵalar;

26) qupııa kómekshilerdiń, jasyryn qyzmetkerlerdiń jeke basy týraly málimetter – tegin, atyn, ákesiniń atyn (eger ol jeke basyn kýálandyratyn qujatta kórsetilse); búrkenshik atyn (ol bolǵan kezde); týǵan kúni men jerin; turǵylyqty jeriniń mekenjaıyn; jumys (oqý) ornyn anyqtaýǵa bolatyn aqparat; olardyń qarsy barlaý is-sharalaryna qatysýy týraly derekter; olardyń otbasy músheleri nemese jaqyn týystary týraly derekter;

27) nuqsan keltirý aksııasy – Qazaqstan Respýblıkasynyń ulttyq qaýipsizdigine nuqsan keltirip, qoǵamdyq qatynastarǵa yqpal etý;

28) poshta jóneltilimderin jáne ózge de jóneltilimderdi jedel baqylaý – hattardan, banderolderden, saýqattardan jáne ózge de jóneltilimderden qarsy barlaý aqparatyn jasyryn alý;

29) uıymdastyrý is-sharasy – qarsy barlaý is-sharalaryn júrgizý úshin qajetti jaǵdaılardy jasaý, sondaı-aq olardyń nátıjelerin paıdalanýdy qamtamasyz etý jónindegi is-qımyldar;

30) sheteldik uıymdar – shet memlekettiń zańnamasyna nemese halyqaralyq quqyq normalaryna sáıkes uıymdarǵa qandaı da bir mártebeniń berilýine qaramastan, osy shet memlekettiń aýmaǵynda basshylyq jasaıtyn organdary bar ne shet memlekettiń, onyń ishinde Qazaqstan Respýblıkasy tanymaǵan shet memlekettiń qoldaýyn paıdalanatyn ne shet memlekettiń zańnamasynda jáne (nemese) halyqaralyq quqyq normalarynda tyıym salynǵan qyzmetti júzege asyratyn, osy shet memlekettiń olarǵa qarsy is-qımyl jasaýǵa obektıvti qabiletsizdigin paıdalanatyn uıymdar;

31) elektr (telekommýnıkasııa) baılanysynyń jelileri arqyly beriletin aqparatty jedel túsirip alý – sym-ótkizgish, radıo, optıkalyq jáne basqa da elektromagnıttik júıeler arqyly beriletin belgilerdi, sıgnaldardy, daýystyq aqparatty, jazbasha mátindi, beınelerdi, beınesýretterdi, dybystardy jáne basqa da aqparatty túsirip alý jónindegi jasyryn is-qımyldar.

2-bap. Qarsy barlaý qyzmetiniń quqyqtyq negizi

1. Qarsy barlaý qyzmetiniń quqyqtyq negizin Qazaqstan Respýblıkasynyń Konstıtýsııasy, osy Zań jáne Qazaqstan Respýblıkasynyń ózge de normatıvtik quqyqtyq aktileri quraıdy.
2. Eger Qazaqstan Respýblıkasy ratıfıkasııalaǵan halyqaralyq shartta osy Zańda qamtylǵannan ózgeshe qaǵıdalar belgilense, onda halyqaralyq sharttyń qaǵıdalary qoldanylady.

3-bap. Qarsy barlaý qyzmetiniń mindetteri

Qarsy barlaý qyzmetiniń mindetteri:

1) barlaý-nuqsan keltirý áreketinen:

Qazaqstan Respýblıkasynyń konstıtýsııalyq qurylysynyń negizderin, memlekettik egemendigin, aýmaqtyq tutastyǵyn, ekonomıkalyq, ǵylymı-tehnıkalyq jáne qorǵanys áleýetin;

Qazaqstan Respýblıkasynyń Prezıdentin jáne basqa da kúzetiletin adamdardy;

Qazaqstan Respýblıkasynyń memlekettik qupııalaryn quraıtyn málimetterdi qorǵaý;

2) barlaý jáne (nemese) nuqsan keltirý aksııalarynyń, onyń ishinde:

terrorızmdi jáne ekstremızmdi júzege asyrýmen;

qylmystyq toptardy qurýmen jáne olardyń áreket etýimen;

qarýdyń, oq-dárilerdiń, jarylǵysh zattardyń, radıoaktıvti zattardyń jáne ıadrolyq materıaldardyń zańsyz aınalymymen;

esirtki, psıhotroptyq zattardyń, sol tektester men prekýrsorlardyń zańsyz aınalymymen baılanysty aksııalardyń aldyn alý, olardy áshkereleý jáne jolyn kesý;

3) memlekettik organdardy, memlekettik zańdy tulǵalardy, kvazımemlekettik sektor sýbektilerin, Qazaqstan Respýblıkasynyń strategııalyq jáne mańyzdy memlekettik máni bar ózge de obektilerin qarsy barlaýmen qamtamasyz etý;

4) Qazaqstan Respýblıkasynyń ulttyq qaýipsizdigine tónetin qaterlerdiń aldyn alýda, olardy beıtaraptandyrýda jáne ulttyq múddelerin ilgeriletýde memlekettik organdarǵa járdemdesý bolyp tabylady.

Qarsy barlaý qyzmetiniń mindetteri zańdarmen jáne Qazaqstan Respýblıkasy Prezıdentiniń aktilerimen tolyqtyrylýy múmkin.

