Aıaz ata men Aqshaqardyń aýylynda

«Qys aıazymen, jaz samalymen» degendeı, naǵyz qys Altaıda ǵoı, shirkin! Aq qar ja­mylǵan alyp qaraǵaılary men samyrsyndary samsaǵan ný orman syrt qaraǵanda múlgip turǵanymen, ortasyna kirip barsa­ńyz, qaınaǵan qyzý tirshiligin kórer edińiz. Ásirese, Altaıdyń alqymyn súıip ósken tur­ǵyndar úshin bul – bir taýsylmas merekeli mez­gil. Omby qarda asaý úıretken qandaı, aýyz­dyǵymen alysqan attardy jegip alyp, jen­tek qardy laqtyra shanamen júıtkiseńiz, uzaq­ty kúnge jalyqtyrmas syrǵanaǵy she?!. Mine, tap osy shat-shadyman kóńil kúı tumsa taıgadaǵy «Gro­motýha» demalys baza­synda da bar. Berisi Rıdderden, árisi О́s­ke­mennen kelgen búldirshinder Aıaz ata men Aqshaqarǵa qonaqqa kelgendeı áserde qalady. О́ıtkeni, demalys orta­ly­­ǵynyń qojaıyndary dál sondaı aýra qalyp­­tas­tyryp qana qoımaı, ózderi de ertegi keıipker­lerin somdap, bala­larǵa kúlki syılap júr. Máselen, «Gro­motýha» týrıstik bazasynyń ıesi Sergeı Tretıakov Aıaz ata bolyp, bazarlyq beredi. Al jary Iýlııa uıymdastyrý sharýalarymen shuǵyldanady. Bir kezekte 120 balaǵa deıin qa­byl­daı­tyn týrıstik orta­lyqta balalarǵa jekele­gen baǵdar­lamalar qarastyrylǵan. Olar syrǵanaq teýip, oıyn oınap qana qoımaı, túrli saıystarǵa qaty­sady. Eń qyzy­ǵy, balalar Aıaz ata men Aqshaqardyń qony­syn tańdana tamashalaıdy. Qaraǵaıdan qıyp salǵan úıler syrtynan shyrsha butaq­tarymen, qyzyldy-jasyldy baýlarmen, jemis-jıdektermen ásemdelse, úı ishine kirgen­nen bastap Aıaz Ata men Aqshaqardyń sha­pa­nyn, asa taıaǵyn, arnaıy qapqa salyp qoı­ǵan oıyn­shyqtaryn, aq qar jamylǵan ede­nin, muz­dan qalanǵan peshi men qyraý basqan aına, ústel, jatyn orny syndy jı­haz­daryn baıqaısyz. Aqshaqar ba­lalarǵa óziniń qonysy týraly qyzyqty ertegiler de aıtyp beredi. – Men Zımove aýylynan kel­dim. Búgin buryn ertegilerden oqyp, teledıdar­dan ǵana kóretin Aq­shaqardyń uıyqtaıtyn bólmesin kórdim. Al Aıaz ata oıynshyq syılady, – deıdi Vladıslav esimdi búldirshin. Dýman ANASh, «Egemen Qazaqstan» Shyǵys Qazaqstan oblysy