1-taraý. JALPY EREJELER 1-bap. Osy Zańda paıdalanylatyn negizgi uǵymdar Osy Zańda mynadaı negizgi uǵymdar paıdalanylady: 1) volonter – volonterlik qyzmetti júzege asyratyn jeke tulǵa; 2) volonterler toby – osy Zańda belgilengen normalar qoldanylatyn, volonterlik qyzmetti birlesip júzege asyrý maqsatynda qurylǵan jeke tulǵalardyń tirkelmegen erikti qoǵamdastyǵy; 3) volonterlik aksııa – volonterlik uıym jáne (nemese) volonterler jáne (nemese) volonterler toby oryndaıtyn naqty áleýmettik baǵyttaǵy, qoǵamdyq paıdaly mindetti sheshýge baǵyttalǵan is-shara; 4) volonterlik baǵdarlama (joba) – volonterlik uıym jáne (nemese) volonterler jáne (nemese) volonterler toby oryndaıtyn is-sharalar men kútiletin nátıjeler kórsetile otyryp, áleýmettik baǵyttaǵy, qoǵamdyq paıdaly mindetterdi sheshýge baǵyttalǵan júıeli sharalar kesheni; 5) volonterlik qyzmet – jeke jáne (nemese) zańdy tulǵalardyń múddelerinde óteýsiz negizde júzege asyrylatyn, áleýmettik baǵyttaǵy erikti, erik qalaýymen oryndalatyn qoǵamdyq paıdaly qyzmet; 6) volonterlik qyzmet salasyndaǵy ýákiletti organ – memleket pen azamattyq sektordyń ózara is-qımyly salasyndaǵy ortalyq atqarýshy organ; 7) volonterlik qyzmetti esepke alý tizilimi – volonterler, volonterler toptary, volonterlik uıymdar, volonterlik qyzmetti úılestirýshiler men uıymdastyrýshylar, volonterlik baǵdarlamalar (jobalar), volonterlik aksııalar, olardyń ótkizilý orny men ýaqyty, olardy ótkizýge qoıylatyn talaptar týraly málimetter qamtylǵan derekter tizilimi; 8) volonterlik qyzmetti uıymdastyrýshy – volonterlerdi ózi derbes ne volonterlik uıymdar arqyly tartatyn ortalyq jáne jergilikti atqarýshy organdar, jergilikti ózin-ózi basqarý organdary, ózge de uıymdar, sondaı-aq jeke tulǵalar; 9) volonterlik uıym – Qazaqstan Respýblıkasynyń zańdaryna sáıkes qurylǵan jáne volonterlik qyzmetti júzege asyratyn kommersııalyq emes uıym (dinı birlestikterdi, tutyný kooperatıvterin, sondaı-aq saıası partııalar nemese kásiptik odaqtar nysanyndaǵy qoǵamdyq birlestikterdi qospaǵanda). 2-bap. Osy Zańnyń retteý nysanasy Osy Zańda kózdelgen nysandar men túrlerde óteýsiz negizde jumystardy oryndaý, qyzmetter kórsetý arqyly qoǵamdyq paıdaly qyzmetti erikti júzege asyrýǵa baılanysty týyndaıtyn qoǵamdyq qatynastar osy Zańnyń retteý nysanasy bolyp tabylady. 3-bap. Qazaqstan Respýblıkasynyń volonterlik qyzmet týraly zańnamasy 1. Qazaqstan Respýblıkasynyń volonterlik qyzmet týraly zańnamasy Qazaqstan Respýblıkasynyń Konstıtýsııasyna negizdeledi, osy Zańnan jáne Qazaqstan Respýblıkasynyń ózge de normatıvtik quqyqtyq aktilerinen turady. 2. Eger Qazaqstan Respýblıkasy ratıfıkasııalaǵan halyqaralyq shartta osy Zańda kózdelgennen ózgeshe qaǵıdalar belgilense, onda halyqaralyq sharttyń qaǵıdalary qoldanylady. 