4-bap. Qarsy barlaý qyzmetiniń qaǵıdattary

Qarsy barlaý qyzmeti:

1) zańdylyq;

2) adam men azamattyń quqyqtaryn jáne bostandyqtaryn saqtaý;

3) Qazaqstan Respýblıkasyn damytýdyń strategııalyq maqsattaryna baǵyný;

4) jarııa jáne jasyryn ádisterdi úılestirý;

5) qupııalylyq jáne astyrtyn áreket etý;

6) barlaý jáne (nemese) nuqsan keltirý aksııalarynyń aldyn alý, olardy áshkereleý, jolyn kesý jónindegi ýaqtyly, belsendi is-qımyldardy júzege asyrý;

7) barlaý jáne (nemese) nuqsan keltirý aksııalarynyń aldyn alýda, olardy áshkereleýde, jolyn kesýde qarsy barlaý is-sharalarynyń basymdyǵy;

8) barlaý-nuqsan keltirý áreketiniń naqty faktileri boıynsha qoldanylatyn quqyqtyq jáne ózge de sharalarǵa qaramastan, qarsy barlaý is-sharalaryn júrgizýdiń úzdiksiz bolýy qaǵıdattaryna negizdeledi.

5-bap. Qarsy barlaý qyzmetin júzege asyrý kezinde adam men azamattyń quqyqtaryn jáne bostandyqtaryn saqtaý kepildikteri

1. Osy Zańda kózdelmegen mindetterdi sheshý úshin qarsy barlaý qyzmetin júzege asyrýǵa, sondaı-aq onyń barysynda alynǵan aqparatty paıdalanýǵa jol berilmeıdi.
2. Qarsy barlaý qyzmetin júzege asyrý kezinde adam men azamattyń abyroıyn jáne qadir-qasıetin qorlaıtyn áreketterge jol berilmeıdi.
3. Qarsy barlaý qyzmetin júzege asyratyn organnyń is-qımyldaryna joǵary turǵan organǵa, prokýratýraǵa nemese sotqa shaǵym jasalýy múmkin.

Berilgen shaǵym joǵary turǵan organ, prokýratýra nemese sot ol boıynsha tıisti sheshim qabyldaǵanǵa deıin shaǵym jasalyp otyrǵan is-qımyldardy toqtatpaıdy.

4. Prokýror nemese sot shaǵymdy qaraý úshin talap etip aldyrǵan qujattar shaǵym nysanasyna jatqyzylýǵa jáne qarsy barlaý qyzmetiniń uıymdastyrylýy men taktıkasyna, naqty qarsy barlaý is-sharalaryna qatysty aqparattyń, sondaı-aq qupııa kómekshiler men jasyryn qyzmetkerlerdiń jeke basy týraly málimetterdiń berilýin bolǵyzbaýǵa tıis.

6-bap. Qazaqstan Respýblıkasy Prezıdentiniń qarsy barlaý qyzmeti salasyndaǵy ókilettikteri

Qazaqstan Respýblıkasynyń Prezıdenti:

1) qarsy barlaý qyzmetiniń negizgi baǵyttary men basymdyqtaryn aıqyndaıdy;

2) ózi ýákilettik bergen organdarǵa qarsy barlaý qyzmetin damytý jáne qarsy barlaý qyzmetin júzege asyratyn organdardyń basqa da memlekettik organdarmen ózara is-qımyl jasaý máselelerin qaraýdy tapsyrady;

3) qarsy barlaý qyzmetin júzege asyratyn organdardyń qyzmetin baqylaıdy, baqylaý nysandaryn jáne ony júzege asyrý tártibin belgileıdi;

4) ózi aıqyndaǵan tártippen jáne merzimderde qarsy barlaý qyzmetin júzege asyratyn organdar basshylarynyń esepterin tyńdaıdy;

5) Qazaqstan Respýblıkasynyń Konstıtýsııasyna jáne zańdaryna sáıkes ózge de ókilettikterdi júzege asyrady.

7-bap. Qarsy barlaý qyzmetin júzege asyratyn organdar

1. Qarsy barlaý qyzmetin júzege asyratyn organdarǵa Qazaqstan Respýblıkasynyń arnaýly memlekettik organdary jatady.
2. Qazaqstan Respýblıkasynyń arnaýly memlekettik organdary osy Zańda belgilengen tártippen jáne osy baptyń 3, 4, 5-tarmaqtarynda aıqyndalatyn shekterde qarsy barlaý qyzmetin júzege asyrady.
3. Qazaqstan Respýblıkasynyń ulttyq qaýipsizdik organdary (budan ári – ulttyq qaýipsizdik organdary) osy Zańnyń 10-baby 1-tarmaǵynyń 1), 2), 4), 5), 6), 7), 8), 9), 10) tarmaqshalarynda kózdelgen negizder boıynsha qarsy barlaý is-sharalaryn júrgizedi.

Ulttyq qaýipsizdik organdarynyń jáne Qazaqstan Respýblıkasy Memleket­tik kúzet qyzmetiniń birlesken normatıvtik quqyqtyq aktisinde aıqyndalǵan jaǵdaılarda jáne tártippen ulttyq qaýipsizdik organdary osy Zańnyń 10-baby 1-tarmaǵynyń 3) tarmaqshasynda kózdelgen negiz boıynsha qarsy barlaý is-sharalaryn da júrgizedi.

