Ystanbulda qarýly shabýyldan 35 adam qaza tapty

Túrkııanyń Ystanbul qalasynda ornalasqan Reina túngi klýbyna shabýyl jasalyp, kem degende 35 adam qaza tapty. Sondaı-aq, 40-tan astam turǵyn túrli deńgeıde jaraqat aldy. Bul týraly TASS aqparat agenttigi habarlady. «Bul terakt. Jańa jyl merekesin kóńildi qarsy alýǵa jınalǵandarǵa aıaýsyz oq jaýdyrdy. Mert bolǵandardyń bireýi – polısııa qyzmetkeri», – dedi qala meri Vasıp Shahın. Ortakeı aýdanynda ornalasqan ǵımaratqa Aıaz atanyń kıimin kıgen belgisiz eki adam qarýly shabýyl jasady. Reuters agenttiginiń aqparyna sáıkes, bul jergilikti ýaqyt boıynsha 01:15 kezinde oryn alǵan. Túrkııanyń NTV telearnasynyń málimeti boıynsha, túngi kóńil kóterý ornynda 800-ge jýyq adam bolǵan. Qazirgi ýaqytta oqıǵa ornyna ondaǵan jedel járdem jáne polısııa kólikteri jiberildi. Aıta keteıik, 11 jeltoqsan kúni Ystanbulda «Beshıktash» pen «Býrsaspor» komandalarynyń arasyndaǵy matchtan keıin Vodafone Arena stadıonynyń mańynda joıqyn jarylys bolǵan. Saldarynan 40-qa jýyq adam opat bolyp, 155 turǵyn jaraqat alǵan.