4-bap. Volonterlik qyzmettiń maqsattary men mindetteri, negizderi 1. Volonterlik qyzmettiń maqsattary: 1) jeke jáne zańdy tulǵalarǵa kómek kórsetý, azamattardyń densaýlyǵyn saqtaý, qorshaǵan ortany qorǵaý jáne saqtaý, dene shynyqtyrýdy jáne sportty damytý, sondaı-aq qoǵamdyq ıgilikterdi qamtamasyz etýge baǵyttalǵan basqa da maqsattar; 2) qoǵamda azamattyq ustanymdy, ózin-ózi uıymdastyrýdy, áleýmettik jaýapkershilik, yntymaq, ózara kómek jáne meıirimdilik sezimin qalyptastyrý bolyp tabylady. 2. Volonterlik qyzmettiń mindetterine: 1) qoǵamǵa áleýmettik mindetterdi sheshýge kómektesý; 2) volonterlik qyzmetti uıymdastyrýǵa baǵyttalǵan azamattyq bastamalardy damytý jáne qoldaý; 3) halyqtyń ártúrli nysanaly toptarymen jáne sanattarymen ózara is-qımyl jasaýda volonterlik qyzmettiń rólin arttyrý jónindegi sharalardy ázirleý jáne iske asyrý; 4) volonterlerge konsýltasııa berýdi, aqparat berýdi jáne ádistemelik súıemeldeýdi uıymdastyrý jáne júrgizý; 5) volonterler toptaryn – joba is-sharalaryn oryndaýshylardy jasaqtaý; 6) volonterlik qyzmetke oqytýdy uıymdastyrý jatady. 3. Volonterlik qyzmet saıası partııalardy jáne dinı birlestikterdi qoldaýǵa baǵyttalmaıdy. 4. Kez kelgen nysandar men kórinisterdegi terrorızmdi, ekstremızmdi jáne separatızmdi kózdeıtin volonterlik qyzmetke tyıym salynady. 5. Áskerılendirilgen qurylymy, nysany, arnaýly aıyrym belgileri, ánurandary, jalaýlary, jalaýshalary, ishki tártip pen basqarýdyń erekshe jaǵdaılary, qarýy, sonyń ishinde ımıtasııalyq qarýy bar áskerılendirilgen quralymdar úlgisi boıynsha volonterlik uıymdardy Qazaqstan Respýblıkasynyń aýmaǵynda qurýǵa tyıym salynady. 5-bap. Volonterlik qyzmettiń qaǵıdattary 1. Volonterlik qyzmet: 1) volonterler qyzmetiniń óteýsizdigi, eriktiligi, teń quqyqtylyǵy men zańdylyǵy; 2) osy Zańda belgilengen volonterlik qyzmettiń maqsattaryn, nysandaryn, túrleri men ádisterin aıqyndaýdaǵy, baǵyttaryn tańdaýdaǵy erkindik; 3) volonterlik qyzmet týraly aqparattyń jarııalylyǵy jáne jalpyǵa birdeı qoljetimdiligi; 4) volonterlik qyzmetke qatysýshy adamdardyń yntymaǵy, adaldyǵy men yntymaqtastyǵy; 5) ómir men densaýlyq qaýipsizdigi; 6) osy saladaǵy teń quqyly jáne ózara tıimdi halyqaralyq yntymaqtastyq qaǵıdattaryna sáıkes júzege asyrylady. 2. Volonterlik qyzmet memlekettik organdardyń jáne jergilikti ózin-ózi basqarý organdarynyń óz ókilettikterin júzege asyrýy boıynsha qyzmetin almastyrmaıdy. 6-bap. Volonterlik qyzmettiń nysandary men túrleri 1. Volonterlik qyzmet: 1) jeke-dara volonterlik qyzmet; 2) volonterler toby quramyndaǵy volonterlik qyzmet; 3) volonterlik uıym arqyly volonterlik qyzmet nysanynda júzege asyrylýy múmkin. 