4. Qazaqstan Respýblıkasynyń Memlekettik kúzet qyzmeti (budan ári – Mem­lekettik kúzet qyzmeti) osy Zańnyń 10-baby 1-tarmaǵynyń 3), 9), 10) tar­maq­shalarynda kózdelgen negizder boıynsha qarsy barlaý is-sharalaryn júrgizedi.
5. Qazaqstan Respýblıkasynyń syrtqy barlaý salasyndaǵy ýákiletti organy (budan ári – syrtqy barlaý salasyndaǵy ýákiletti organ) osy Zańnyń 10-baby 1-tarmaǵynyń 4), 9), 10) tarmaqshalarynda kózdelgen negizder boıynsha qarsy barlaý is-sharalaryn júrgizedi.

Syrtqy barlaý salasyndaǵy ýákiletti organnyń jáne ulttyq qaýipsizdik organdarynyń birlesken normatıvtik quqyqtyq aktisinde aıqyndalǵan jaǵdaılarda jáne tártippen syrtqy barlaý salasyndaǵy ýákiletti organ osy Zańnyń 10-baby 1-tarmaǵynyń 8) tarmaqshasynda kózdelgen negiz boıynsha qarsy barlaý is-sharalaryn da júrgizedi.

6. Qarsy barlaý qyzmetin júzege asyratyn organdardyń ózara is-qımyl jasaý tártibi birlesken normatıvtik quqyqtyq aktilerde aıqyndalady.
7. Qarsy barlaý qyzmetin júzege asyratyn organdardyń birinshi basshylary qarsy barlaý qyzmetin júzege asyrýǵa quqyǵy bar ózderine baǵynysty vedomstvolardyń, qyzmetterdiń, bólimshelerdiń, qyzmetkerler sanattarynyń tizbesin belgileıdi, qarsy barlaý qyzmetiniń uıymdastyrylýy men taktıkasy jáne onyń mindetterin iske asyrý máseleleri boıynsha normatıvtik quqyqtyq aktiler shyǵarady.

8-bap. Qarsy barlaý qyzmetin júzege asyratyn organdardyń mindetteri

 Qarsy barlaý qyzmetin júzege asyratyn organdar ózderine júktelgen mindetterdiń sheginde:

1) barlaý-nuqsan keltirý áreketiniń belgilerin, faktilerin anyqtaýǵa jáne barlaý-nuqsan keltirý áreketin júzege asyrýǵa yqpal etetin sebepter men jaǵdaılardy joıý jónindegi sharalardy qoldanýǵa;

2) Qazaqstan Respýblıkasynyń Prezıdentin jáne memlekettik organdardy Qazaqstan Respýblıkasynyń ulttyq qaýipsizdigine tónetin qaterler týraly habardar etýge;

3) Qazaqstan Respýblıkasynyń konstıtýsııalyq qurylysynyń negizderin, memlekettik egemendigin, aýmaqtyq tutastyǵyn, ekonomıkalyq, ǵylymı-tehnı­kalyq jáne qorǵanys áleýetin qorǵaý jónindegi qajetti sharalardy qoldanýǵa;

4) Qazaqstan Respýblıkasy Prezıdentiniń jáne basqa da kúzetiletin adamdardyń qaýipsizdigin qamtamasyz etýge;

5) Qazaqstan Respýblıkasynyń memlekettik qupııalaryn quraıtyn málimetterdi qorǵaý jónindegi sharalardy qoldanýǵa;

6) memlekettik organdardy, memlekettik zańdy tulǵalardy, kvazımemlekettik sektor sýbektilerin, Qazaqstan Respýblıkasynyń strategııalyq jáne mańyzdy memlekettik máni bar ózge de obektilerin qarsy barlaýmen qamtamasyz etýdi júzege asyrýǵa;

7) qarsy barlaý qyzmetin júzege asyrý kezinde astyrtyn áreket etýdi, sondaı-aq qarsy barlaý qyzmetin júzege asyratyn organ kúshteriniń, quraldarynyń jáne aqparatynyń qorǵalýyn qamtamasyz etý jónindegi sharalardy qoldanýǵa;

8) Qazaqstan Respýblıkasynyń halyqaralyq sharttary negizinde shet memleketterdiń arnaýly qyzmetteriniń, qaýipsizdik organdarynyń, quqyq qorǵaý organdarynyń, halyqaralyq jáne ózge de uıymdardyń suraý salýlaryn oryndaýǵa;

9) zańdarda jáne Qazaqstan Respýblıkasy Prezıdentiniń aktilerinde kózdel­gen ózge de mindetterdi júzege asyrýǵa mindetti.

9-bap. Qarsy barlaý qyzmetin júzege asyratyn organdardyń quqyqtary

Qarsy barlaý qyzmetin júzege asyratyn organdardyń:

1) qarsy barlaý is-sharalaryn júrgizýdiń uıymdastyrylýy men taktıkasyn aıqyndaýǵa;

2) jeke tulǵalardy qupııa túrde yntymaqtasyp jumys isteýge tartýǵa;

3) astyrtyn áreket etetin obektilerdi (kásiporyndardy jáne uıymdardy) qurýǵa, sondaı-aq qyzmetkerlerdi, áskerı qyzmetshilerdi, qupııa kómekshilerdi, bólimshelerdiń, uıymdardyń, úı-jaılar men kólik quraldarynyń vedomstvolyq tıesiligin shıfrlaıtyn qujattardy paıdalanýǵa;

4) osy Zańnyń 11-babynda kózdelgen qarsy barlaý is-sharalaryn júrgizý úshin ǵana táýliktiń kez kelgen ýaqytynda uıymdardyń aýmaǵy men úı-jaılaryna, al Qazaqstan Respýblıkasynyń erekshe rejımdik, rejımdik, strategııalyq jáne mańyzdy memlekettik máni bar ózge de obektileriniń aýmaǵyna olardyń basshylaryn habardar ete otyryp kedergisiz kirýge;

