Elbasy Shahan kentindegi tótenshe jaǵdaıǵa baılanysty kóńil aıtty

Qazaqstan Respýblıkasynyń Prezıdenti Nursultan Nazarbaev Qaraǵandy oblysynyń Shahan kentinde bolǵan tótenshe jaǵdaıǵa baılanysty kóńil aıtty, dep habarlaıdy Aqordanyń baspasóz qyzmeti. Memleket basshysy Qaraǵandy oblysy Shahan kentinde kóp páterli úıdiń kireberisi qulap, adam shyǵynyna ákep soqtyrǵany týraly habardy zor kúızelispen qabyldady. Qazaqstan Prezıdenti qaza bolǵandardyń týystary men jaqyndaryna kóńil aıtyp, zardap shekkenderdiń tezirek saýyǵyp ketýine tilektestik bildirdi. Elbasy Qaraǵandy oblysynyń ákimine, sondaı-aq ýákiletti memlekettik organdarǵa zardap shekken turǵyndardyń bárine jan-jaqty kómek kórsetý úshin tıisti sharalar qabyldap, tótenshe oqıǵanyń sebebin anyqtaý jóninde tapsyrma berdi. Eske sala keteıik, 1 qańtar kúni saǵat 22:40-ta Qaraǵandy oblysy TJD qutqarý bólimine Shahtınsk qalasyna qarasty Shahan kentindegi kópqabatty úıdiń bir bóligi opyrylyp túskeni týraly qońyraý shalynǵan. Oqıǵa ornyna shuǵyl túrde TJD qutqarýshylary jóneltilip, turǵyndar qaýipsiz jerge kóshirildi. Áýeli 1 adamnyń máıiti úıindi astynan shyǵarylǵan bolatyn. Keıin ekinshi turǵynnyń denesi úıindi astynan tabyldy. Qazirgi ýaqytqa deıin úıindi astynan 9 kóz jumǵan adamnyń denesi arshyp alyndy. Onyń úsheýi er adam, úsheýi áıel, úsheýi bala. Balanyń bireýi 2016 jylǵy,ekinshisi 2010 jylǵy.