2. Volonterlik qyzmettiń negizgi túrleri: 1) áleýmettik kómek, halyqtyń áleýmettik jaǵynan qorǵalmaǵan toptaryna, ómirlik qıyn jaǵdaıǵa tap bolǵan balalarǵa kómek kórsetýge qatysý; 2) qarttarǵa, múgedekterge áleýmettik qyzmet kórsetý, múgedekter úshin ortanyń qoljetimdiligin uıymdastyrý, jetim balalardy jáne ata-anasynyń qamqorlyǵynsyz qalǵan balalardy áleýmettik beıimdeý, ıntegrasııalaý jáne tárbıeleý jónindegi jumysqa járdemdesý; 3) dúleı zilzalalar, ekologııalyq, tehnogendik jáne basqa da apattar, áleýmettik shıelenister, jazataıym oqıǵalar saldarynan zardap shekken adamdarǵa, quqyq buzýshylyqtar qurbandaryna, bosqyndarǵa jáne sharasyzdan qonys aýdarýshylarǵa, sondaı-aq syrttan jasalatyn kómek pen qoldaýǵa muqtaj adamdardyń ózge de sanattary men toptaryna kómek kórsetýge qatysý; 4) ortalyq jáne jergilikti atqarýshy organdarǵa tótenshe jaǵdaılardyń aldyn alýǵa jáne saldarlaryn joıýǵa járdem kórsetý; 5) habarsyz ketken adamdardy, Uly Otan soǵysy men oqshaý soǵystarǵa qatysýshylardyń súıekterin izdeýge qatysý; 6) qorshaǵan ortany qorǵaýǵa jáne saqtaýǵa, aýmaqtardy abattandyrýǵa qatysý; 7) tarıhı jáne mádenı murany saqtaý, tarıhı-mádenı mekendeý ortasyn qalpyna keltirý men saqtaý úshin múmkindikter jasaýǵa qatysý; 8) bilim berýdi, ǵylymdy, mádenıetti damytýǵa, bilimdi tanymal etýge, ınnovasııalardy damytýǵa qatysý; 9) dene shynyqtyrýdy, sport pen belsendi demalysty damytý men tanymal etýge, óńirlik, óńiraralyq, respýblıkalyq qoǵamdyq jáne halyqaralyq dene shynyqtyrý jáne sporttyq is-sharalardy uıymdastyrý men ótkizýge qatysý; 10) salamatty ómir saltyn nasıhattaý boıynsha jumys júrgizý, áleýmettik máni bar aýrýlardyń taralýyna qarsy is-qımyl jónindegi profılaktıkalyq jumysty uıymdastyrý jáne júrgizý; 11) eger Qazaqstan Respýblıkasynyń zańdarynda ózgeshe belgilenbese, volonterlik lagerler qyzmetin qosa alǵanda, óńirlik, óńiraralyq, respýblıkalyq jáne halyqaralyq mádenı, buqaralyq jáne basqa da oıyn-saýyq jáne qoǵamdyq is-sharalardy uıymdastyrý men ótkizýge qatysý, arheologııalyq qazbalarǵa, tarıhı ǵımarattardyń qasbetterin qalpyna keltirýge, múmkindigi shekteýli balalarǵa arnalǵan jazǵy saýyqtyrý lagerleriniń jumysyna, kongress-kórme qyzmetine qatysý; 12) halyqtar arasyndaǵy tatýlyqty, dostyq pen kelisimdi nyǵaıtýǵa, áleýmettik, ultaralyq, etnosaralyq, dinı shıelenisterdi bolǵyzbaýǵa qatysý; 13) volonterlik qyzmettiń Qazaqstan Respýblıkasynyń zańnamasyna qaıshy kelmeıtin ózge de túrleri bolyp tabylady. 2-taraý. VOLONTERLIK QYZMET SALASYNDAǴY MEMLEKETTIK RETTEÝ 7-bap. Qazaqstan Respýblıkasy Úkimetiniń volonterlik qyzmet salasyndaǵy quzyreti Qazaqstan Respýblıkasynyń Úkimeti: 1) volonterlik qyzmet salasyndaǵy memlekettik saıasattyń negizgi baǵyttaryn ázirleıdi jáne olardyń júzege asyrylýyn uıymdastyrady; 2) ózine Konstıtýsııamen, Qazaqstan Respýblıkasynyń zańdarymen jáne Qazaqstan Respýblıkasy Prezıdentiniń aktilerimen júktelgen ózge de fýnksııalardy oryndaıdy. 