5) qarsy barlaý is-sharalarynyń barysynda jeke jáne zańdy tulǵalardyń múlkin olardyń kelisimimen paıdalanýǵa;

6) qarsy barlaý is-sharalaryn júrgizý kezinde jedel-izdestirý qyzmetin júzege asyrýǵa quqyǵy bar organdarmen kelisý boıynsha osy organdardyń kúshteri men quraldaryn tartýǵa;

7) qajetti ǵylymı-tehnıkalyq nemese ózge de arnaýly bilim-biligi bar laýazymdy adamdar men mamandardyń kómegin paıdalanýǵa;

8) qarsy barlaý is-sharalaryn júrgizý kezinde barlaý-nuqsan keltirý áreketin ımıtasııalaıtyn is-qımyldardy júzege asyrýǵa;

9) barlaý-nuqsan keltirý áreketin júzege asyrýǵa yqpal etetin jaǵdaılardy joıý jóninde usynystar engizýge;

10) qarsy barlaý is-sharalaryn júrgizýge arnalǵan arnaýly jáne ózge de tehnıkalyq quraldardy, jabdyqtardy qoldanýǵa;

11) zańdarda jáne Qazaqstan Respýblıkasy Prezıdentiniń aktilerinde kózdelgen ózge de quqyqtardy júzege asyrýǵa quqyǵy bar.

10-bap. Qarsy barlaý is-sharalaryn júrgizýge negizder

1. Mynalar:

1) Qazaqstan Respýblıkasynyń ulttyq múddelerin barlaý-nuqsan keltirý áreketinen qorǵaý boıynsha Qazaqstan Respýblıkasynyń zańnamasynda belgilengen sharalardy iske asyrý;

2) qarsy barlaý aqparatynyń, onyń ishinde sotqa deıingi tergep-tekserý barysynda alynǵan aqparattyń bolýy;

3) kúzetiletin adamdar men obektilerdiń qaýipsizdigin qamtamasyz etý qajettigi;

4) Qazaqstan Respýblıkasynyń ulttyq qaýipsizdigine qater tóndiretin áreketter, oqıǵalar, prosester men qubylystar týraly málimetterdi alý, sondaı-aq ulttyq qaýipsizdikke qater tóndirýge yqpal etetin sebepter men jaǵdaılardy anyqtaý qajettigi;

5) memlekettik organdardy, memlekettik zańdy tulǵalardy, kvazımemlekettik sektor sýbektilerin, Qazaqstan Respýblıkasynyń strategııalyq jáne mańyzdy memlekettik máni bar ózge de obektilerin qarsy barlaýmen qamtamasyz etý qajettigi;

6) jumysy Qazaqstan Respýblıkasynyń ulttyq qaýipsizdigine qater tóndiretin radıoelektrondyq quraldarmen beriletin radıosáýlelenýdi, sondaı-aq barlaý-nuqsan keltirý áreketinde baılanys jelilerin paıdalaný jónindegi is-qımyldardy anyqtaý qajettigi;

7) Qazaqstan Respýblıkasynyń memlekettik qupııalaryn quraıtyn málimetterge ruqsat alýǵa resimdeletin (qaıta resimdeletin) adamdardy mindetti arnaıy tekserý, sondaı-aq memlekettik qyzmetke kiretin jáne memlekettik qyzmettegi, Qazaqstan Respýblıkasy Ulttyq Bankiniń jáne onyń vedomstvolarynyń qyzmetshisi laýazymyna ornalasýǵa úmitker adamdardy arnaıy tekserý;

8) Qazaqstan Respýblıkasynyń memlekettik organdaryna, sondaı-aq basqarýshylyq fýnksııalardy oryndaýmen baılanysty laýazymdarǵa memlekettik zańdy tulǵalarǵa nemese kvazımemlekettik sektordyń sýbektilerine jumysqa tartylatyn sheteldikterdi mindetti arnaıy tekserý;

9) Qazaqstan Respýblıkasynyń halyqaralyq sharttaryna sáıkes shet memleketterdiń arnaýly qyzmetteriniń, qaýipsizdik organdarynyń, quqyq qorǵaý organdarynyń, halyqaralyq jáne ózge de uıymdardyń suraý salýlary;

10) qarsy barlaý qyzmetin júzege asyratyn organ kúshteriniń, quraldary men aqparatynyń barlaý-nuqsan keltirý áreketinen qorǵalýyn qamtamasyz etý qajettigi qarsy barlaý is-sharalaryn júrgizýge negizder bolyp tabylady.

2. Eger Qazaqstan Respýblıkasynyń zańdarynda ózgeshe kózdelmese, zańdy tulǵalardyń uıymdyq-quqyqtyq nysany, memlekettik tıesiligi, sondaı-aq jeke tulǵalardyń azamattyǵy, jynysy, ulty, turǵylyqty jeri, áleýmettik, laýazymdyq jáne múliktik jaǵdaıy, qoǵamdyq birlestikterge jatatyndyǵy, dinge kózqarasy jáne saıası senimderi qarsy barlaý is-sharalaryn júrgizý úshin kedergi bolyp tabylmaıdy.

