Batyr mektebiniń batyr oqýshysy

Búginde qarshadaı Ǵalymjandy mań­ǵystaýlyqtar batyr bala retinde jaqsy tanıdy. Qarashanyń qara sýyǵynda mektepten qaıtyp kele jatqan ol taıaý mańdaǵy úıden shoshyna aıqaılaǵan balalardyń daýysyn estıdi. Mán-jaıdy birden túsinedi – úı órtenip jatyr, ishinde balalar qalǵan bolýy múmkin. Osy oımen tútini býdaqtaǵan úıge júgire jetken Ǵalymjan aldymen terezeniń toryn julyp alady da, qoıý tútin qushaǵyndaǵy úıge qoıyp ketedi. Úı ishinde tunshyǵa jylaǵan alty, bes jáne tórt jasar úsh balany alyp shyǵyp, óz úıine alyp keledi. Dereý jyly kórpemen orap, sol sátte jumystan kelgen ákesine órt sóndirýshilerge habar berýin suraıdy. Dabyl túsken soń asyǵa jetken órt sóndirýshiler tilsiz jaý­dy aýyzdyqtap úlgeredi. О́rt sebebi – úlkenderdiń qaraýynsyz qalǵan úsh sábı sirińkemen oınap, oınynan ot shyǵarǵan eken. Ekinshi dúnıejúzilik soǵysta eren erlik kórsetip, Keńes Odaǵynyń Baty­ry atanǵan Jumaǵalı Qaldyqaraev atamyzdyń aty berilgen mekteptiń 8-synybynda oqıtyn Ǵalymjan bul erlikke shyrqyraǵan sábılerdi qutqarý úshin barǵanyn jáne ol onyń azamattyq boryshy ekenin aıtady. «Batyr atyndaǵy mekteptiń batyr oqýshysy» deısiń osyndaıda rızalyqpen. Tótenshe jaǵdaılar departamentiniń arnaıy syılyǵyn alyp, tósbelgisin keýdesine taqqan Ǵalymjan 2016 jyldyń qorytyndysynda «Jyl adamy» atanyp, «Jyl erligi» atalymy boıynsha marapattaldy. Jetkinshekke syıdy óz qolymen tapsyrǵan Mańǵystaý oblysynyń ákimi A.Aıdarbaev onyń erlikke toly isin, adamgershiligi men eljandylyǵyn ózgelerge úlgi bolýǵa laıyq dep atap ótti. Mańǵystaýlyqtar Ǵalymjanǵa rıza­shylyqtaryn bildirip, alǵysqa toly lebizderin arnaýda. Gúlaıym ShYNTEMIRQYZY, «Egemen Qazaqstan» Mańǵystaý oblysy Beıneý aýdany