8-bap. Qazaqstan Respýblıkasynyń ortalyq atqarýshy organdarynyń volonterlik qyzmet salasyndaǵy quzyreti 1. Qazaqstan Respýblıkasynyń ortalyq atqarýshy organdary óz quzyreti sheginde: 1) volonterlik qyzmet salasyndaǵy memlekettik saıasatty iske asyrady; 2) volonterlik qyzmetti qoldaý men yntalandyrý tetikterin ázirleıdi; 3) volonterlik qyzmet salasynda halyqaralyq yntymaqtastyqty damytýǵa jáne tájirıbe almasýǵa járdemdesedi; 4) volonterlik baǵdarlamalardy (jobalardy) iske asyrýǵa qatysýǵa jáne volonterlik aksııalardy ótkizýge volonterlik uıymdar men volonterlerdi tartý tártibi jóninde usynymdar ázirleıdi; 5) volonterlik qyzmet salasynda jeke, zańdy tulǵalarmen jáne memlekettik organdarmen ózara is-qımyl jasaıdy; 6) volonterlik baǵdarlamalardyń (jobalardyń) jáne volonterlik aksııalardyń iske asyrylýynyń monıtorıngin júzege asyrady; 7) volonterlik qyzmet praktıkasyn taldaıdy, jıyntyqtaý men jınaqtap qorytýdy júzege asyrady; 8) volonterlik qyzmetti esepke alý tizilimderin júrgizedi; 9) osy Zańda, Qazaqstan Respýblıkasynyń ózge de zańdarynda, Qazaqstan Respýblıkasy Prezıdentiniń jáne Qazaqstan Respýblıkasy Úkimetiniń aktilerinde kózdelgen ózge de ókilettikterdi júzege asyrady. 2. Ortalyq atqarýshy organdar ózderiniń ınternet-resýrstarynda volonterlik qyzmetti esepke alý tizilimderin ornalastyrady. 9-bap. Volonterlik qyzmet salasyndaǵy ýákiletti organnyń quzyreti Volonterlik qyzmet salasyndaǵy ýákiletti organ: 1) volonterlik qyzmet salasyndaǵy memlekettik saıasatty iske asyrady; 2) Qazaqstan Respýblıkasyndaǵy volonterlik qyzmet týraly aqparatty jıyntyqtaý men jınaqtap qorytýdy júzege asyrady; 3) volonterlik qyzmetti esepke alý tizilimin júrgizý jónindegi úlgilik qaǵıdalardy ázirleıdi jáne bekitedi; 4) volonterlik baǵdarlamalardy (jobalardy) iske asyrýǵa qatysýǵa jáne volonterlik aksııalardy ótkizýge volonterlik uıymdar men volonterlerdi tartý tártibi jóninde usynymdar ázirleıdi; 5) volonterlik baǵdarlamalardyń (jobalardyń) jáne volonterlik aksııalardyń iske asyrylýynyń monıtorıngin júzege asyrýdyń úlgilik qaǵıdalaryn ázirleıdi jáne bekitedi; 6) volonterlik qyzmet salasynda jeke, zańdy tulǵalarmen jáne memlekettik organdarmen ózara is-qımyl jasaıdy; 7) volonterlik qyzmettiń monıtorıngin júzege asyrý qaǵıdalaryn ázirleıdi jáne bekitedi; 8) osy Zańda, Qazaqstan Respýblıkasynyń ózge de zańdarynda, Qazaqstan Respýblıkasy Prezıdentiniń jáne Qazaqstan Respýblıkasy Úkimetiniń aktilerinde kózdelgen ózge de ókilettikterdi júzege asyrady. 