11-bap. Qarsy barlaý is-sharalary

1. Qarsy barlaý is-sharalaryna:

1) aqparatty resmı alý;

2) qarsy barlaý saýalyn qoıý;

3) jeke tulǵalarmen jarııa jáne jasyryn qatynastar ornatý, olardyń múmkindikterin qarsy barlaý qyzmetinde paıdalaný;

4) jedel endirý;

5) jedel baıqaý;

6) jedel eksperıment;

7) nárseler men zattardy jedel tabý, zertteý, tirkeý;

8) baqylanatyn jetkizilim;

9) baqylaý maqsatynda satyp alý;

10) tehnıkalyq barlaý quraldaryn jáne aqparattyń taralyp ketýiniń tehnıkalyq arnalaryn izdeý;

11) baılanys jelisiniń jedel monıtorıngi;

12) poshta jóneltilimderin jáne ózge de jóneltilimderdi jedel baqylaý;

13) elektr (telekommýnıkasııa) baılanysynyń jelileri arqyly beriletin aqparatty jedel túsirip alý;

14) abonentter jáne (nemese) abonenttik qurylǵylar arasyndaǵy qosylýlar týraly aqparatty jedel alý;

15) aqparatty jınaýǵa, óńdeýge, berýge jáne saqtaýǵa arnalǵan qurylǵylardan aqparatty jedel túsirip alý;

16) adamdy nemese oryndy jedel aýdıo- jáne (nemese) beınebaqylaý;

17) jedel kirý jatady.

2. Osy baptyń 1-tarmaǵynda kórsetilgen qarsy barlaý is-sharalaryn qarsy barlaý qyzmetin júzege asyratyn barlyq organdar ózderine júktelgen mindetterge sáıkes júrgizedi.
3. Osy baptyń 1-tarmaǵynyń 1) – 11) tarmaqshalarynda kózdelgen qarsy barlaý is-sharalaryn júrgizý tártibi qarsy barlaý qyzmetin júzege asyratyn organnyń normatıvtik quqyqtyq aktilerinde aıqyndalady.
4. Osy baptyń 1-tarmaǵynyń 12) – 17) tarmaqshalarynda kórsetilgen qarsy barlaý is-sharalary prokýrordyń sanksııasymen ne Qazaqstan Respýblıkasynyń Bas Prokýrorymen kelisilgen tártippen júrgiziledi.

Osy tarmaqtyń birinshi bóliginde kórsetilgen qarsy barlaý is-sharalaryn júrgizý tártibi qarsy barlaý qyzmetin júzege asyratyn organdardyń Qazaqstan Respýblıkasynyń Bas Prokýrorymen kelisý boıynsha qabyldanatyn normatıvtik quqyqtyq aktilerinde aıqyndalady.

5. Qarsy barlaý qyzmetin júzege asyratyn barlyq organdar mindetterdi sheshý múddesinde baılanys jelisin paıdalanýmen baılanysty qarsy barlaý is-sha­ralaryn tehnıkalyq turǵydan ulttyq qaýipsizdik organdary júzege asyrady.

Osy is-sharalardy júrgizý tártibi qarsy barlaý qyzmetin júzege asyratyn organdardyń Qazaqstan Respýblıkasynyń Bas Prokýrorymen kelisý boıynsha qabyldanatyn birlesken normatıvtik quqyqtyq aktisinde aıqyndalady.

6. Osy baptyń 1-tarmaǵynda kórsetilmegen, málimetteri memlekettik qu­pııa­lardy quraıtyn ádisterdi jáne quraldardy paıdalanýmen baılanysty qar­sy barlaý is-sharalarynyń tizbesi jáne olardy júrgizý tártibi qarsy barlaý qyz­metin júzege asyratyn organnyń normatıvtik quqyqtyq aktilerinde belgilenedi.

Osy is-sharalar zańmen qorǵalatyn jeke ómirge qol suǵylmaýshylyqty, hat jazysý, telefon arqyly sóılesý, telegraf habarlamalary men poshta jónel­tilimderi qupııasyn, sondaı-aq turǵynjaıǵa qol suǵylmaýshylyq quqyǵyn qozǵamaýǵa tıis. Olarda adamnyń ómiri men densaýlyǵyna, sondaı-aq qorshaǵan ortaǵa qater tóndiretin ádister men quraldardy qoldanýǵa jol berilmeıdi.

7. Qarsy barlaý is-sharalaryn tehnıkalyq júrgizý úshin Qazaqstan Respýblıkasynyń baılanys salasyndaǵy zańnamasynda aıqyndalatyn baılanys jelileri men quraldaryna qoıylatyn talaptarǵa sáıkes baılanys operatorlary satyp alǵan jáne ornatqan telekommýnıkasııa jabdyqtarynyń fýnksııalary paıdalanylýy múmkin.
8. Memlekettik kúzet qyzmeti jáne syrtqy barlaý salasyndaǵy ýákiletti organ osy baptyń 1-tarmaǵynyń 13) jáne 14) tarmaqshalarynda kórsetilgen, Qazaqstan Respýblıkasynyń aýmaǵynda baılanys qyzmetteri men quraldaryn usynatyn jeke jáne zańdy tulǵalardyń stasıonarlyq apparatýrasy men baılanys jelilerine qosylýdy bolǵyzbaıtyn qarsy barlaý is-sharalaryn júrgizýge quqyly.
9. Memlekettik kúzet qyzmetiniń jedel qamtamasyz etý obektilerindegi jáne kúzet is-sharalary júrgiziletin aımaqtaǵy qarsy barlaý is-sharalary qarsy barlaý qyzmetin júzege asyratyn organdardyń birlesken normatıvtik quqyqtyq aktilerinde aıqyndalǵan tártippen Memlekettik kúzet qyzmetimen kelisý boıynsha júrgiziledi.
10. Naqty qarsy barlaý is-sharalarynyń rettiligi men mazmuny qarsy barlaý qyzmetiniń sharttarynda aıqyndalady.
11. Qarsy barlaý is-sharalaryn júrgizý barysynda alynǵan múlikke bılik etý jáne ony memleket kirisine aınaldyrý tártibin Qazaqstan Respýblıkasynyń Úkimeti aıqyndaıdy.

