Qysqa qashyqtyqqa júgirýdiń has sheberi

Romannyń qysqy sport túrleri arasynan konkıdi tańdaýy kezdeısoq emes. Teteles eki aǵasy jastaıynan sporttyń osy túrimen aınalysyp, boıy sıdam, denesi juqaltań toǵyz jastaǵy inileriniń de qyzyǵýshylyǵyn oıatqan. Sodan beri ol konkımen qysqa qashyqtyqqa júgirýge ábden mamandanyp, búginde elimizdiń mańdaıaldy maıtalman sportshysy qataryna qosylǵan. Halyqaralyq dárejedegi sport sheberiniń úzdik jetistikterin sanamalap shyǵýdyń ózi ońaı emes. Qazaqstannyń birneshe dúrkin chempıony atanǵanyn bylaı qoıǵanda, baıraqty básekelerde de talaı ret olja saldy. 2014 jyly Sochı Olımpıadasynda 500 metr qashyqtyqta jetinshi, 1000 metrlikte on úshinshi satydan kóringen sportshy densaýlyǵyna baılanysty Germanııa men Gollandııada ótken Álem kýbogynyń kezeńdik syndaryna qatysa almaǵan. О́ıtkeni, onyń aldynda eki ret tizesine, buǵanasyna, sińiri sozylǵan aıaǵyna ota jasatyp, birneshe aı boıy sporttan qol úzýine týra kelgen. – Úzdiksiz jattyǵýlar kezinde alǵan jaraqattar syr berip, sharasyzdyqtan eshteńe jasaı almaı, tyǵyryqqa tirelgen kezderim áli kúnge esimde. Sportta mundaı sátsizdikter jıi kezdesedi. Oǵan nalysań, kúırektikke berilseń, dittegen mejege jete almaı­syń. Kerisinshe, qatelikterden sabaq ala otyryp, alǵa qoıǵan maq­sattarǵa jetýge bolatynyn ómirlik tájirıbeden jaqsy bilemin. Sol kezde kelesi maýsymdarǵa tyńǵylyqty daıyndyq jasaý úshin biraz kúsh jınap alý týraly bapkerler durys sheshim alǵan edi, – deıdi R.Krech. Qos taraptyń birden-bir durys qadam jasaǵandaryn keıingi jarys­tar aıqyn baıqatty. Munyń aldynda AQSh-tyń Solt-Leık-Sıtı qalasynda uıymdastyrylǵan Álem kýbogynyń tórtinshi kezeńinde 500 metr qashyqtyqty 34, 82 sekýndta júgirip ótip, úshinshi oryn alǵan Romannyń aldynda nátıjeni osy deńgeıden tómendetpeý mindeti turdy. Ol osynda dańqty jerlesi Vadım Shaqshaqbaevtyń 13 jyldan beri ózgerissiz turǵan rekordyna ózgeris engizdi. – 2008-2009 jyldary jas­óspirimder arasyndaǵy álem chempıony byltyr kúzde Aspanasty elinde jalaýy jelbiregen Álem kýbogynyń «A» dıvızıonynda kon­kımen júgirýde tamasha óner kórsetip, máre syzyǵyn birinshi bolyp qıdy. 500 metrlik qashyqtyqta álem jeńimpazy, reseılik Pavel Kýlı­jnıkov pen gollandııalyq Kaı Ferbaıdy qapy qaldyrdy. Osylaısha 21 jyl buryn Davosta Vadım Shaqshaqbaevtyń utyp alǵan altyn júlde qoryn tolyqtyryp, kórsetkishin de jańartty. Roman tózimdilik, jigerlilik, maqsat­kerlik qa­sıetteri ar­qa­synda talaı azýly qarsylas- ­t­aryn shań qap­t­yryp júr. Al­matyda ótetin halyqaralyq Ýnı­­versıadaǵa úki­lep qosyp otyrmyz. Ne­gizgi úmit­kerlerimizdiń biri. Qazir babynda, ázirligi jaqsy, – deıdi oblystyq dene shynyqtyrý jáne sport basqarmasynyń basshysy Rýslan Esenalın. Azııa chempıony, Vankýver men Sochıdegi Olımpııalyq oıyndarda el namysyn qorǵaǵan Romannyń basynan mynandaı «qyzyq» jaǵdaı da ótken. Bir kezderi onyń otbasyna jer telimi, qosymsha qurylys alańdary bar bas­panasyna súrilý qaýpi tóngen. Oǵan aıyrbas retinde merdiger uıymdar tarapynan qurqyltaıdyń uıasyndaı bir bólmeli páter usynylǵan. Osyndaı qıyn jaǵdaıda qalǵanda oblys ákimdigi eki bólmeli páterdiń kiltin tabystaǵan. Sanaly ǵumyryn kásibı sportqa arnap kele jatqan konkıshige jergilikti bılik qoldaý kórsetken. Olaı bolsa, Roman Krech te qazaq­stan­dyqtardy jerge qaratpaıdy degen úmittemiz. О́mir ESQALI, «Egemen Qazaqstan» PETROPAVL