10-bap. Oblystardyń, respýblıkalyq mańyzy bar qalalardyń jáne astananyń, aýdandardyń, oblystyq mańyzy bar qalalardyń jergilikti atqarýshy organdarynyń quzyreti 1. Oblystardyń, respýblıkalyq mańyzy bar qalalardyń jáne astananyń jergilikti atqarýshy organdary óz quzyreti sheginde: 1) volonterlik qyzmet salasyndaǵy memlekettik saıasatty iske asyrady; 2) volonterlik qyzmet salasynda jeke, zańdy tulǵalarmen jáne memlekettik organdarmen ózara is-qımyl jasaıdy; 3) volonterlik qyzmettiń monıtorıngin júzege asyrady; 4) volonterlik qyzmet praktıkasyn taldaýdy, jıyntyqtaý men jınaqtap qorytýdy júzege asyrady; 5) jergilikti memlekettik basqarý múddelerinde Qazaqstan Respýblıkasynyń zańnamasymen jergilikti atqarýshy organdarǵa júkteletin ózge de ókilettikterdi júzege asyrady. 2. Aýdandardyń, oblystyq mańyzy bar qalalardyń jergilikti atqarýshy organdary óz quzyreti sheginde: 1) volonterlik qyzmet salasyndaǵy memlekettik saıasatty iske asyrady; 2) volonterlik qyzmet salasynda jeke, zańdy tulǵalarmen jáne memlekettik organdarmen ózara is-qımyl jasaıdy; 3) volonterlik qyzmettiń monıtorıngin júzege asyrady; 4) volonterlik qyzmet praktıkasyn taldaýdy, jıyntyqtaý men jınaqtap qorytýdy júzege asyrady; 5) volonterlik qyzmet júıesin damytý jóninde sharalar qoldanady; 6) jergilikti memlekettik basqarý múddelerinde Qazaqstan Respýblıkasynyń zańnamasymen jergilikti atqarýshy organdarǵa júkteletin ózge de ókilettikterdi júzege asyrady. 11-bap. Jergilikti ózin-ózi basqarý organdarynyń volonterlik qyzmet salasyndaǵy ókilettikteri Jergilikti ózin-ózi basqarý organdarynyń volonterlik qyzmet salasyndaǵy ókilettikterine: 1) volonterlik qyzmet salasyndaǵy memlekettik saıasatty júzege asyrýǵa qatysý; 2) jastardyń jappaı volonterlik aksııalaryn qoldaýdy júzege asyrý; 3) volonterlik uıymdardyń aqparattyq júıesinde volonterlik baǵdarlamalar (jobalar) jáne aksııalar týraly aqparatty ornalastyrý; 4) Qazaqstan Respýblıkasynyń zańnamasynda aıqyndalǵan ózge de ókilettikter jatady. 3-taraý. VOLONTERLIK QYZMETTI UIYMDASTYRÝ JÁNE QOLDAÝ 12-bap. Volonter 1. Volonterlik qyzmetti on segiz jasqa tolǵan jeke tulǵalar júzege asyra alady. 2. On segiz jasqa tolmaǵan jeke tulǵalar volonterlik qyzmetti olardyń densaýlyǵyna jáne ımandylyq turǵysynan damýyna zııan keltirmeıtin jáne oqý prosesin buzbaıtyn jaǵdaıda júzege asyrady. On tórt jasqa tolmaǵan jeke tulǵalar volonterlik qyzmetke ata-anasynyń (ózge de zańdy ókilderiniń) jazbasha kelisimimen nemese olarmen birge ilesip júrýimen qatysady. Tótenshe jaǵdaılardyń aldyn alý jáne saldarlaryn joıý jónindegi jumystardy júrgizýge on segiz jastan asqan volonterler ǵana jiberiledi. 