Daǵdarys ortalyǵy ashyldy

Oblysta ana men balany qorǵaý baǵytynda júıeli jumystar júrgizilýde. Buǵan deıin Aqtóbe qalasynda analar men jasóspirimder úıi jumys isteıtin edi. El táýelsizdiginiń 25 jyldyǵy qarsańynda «Meıirim» jastardy áleýmettik beıimdeý ortalyǵy paıdalanýǵa berilse, Jańa jyl qarsańynda áıelder men balalarǵa arnalǵan daǵdarys ortalyǵy ashyldy. Jobany «Aq-Rýno» JShS memleket-jekemenshik áriptestigi aıasynda júzege asyrdy. Bul maqsatqa qamqorshylyq keńes ókilderi men mesenat Asqarbek Mamyrbaev 300 mıllıon teńge bóldi. Kásipker munyń aldynda sport keshenin paıdalanýǵa berip, aqtóbelikterdiń shynaıy alǵysyna bólengen bolatyn. Bul joly aýmaǵy 2980 sharshy metr bolatyn úsh qabatty úıdiń qurylysyn 2016 jylǵy qazan aıynda aıaqtap, jańa jyl qarsańynda taǵdyrdan aýyrtpalyq kórgen analar men balalardyń ıgiligine usyndy. Ortalyqta 60 adamǵa turaqty ju­mys orny ashyldy. Olardyń arasynda psıholog, áleýmettanýshy, zańger, eńbek nusqaýshysy sekildi mamandar bar. Olar áleýmettik-psıhologııalyq bólimderde jumys jasamaq. Munda tártip máselesine erekshe kóńil bólingen. Ortalyqta kir jýý orny, sport zal, ashana jumys isteıdi. Endi psıhologııalyq-turmystyq zorlyqqa tap bolǵan, jaqyndarynan aıyrylǵan áıelder, múgedekter, jal­ǵyzbasty jáne kámelet jasqa tolmaǵan balalary bar analar, úıi órtke oranǵan otbasylar, balalar úıi men mektep-ınternattarynyń túlekteri, qıyn jaǵdaıǵa tap bolǵan jasóspirim qyzdar jáne basqalar osy jerden pana tabady. Oblys ákimi B.Saparbaevtyń aıtýyn­sha, daǵdarys ortalyǵyna kelýge tek analar men balalar ǵana emes, sonymen qatar, tótenshe jaǵdaılardan zardap shekkenderge de múmkindik bar. Daǵdarys ortalyǵyndaǵy bólmeler keń de jaryq. Ár bólmede tórt adamnan ornalasady. Sý jańa jıhazdar qoıylǵan. Bir sózben aıtqanda, ómir súrýge qajetti barlyq jaǵdaı ja­salǵan. Satybaldy SÁÝIRBAI, «Egemen Qazaqstan» AQTО́BE