Sal aýrýyna arnalǵan qondyrǵy

Múmkindigi shekteýli jannyń ishki jan-dúnıesin jáne oǵan qandaı jolmen qol ushyn berý kerek ekendigin tek osy toptyń ókili tap basa alatyn shyǵar. Osy oraıda múmkindigi shekteýli jan, esimi Oral óńirine keńinen tanymal kásipker Birjan Qojaqovtyń sal aýrýyna ushyraǵan balalarǵa arnalǵan qondyrǵy oılap shyǵarǵanyna da osyndaı izgilik turǵysynan qaraǵan jón sekildi. Ol dene turqyn ıkemge keltirý úshin ár túrli  arnaýly qondyrǵylar qajet dep esepteıdi. Birjan bul oıyn tek oı túrinde qaldyrmaı, tikeleı iske asyrdy. Ashyǵyn aıtqanda, elimizde mundaı qurylǵy shyǵarylmaıdy. Bul jóninen aldymen Reseıge jáne Túrkııa men Germanııaǵa qa­raılap kelgenimizdi jasyryp qaı­temiz. Al olar qazaqshalap aıtqanda, ákesiniń qunyn su­raı­dy. Ony turmysy tómen, qa­rapaıym otbasylar men ata-ana­lar­dyń qaltasy kótere bermeıdi. Sondyqtan B.Qojaqov osy olqy­lyqtardyń ornyn toltyrý­dy kózdep, oılaǵan maqsatyna jet­ti. Aıaq-qoldy tikteýge jáne by­lq-sylq etken deneni ıkemge keltirýge kómegi tıetin qon­dyr­ǵyǵa ol Reseı óndirisiniń keı­bir ólshemderin paıdalanǵan. Bi­raq ony ájeptáýir jetildirgen, oǵan fıksator qosqan. Sóıtip, ál­de­qaıda ıkemdi, retteýshi te­tik­teri jetildirilgen qon­dy­r­ǵ­yny oılastyryp shyǵardy. So­ǵan qaramastan balalardyń sal aýrýyn emdeýge arnalǵan otandyq qondyrǵynyń baǵasy ımporttyq taýarlarmen sa­lys­tyrǵanda, 3-4 ese arzan. Qazaq­stan­dyq qondyrǵynyń taǵy bir erek­she­ligi, sal aýrýyna ushy­ra­­­ǵan sábıler men balalardy qo­sym­sha qondyrylǵan tetik­tiń kó­megi arqyly jatqan je­ri­nen túregeletin jaǵdaıǵa aýys­ty­rýǵa bolady. Osyndaı aı­ryq­­sha stanoktardyń alǵash­qy partııasyn kásipker Oral­da­ǵy múmkindigi shekteýli bala­lar­ǵa arnalǵan ınternatqa attan­dyrǵan. – Meniń maqsatym – sal derti­ne tap bolǵan balalardyń aıaq­taryn tik basyp ketýi úshin ornynan kóterilýge kómek berý. Osy turǵyda biz oılap shyǵarǵan apparat-retteýshi olarǵa óz sep­ti­gin tıgize alady degen oıdamyz, – deıdi gazet tilshisine Birjan Qojaqov. Temir QUSAIYN, «Egemen Qazaqstan» ORAL