3. Volonterdiń: 1) osy Zańda, Qazaqstan Respýblıkasynyń ózge de zańnamalyq aktilerinde belgilengen talaptardy eskere otyryp, volonterlik qyzmetti júzege asyrýǵa óziniń qatysýyn erkin tańdaýǵa; 2) eger volonter men volonterlik uıym arasynda jasalǵan azamattyq-quqyqtyq shartta ózgeshe kózdelmese jáne bul jeke tulǵalardyń ómiri men densaýlyǵyna tikeleı zııan keltirýge, múliktik nuqsannyń týyndaýyna alyp kelmese, volonterlik qyzmetti kez kelgen ýaqytta erkin toqtatýǵa; 3) volonterlik qyzmettiń maqsattary, mindetteri jáne mazmuny týraly, volonterlik qyzmetti uıymdastyrýshy týraly, volonterlik uıym, onyń basshylyǵy, qyzmetiniń qaǵıdattary týraly jáne uıymdyq qurylysy týraly anyq aqparat alýǵa; 4) volonterlik baǵdarlamalardy (jobalardy) oryndaýǵa jáne volonterlik aksııalar men volonterlik qyzmetti júzege asyrý úshin uıymdastyrylatyn, bastama jasalatyn nemese usynylatyn ózge de is-sharalardy ótkizýge; 5) volontermen jazbasha nysanda jasalǵan azamattyq-quqyqtyq shartta kózdelgen jaǵdaıda, arnaýly kıim alýǵa jáne jol júrýge, turýǵa, tamaqtanýǵa, qajetti jeke qorǵanysh quraldaryn, qural-saımandardy satyp alýǵa arnalǵan shyǵystardy jáne qaýipti, zııandy jáne qolaısyz óndiristik faktorlarmen baılanysty jumystardy oryndaý kezindegi ózge de shyǵyndardy ótetýge; 6) volonterlik qyzmetti uıymdastyrýshydan jáne volonterlik uıymnan usynym hattardy alýǵa; 7) Qazaqstan Respýblıkasynyń zańdarynda belgilengen tártippen júrgizilgen jaǵdaıda, aqparattyq resýrstarǵa ózi júzege asyrǵan volonterlik qyzmet týraly, onyń júzege asyrylý orny men saǵat sany, kótermeleýler, ózi alǵan qosymsha daıyndyq, qoldaý jáne kótermeleý sharalaryn alý quqyǵy týraly málimetterdi, ózge de málimetterdi engizýge; 8) volonterlik qyzmetti júzege asyrý úshin bilim berý, densaýlyq saqtaý, áleýmettik qorǵaý, mádenıet, sport uıymdaryna jáne tabıǵat qorǵaý men orman mekemeleriniń aýmaǵyna osy uıymdardyń basshylyǵymen kelisý boıynsha kirýge; 9) halyqty jumyspen qamtýǵa járdemdesýge qatysýǵa quqyǵy bar. 4. Volonter: 1) volonterlerdi úılestirýshiden alǵan tapsyrmalardy adal oryndaýǵa, al aıaqtalǵan soń olardyń oryndalǵany týraly volonterlerdi úılestirýshini habardar etýge; 2) azamattardyń jáne uıymdardyń quqyqtary men zańdy múddelerin buzbaýǵa, volonterlik qyzmetti uıymdastyrýshynyń óz quzyretine sáıkes bergen ókimderin oryndaýǵa; 3) volonterlik qyzmetti qaýipsiz oryndaý qaǵıdattaryn saqtaýǵa, óziniń qyzmetimen úshinshi tulǵalarǵa jáne qorshaǵan ortaǵa zııan keltirmeýge; 4) volonterlik qyzmet prosesinde volonter qol jetkizetin aqparattyń qupııalyǵyn saqtaýǵa; 5) volonterlik qyzmetti júzege asyrý boıynsha óz mindetterin oryndaýdy volonterlerdi úılestirýshiniń kelisiminsiz ózge adamdarǵa bermeýge; 6) volonterlik qyzmetti júzege asyrý prosesinde ózine berilgen materıaldyq resýrstar men jabdyqqa uqypty qaraýǵa jáne jumys aıaqtalǵannan keıin olardy qaıtarýǵa; 7) memlekettik bılik organdary men jergilikti ózin-ózi basqarý organdary laýazymdy adamdarynyń ókilettikteriniń iske asyrylýyna kedergi keltirmeýge mindetti. 