12-bap. Qarsy barlaý qyzmetiniń materıaldaryn paıdalaný

Qarsy barlaý qyzmetiniń materıaldary:

1) Qazaqstan Respýblıkasynyń Ulttyq qaýipsizdik strategııasyn, Qazaqstan Respýblıkasynyń ulttyq qaýipsizdigin qamtamasyz etý salasyndaǵy ózge de strategııalyq jáne baǵdarlamalyq qujattardy ázirleý;

2) Qazaqstan Respýblıkasy Prezıdentiniń, Qazaqstan Respýblıkasy Parlamentiniń, Qazaqstan Respýblıkasy Úkimetiniń Qazaqstan Respýblı­kasynyń ulttyq qaýipsizdigin qamtamasyz etý máseleleri boıynsha sheshimder qabyldaýy;

3) memlekettik organdardyń, memlekettik zańdy tulǵalardyń, kvazımemlekettik sektor sýbektileriniń Qazaqstan Respýblıkasynyń ulttyq múddelerin qorǵaý salasynda sheshimder qabyldaýy;

4) normatıvtik quqyqtyq aktilerdiń jáne Qazaqstan Respýblıkasy halyqaralyq sharttarynyń jobalaryn ázirleý;

5) Qazaqstan Respýblıkasynyń ulttyq qaýipsizdigine tónetin qaterlerdi taldaý, baǵalaý jáne boljaý;

6) barlaý jáne (nemese) nuqsan keltirý aksııalarynyń aldyn alý, olardy áshkereleý jáne jolyn kesý;

7) Qazaqstan Respýblıkasynyń ákimshilik nemese qylmystyq-prosestik zańnamasynda kózdelgen tártippen ákimshilik nemese qylmystyq jaýaptylyqqa tartý úshin paıdalanylady.

13-bap. Qarsy barlaý qyzmetin aqparattyq qamtamasyz etý jáne qujattaý

1. Osy Zańda kózdelgen mindetterdi sheshý úshin qarsy barlaý qyzmetin júzege asyratyn organ aqparattandyrý obektilerin qurady, paıdalanady, damytady, olardyń qaýipsizdigin qamtamasyz etedi, sondaı-aq qarsy barlaý isterin júrgizedi.
2. Qarsy barlaý qyzmetin júzege asyratyn organnyń aqparattandyrý obektilerin qurý, damytý, paıdalaný jáne olardyń qaýipsizdigin qamtamasyz etý tártibi Qazaqstan Respýblıkasynyń zańnamasynda aıqyndalady.
3. Qarsy barlaý isterin ashý jáne toqtatý tártibi Qazaqstan Respýblıkasynyń Bas Prokýrorymen kelisý boıynsha qarsy barlaý qyzmetin júzege asyratyn organnyń birinshi basshysynyń normatıvtik quqyqtyq aktisinde aıqyndalady.

14-bap. Qarsy barlaý qyzmetiniń materıaldaryn saqtaý

1. Qylmystyq iske qosa tirkelgen málimetterdi qospaǵanda, qarsy barlaý qyzmetiniń materıaldary qarsy barlaý qyzmetin júzege asyratyn organda ǵana saqtalýǵa jáne joıylýǵa tıis.
2. Qarsy barlaý qyzmetiniń materıaldaryn saqtaý merzimderi, saqtaý jáne joıý tártibi qarsy barlaý qyzmetin júzege asyratyn organnyń birinshi basshysynyń normatıvtik quqyqtyq aktisinde belgilenedi.

15-bap. Qarsy barlaý qyzmeti salasyndaǵy ózara is-qımyl jáne halyqaralyq yntymaqtastyq

1. Memlekettik organdar, memlekettik zańdy tulǵalar, sondaı-aq kvazımemlekettik sektor sýbektileri óz quzyreti sheginde qarsy barlaý qyzmetin júzege asyratyn organdarǵa osy Zańnyń 3-babynda kózdelgen mindetterdi sheshýde járdem kórsetedi.
2. Qarsy barlaý qyzmetin júzege asyratyn organdar Qazaqstan Respýblıkasynyń tıisti halyqaralyq sharttary negizinde shet memleketterdiń arnaýly qyzmetterimen, qaýipsizdik organdarymen, quqyq qorǵaý organdarymen, halyqaralyq jáne ózge de uıymdarmen halyqaralyq yntymaqtastyq sheńberinde ózara is-qımyl jasaıdy.
3. Halyqaralyq sharttardyń taraptary arasyndaǵy qarsy barlaý qyzmeti salasynda ózara is-qımyl jasaý máseleleri boıynsha málimetterge, sol sııaqty ózara is-qımyl jasaýdyń kólemi men mazmuny týraly aqparatqa qol jetkizý shekteledi jáne olar kimge bolsa da berilmeıdi nemese taraptardyń árqaısysynyń jazbasha kelisiminsiz jáne talaptary tolyq eskerilmeıinshe paıdalanylmaıdy.

