1 aqpan kúni Tereńózek kentinde Syrdarııa aýdanynyń ákimi Ǵanıbek Qazantaev halyq aldynda esep berdi. Kezdesýge Qyzylorda oblysynyń ákimi Qyrymbek Kósherbaev jáne QR Prezıdenti Ákimshiliginiń memlekettik ınspektory Nurlan Tileshov qatysty.
Aýdan ákimi Ǵ.Qazantaev 2016 jyly atqarylǵan jumystar barysyn baıandap, osy jylǵa mejelengen josparlarymen bólisti.
Syrdarııa aýdany – aımaqtaǵy aldyńǵy qatarly aýdandardyń biri, sonyń arqasynda jyl saıyn aýyl sharýashylyq salasyndaǵy jetistikteri úshin marapattalyp keledi.
2016 jyldyń qorytyndysy boıynsha aýdan, aýyl sharýashylyǵy ónimderiniń kólemi jaǵynan da aımaqta kósh basynda tur. Aýdannyń bıýdjeti 7 mlrd.354,6 mln. teńge, sonyń ishinde aýdannyń óz kirisi - 4 mlrd. 328,6 teńgeni qurady. Jańadan áleýmettik, ákimshilik nysandar boı kóterip, joldar salyndy. Eldi mekenderdi kógaldandyrýda aýqymdy jumystar atqarylýda. Aýdanda aýyz sý máselesi túbegeıli sheshimin tapqan. Bıyl da jańa joldar salynyp, jóndeý jumystary jalǵasyn tabatyn bolady. Sondaı-aq, áleýmettik nysandardyń qurylysy júrgizilip, aýyl sharýashylyǵy, ónerkásip jáne ekonomıkanyń ózge de salalaryn damytýǵa den qoıylmaqshy.
Eseptik kezdesý barysynda aýdan turǵyndaryn qaýynnyń «Torpeda» sortyn Reseı Federasııasyna eksporttaý máselesi qyzyqtyrdy. Munan bólek, turǵyn úı qurylysy, eldi mekenderdi damytý, Tereńózek kentindegi ortalyq stadıonnyń jóndeý jumystary sııaqty birqatar ózekti máselelerge qatysty saýaldaryn joldady.