13-bap. Volonterlerdi úılestirýshi 1. Volonterlerdi úılestirýshini volonterlik qyzmetti uıymdastyrýshy nemese volonterlik baǵdarlamany (jobany) nemese volonterlik aksııany iske asyrýǵa jaýapty volonterlik uıym taǵaıyndaıdy ne volonterler tobynyń quramyna kiretin volonterler ózderiniń arasynan saılaıdy. 2. Volonterlerdi úılestirýshi volonterlerge nusqaý beredi, olardyń arasynda jumysty bóledi, ár volonterdiń jumys orny men kólemin aıqyndaıdy, onyń jumysty oryndaýyn baqylaıdy. 3. Volonterlerdi úılestirýshi memlekettik organdarmen, jergilikti ózin-ózi basqarý organdarymen, volonterlik qyzmettiń ózge de uıymdastyrýshylarymen jáne ózge de volonterlik uıymdarmen, sondaı-aq volonterler toptarymen ózara is-qımyl jasaıdy. 4. Volonterlerdi úılestirýshi jumystardy oryndaýdyń qaýipsiz ádisteri men tásilderine jáne jazataıym oqıǵalardan zardap shekkenderge alǵashqy kómek kórsetýge volonterlerdi oqytýdy qamtamasyz etedi. 14-bap. Volonterlik uıym 1. Volonterlik uıym volonterlik baǵdarlamalardy (jobalardy) ázirleıdi jáne iske asyrady jáne volonterlik qyzmetti uıymdastyrýshymen, basqa da volonterlik uıymdarmen birlesip nemese volonterlerdi ózi derbes tarta otyryp, volonterlik aksııalar ótkizedi. 2. Volonterlik baǵdarlamanyń (jobanyń) maqsaty volonterlerdi paıdalana otyryp iske asyrylatyn áleýmettik mańyzdy mindetterdi sheshýge baǵyttalǵan is-sharalar keshenin bekitý bolyp tabylady. 3. Volonterlik baǵdarlamanyń (jobanyń) negizgi mindetteri: 1) volonterlik qyzmetti damytý; 2) azamattardyń jáne volonterlik uıymdardyń volonterlik belsendiligin yntalandyrý júıesin damytý; 3) volonterlerdi jáne volonterlerdi úılestirýshilerdi daıarlaý júıesin jetildirý; 4) volonterlik eńbekti paıdalanatyn ártúrli volonterlik uıymdar jáne ózge de qoǵamdyq birlestikter men kommersııalyq emes uıymdar arasynda áriptestik ózara is-qımyl júıesin jetildirý bolyp tabylady. 4. Volonterlik uıym qyzmetin osy Zańnyń 13-babyna sáıkes júzege asyratyn volonterlerdi úılestirýshini taǵaıyndaıdy. 5. Volonterlik uıymnyń volonterlerdi arnaıy semınarlar, tyńdaýlar, jumys kezdesýlerin, volonterlerdiń sletterin ótkizýge oqytý úshin bilim berý qyzmetin júzege asyratyn uıymdardy tartýǵa quqyǵy bar. 6. Volonterlik uıym ózi belgilegen tártippen volonterlerdi kótermeleýdi júzege asyrady, sondaı-aq Qazaqstan Respýblıkasynyń zańnamasynda belgilengen tártippen kótermeleý jáne (nemese) nagradtaý úshin anaǵurlym erekshelengen volonterlerdiń kandıdatýralaryn volonterlik qyzmetti uıymdastyrýshyǵa, sondaı-aq volonterlik qyzmetti uıymdastyrýshylar bolyp tabylmaıtyn memlekettik organdarǵa usynady. 