16-bap. Qarsy barlaý qyzmetin júzege asyratyn organdardyń qyzmetkerleri, áskerı qyzmetshileri

1. Qarsy barlaý qyzmetin júzege asyratyn organdar qyzmetkerleriniń, áskerı qyzmetshileriniń quqyqtyq mártebesi, olardy quqyqtyq jáne áleýmettik qorǵaý sharalary Qazaqstan Respýblıkasynyń zańdarynda belgilenedi.
2. Qarsy barlaý qyzmetine zańsyz aralasý nemese kedergi keltirý, sondaı-aq qarsy barlaý is-sharalaryn júrgizý kezinde qyzmetkerlerdiń, áskerı qyzmetshilerdiń zańdy talaptaryn oryndamaý Qazaqstan Respýblıkasynyń zańdarynda belgilengen jaýaptylyqqa alyp keledi.
3. Qarsy barlaý qyzmetin júzege asyratyn organnyń qyzmetkeri nemese áskerı qyzmetshisi qarsy barlaý is-sharalaryn júrgizgen kezde ony ákimshilik ustaýǵa, sondaı-aq jeke basyn jete tekserýge, ondaǵy zattardy, ol paıdalanatyn qyzmettik kólik quraldaryn jete tekserýge jol berilmeıdi.

17-bap. Qarsy barlaý qyzmetin júzege asyratyn organdar qyzmetkerleriniń, áskerı qyzmetshileriniń jaýaptylyǵy

1. Qarsy barlaý qyzmetin júzege asyrý kezinde quqyqqa qarsy áreketter jasaǵan qyzmetkerler, áskerı qyzmetshiler Qazaqstan Respýblıkasynyń zańdarynda belgilengen jaýaptylyqta bolady.
2. Qarsy barlaý qyzmetin júzege asyratyn organdardyń is-qımyldarymen keltirilgen zalal Qazaqstan Respýblıkasynyń zańnamasynda belgilengen tártippen óteledi.

18-bap. Qarsy barlaý qyzmetin júzege asyratyn organdarǵa járdem kórsetetin qupııa kómekshiler

1. Qarsy barlaý qyzmetin júzege asyratyn organdarǵa járdem kórsetetin qupııa kómekshiler memlekettiń qorǵaýynda bolady.
2. Qupııa kómekshilerdiń jeke basy týraly málimetterdi kimge bolsa da berýge bolmaıdy.
3. Qupııa kómekshilerdiń, sol sııaqty olardyń otbasy músheleri men jaqyn týystarynyń ómirine, densaýlyǵyna nemese múlkine naqty qolsuǵýshylyq qateri tóngen kezde qarsy barlaý qyzmetin júzege asyratyn organ quqyqqa qarsy áreketterdi bolǵyzbaý, kinálilerdi anyqtaý jáne olardy jaýapqa tartý jónindegi barlyq qajetti sharalardy, sondaı-aq qajet bolǵan jaǵdaıda, Qazaqstan Respýblıkasynyń qylmystyq proseske qatysatyn adamdardy memlekettik qorǵaý týraly zańnamasyna sáıkes qaýipsizdik sharalaryn qabyldaýǵa mindetti.
4. Qupııa kómekshiler qarsy barlaý qyzmetin júzege asyratyn organdarǵa óteýli nemese óteýsiz negizde járdem kórsetedi. О́teýli negizde járdem kórsetetin qupııa kómekshilerge syıaqy tóleý tártibin qarsy barlaý qyzmetin júzege asyratyn organnyń birinshi basshysy belgileıdi.
5. Qupııa kómekshi qarsy barlaý is-sharalaryn júrgizýge qatysýyna baılanysty qaza bolǵan jaǵdaıda, qaza tapqan adamnyń otbasyna jáne onyń asyraýyndaǵy adamdarǵa:

aqyly negizde yntymaqtasyp jumys istegen qaza bolǵan adamnyń aqshalaı syıaqysynyń on jyldyq somasy;

qaza bolǵan adam óteýsiz negizde yntymaqtasyp jumys istegen kezde Qazaqstan Respýblıkasynyń zańnamasynda belgilengen eń tómen aılyq jalaqy mólsheriniń on jyldyq somasy mólsherinde birjolǵy járdemaqy tólenedi.

6. Qupııa kómekshi qarsy barlaý is-sharalaryn júrgizýge qatysýyna baılanysty mertikken nemese onyń densaýlyǵyna ózge de zııan keltirilgen kezde oǵan qarsy barlaý qyzmetin júzege asyratyn organnyń birinshi basshysy aıqyndaıtyn mólsherde birjolǵy járdemaqy tólenedi, onyń mólsheri:

aqyly negizde yntymaqtasyp jumys istegender úshin aqshalaı syıaqynyń bes jyldyq somasynan;

óteýsiz negizde yntymaqtasyp jumys istegender úshin Qazaqstan Respýblı­kasynyń zańnamasynda belgilengen eń tómen aılyq jalaqy mólsheriniń bes jyldyq somasynan aspaýǵa tıis.

7. Qupııa kómekshi qarsy barlaý is-sharalaryn júrgizýge qatysýyna baılanysty qaza bolǵan ne mertikken nemese onyń densaýlyǵyna ózge de zııan keltirilgen jaǵdaılarda birjolǵy járdemaqyny tóleý qarsy barlaý qyzmetin júzege asyratyn organnyń normatıvtik quqyqtyq aktisinde aıqyndalatyn tártippen qarsy barlaý qyzmetin júzege asyratyn organnyń qarajatynan júrgiziledi.
8. Qupııa kómekshilermen jumysty uıymdastyrý jáne júrgizý tártibi qarsy barlaý qyzmetin júzege asyratyn organnyń normatıvtik quqyqtyq aktilerinde belgilenedi.

