Qazaqstanda refrıjeratorly-konteınerlik poıyz júre bastady

«Qazaqstan temir jol» UK» AQ enshiles kompanııasy «KTZ Express» AQ-y «RTSB GmbH», «Belıntertrans–Germanııa» jáne«Euro-BRICS» kompanııalarymen birlesip bolashaǵy zor Herne (Germanııa)- Lanchjoý (QHR) baǵyty boıynsha alǵashqy refrıjeratorly-konteınerlik poıyzyn iske qosty, dep málim etti «KTZ Express» AQ-y baspasóz qyzmeti. «KTZ Express» AQ-nyń  jalpy sany  430 dana -25°S do +25°S aralyǵyndaǵy klımattyq rejımdi saqtap turatyn arnaıy konteınerlik parki bar. Kompanııa erekshe temperatýralyq rejımdi talap etetin júkti álemniń kez kelgen jerine jyldyń qaı mezgilinde de jetkize alady. Tuńǵysh refrıjeratorly-konteınerlik poıyz tez buzylatyn taýar tıegen 45 tonnalyq 40 refkonteınerden turady. Tasymalǵa tapsyrys berýshi –Fransııadaǵy  elıtalyq surypty sharap shyǵarýshy zaýyt. Poıyz quramasy Herne qalasynan 2016 jyldyń 27 jeltoqsanynda shyǵyp, Qazaqtannyń Ilesk stansasyna 2017 jyldyń 5 qańtarynda kelip jetti. Aıta ketken jón, atalǵan baǵyt boıynsha teńiz kóligimen júk jetkizý 45 kúndi quraıdy. Al temirjoldyń osynaý logıstıkalyq sheshimi ýaqytty qysqartyp qana qoımaı, tez buzylatyn jáne qosymsha quny joǵary júkterdi jetkizedi. Jańa logıstıkalyq qyzmet temperatýralyq rejımdi talap etetin júkti tasymaldaý kólemin arttyrýǵa qarqyn berip,  ol óz kezeginde ekonomıkanyń nyǵaıyp, eldiń tranzıttik áleýetiniń artýyna yqpal etip, Qazaqstan aýmaǵy arqyly Eýropa-Qytaı baǵytynda tranzıttik tasymaldyń kólemin ósiredi.