7. Volontermen jazbasha nysanda jasalǵan azamattyq-quqyqtyq shartta kózdelgen jaǵdaılarda, volonterlik uıym volonterge arnaýly kıim beredi jáne onyń naqty turatyn jerinen jol júrýine, turýyna, tamaqtanýyna, qajetti jeke qorǵanysh quraldaryn, qural-saımandardy satyp alýǵa arnalǵan shyǵystaryn jáne qaýipti, zııandy jáne qolaısyz óndiristik faktorlarmen baılanysty jumystardy oryndaý kezindegi ózge de shyǵyndaryn óteıdi. 8. Volonterlik uıym Volonterdiń ádep kodeksin ázirleıdi jáne bekitedi. 15-bap. Volonterlik qyzmetti uıymdastyrýshy 1. Volonterlik qyzmetti uıymdastyrýshy: 1) volonterlik baǵdarlamalardy (jobalardy) iske asyrýdy jáne volonterlik aksııalardy ótkizýdi uıymdastyrady; 2) volonterlik qyzmetti qoldaý men yntalandyrýdyń memlekettik baǵdarlamalaryn, eger bul osy baǵdarlamalarda kózdelse, iske asyrýǵa qatysady; 3) volonterlik uıymǵa jáne (nemese) volonterge josparlanatyn jáne júzege asyrylatyn volonterlik baǵdarlamalar (jobalar) jáne volonterlik aksııalar, olarǵa qatysýshylardyń sany, olardyń ótkizilý orny men ýaqyty, olardy ótkizýge qoıylatyn talaptar týraly aqparatty, sonyń ishinde ózderiniń ınternet-resýrstaryna ornalastyrý arqyly beredi; 4) volonterlik qyzmetti júzege asyrý úshin volonterge jaǵdaı jasaıdy; 5) volonterlik uıymǵa jáne (nemese) volonterge usynym hat beredi. 16-bap. Volonterlik qyzmetti esepke alý tizilimi 1. Volonterlik qyzmetti uıymdastyrýdy retke keltirý maqsatynda Volonterlik qyzmetti esepke alý tizilimi júrgiziledi. 2. Volonterlik qyzmetti esepke alý habarlamalyq sıpatta bolady. 3. Volonterlik qyzmet týraly málimetter jalpyǵa qoljetimdi bolyp tabylady. 17-bap. Volonterlik qyzmetti qoldaý jáne qarjylyq qamtamasyz etý 1. Volonterlik qyzmetti qoldaý sharalary qaıyrymdylyq kómek túrinde mynadaı nysandarda júzege asyrylýy múmkin: 1) materıaldyq-tehnıkalyq qamtamasyz etý; 2) múliktik qamtamasyz etý; 3) Qazaqstan Respýblıkasynyń zańnamasyna qaıshy kelmeıtin ózge de qoldaý nysandary. 2. Volonterlik qyzmetti qarjylyq qamtamasyz etý jeke jáne (nemese) zańdy tulǵalardyń menshikti nemese tartylǵan qarajaty esebinen, sondaı-aq Qazaqstan Respýblıkasynyń zańnamasyna sáıkes ózge de kózder esebinen júzege asyrylýy múmkin. 4-taraý. QORYTYNDY EREJELER 18-bap. Qazaqstan Respýblıkasynyń volonterlik qyzmet týraly zańnamasyn buzǵany úshin jaýaptylyq Qazaqstan Respýblıkasynyń volonterlik qyzmet týraly zańnamasyn buzý Qazaqstan Respýblıkasynyń zańdaryna sáıkes jaýaptylyqqa alyp keledi. 19-bap. Osy Zańdy qoldanysqa engizý tártibi Osy Zań alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi.
Qazaqstan Respýblıkasynyń Prezıdenti N.NAZARBAEV
Astana, Aqorda, 2016 jylǵy 30 jeltoqsan № 42-VI QRZ