19-bap. Qarsy barlaý qyzmetin vedomstvolyq baqylaý

1. Qarsy barlaý qyzmetin vedomstvolyq baqylaýdy uıymdastyrý jáne júrgizý qarsy barlaý qyzmetin júzege asyratyn organnyń birinshi basshysyna júkteledi.
2. Qarsy barlaý qyzmetin júzege asyratyn organnyń birinshi basshysy:

qarsy barlaý qyzmetiniń uıymdastyrylýyn, taktıkasyn, nysandary men ádisterin, tartylǵan kúshter men quraldardy;

shet memleketterdiń arnaýly qyzmetterimen, qaýipsizdik organdarymen, quqyq qorǵaý organdarymen, halyqaralyq uıymdarmen halyqaralyq yntymaqtastyqtyń uıymdastyrylýyn jáne júzege asyrylýyn;

qupııalylyqtyń jáne astyrtyn áreket etýdiń qamtamasyz etilýin baqylaýdy júzege asyrady.

20-bap. Qarsy barlaý qyzmetin júzege asyrý kezindegi prokýrorlyq qadaǵalaý

1. Qarsy barlaý qyzmetin júzege asyrý kezinde Qazaqstan Respýblıkasy zańdarynyń jáne ózge de normatıvtik quqyqtyq aktileriniń dálme-dál ári birkelki qoldanylýyn joǵary qadaǵalaýdy Qazaqstan Respýblıkasynyń Bas Prokýrory jáne ol ýákilettik bergen prokýrorlar júzege asyrady.

Ýákiletti prokýrorlardyń tizbesi qarsy barlaý qyzmetin júzege asyratyn organnyń birinshi basshysymen kelisý boıynsha Qazaqstan Respýblıkasy Bas Prokýrorynyń buıryǵymen belgilenedi.

2. Qadaǵalaýdy uıymdastyrý kezinde prokýratýra organdary men qarsy barlaý qyzmetin júzege asyratyn organnyń ózara qarym-qatynastary Qazaqstan Respýblıkasy Bas Prokýrorynyń jáne qarsy barlaý qyzmetin júzege asyratyn organnyń birinshi basshysynyń birlesken normatıvtik quqyqtyq aktisimen retteledi.
3. Qazaqstan Respýblıkasy Prezıdentiniń tapsyrmasy, jeke nemese zańdy tulǵanyń quqyqtaryn, bostandyqtary men zańdy múddelerin qarsy barlaý qyzmetin júzege asyratyn organnyń buzǵany týraly aryzy prokýratýranyń tekserýler júrgizýine negiz bolyp tabylady.
4. Qupııa kómekshiler men jasyryn qyzmetkerlerdiń jeke basy týraly málimetter, sondaı-aq qarsy barlaý qyzmetiniń uıymdastyrylýy men taktıkasy, shet memleketterdiń arnaýly qyzmetterimen, qaýipsizdik organdarymen, quqyq qorǵaý organdarymen, halyqaralyq jáne ózge de uıymdarmen qarsy barlaý qyzmeti salasynda ózara is-qımyl jasaý máseleleri boıynsha halyqaralyq yntymaqtastyq qadaǵalaý nysanasyna kirmeıdi.
5. Osy Zańnyń 11-baby 1-tarmaǵynyń 12) – 17) tarmaqshalarynda kórsetilgen qarsy barlaý is-sharalaryn júrgizýge sanksııany Qazaqstan Respýblıkasynyń Bas Prokýrory nemese ol ýákilettik bergen prokýrorlar beredi.

Sanksııa alý kezinde prokýrorǵa olardy júrgizýge negiz bolǵan, nysany men mazmuny boıynsha qupııa kómekshiler men jasyryn qyzmetkerlerdiń jeke basy týraly málimetterdiń qupııasyn ashý múmkindigin bolǵyzbaıtyn, sondaı-aq qarsy barlaý qyzmetiniń uıymdastyrylýy men taktıkasyna qatysty materıaldar usynylady.

Qarsy barlaý is-sharasynyń nátıjeleri týraly ony júrgizýge sanksııa bergen prokýror habardar etiledi.

6. Qadaǵalaý máseleleri boıynsha ýákiletti prokýrorlardyń qarsy barlaý qyzmetin júzege asyratyn organ basshylarynyń qabyldaýyna kidirissiz kirýge quqyǵy bar.
7. Ýákiletti prokýrorlar qarsy barlaý qyzmetin júzege asyratyn organnyń obektilerinde bolǵan ýaqytta olarǵa osy organda belgilengen ótkizý jáne obektishilik rejımderdiń talaptary qoldanylady.

21-bap. Qarsy barlaý qyzmetin qarjylyq jáne materıaldyq-tehnıkalyq qamtamasyz etý

Qarsy barlaý qyzmetin qarjylandyrý jáne materıaldyq-tehnıkalyq qamtamasyz etý Qazaqstan Respýblıkasynyń zańnamasynda kózdelgen tártippen júzege asyrylady.

22-bap. Osy Zańdy qoldanysqa engizý tártibi

Osy Zań alǵashqy resmı jarııalanǵan kúninen bastap eki aı ótken soń qoldanysqa engiziledi.

Qazaqstan Respýblıkasynyń Prezıdenti N.NAZARBAEV

Astana, Aqorda, 2016 jylǵy 28 jeltoqsan

№ 35-VI QRZ