Biz Shymkentten shyqqanda jańbyr nóserletpese de, sirkirep turǵan. Almatyǵa jetkende qylamyqtaǵan qar sońy japalaqtap, sońynan aspan tyǵyny atylyp ketti. Tuman kóterildi. Ýnıversıada basshylyǵy eki-úsh jarys túrin keıinge shegerdi. Biraq, tabıǵattyń tosyn minezi bıylǵy qysta qarynan góri jańbyry kóp Shymkenttiń frıstaılshylary úshin aıy ońynan týǵan kún boldy.
Frıstaıl-akrobatıka túrinen Ýnıversıadaǵa jarysqa túsken bes sportshynyń beseýi de shymkenttik. Eń tamashasy – bári ózimizdiń ini-qaryndastarymyz.
Janbota Aldabergenova men Baǵlan Ińkárbek jubynyń altyny – Ýnıversıada tarıhynyń paraǵyna qazaq sportshylarynyń qaldyrǵan qoltańbasy, tuńǵysh iri jeńisi. Buǵan aıaǵynyń sińirin sozyp alsa da, kúmis medalǵa qol jetkizgen Jibek Arapbaevanyń erligin qosyńyz.
Biz osy sańlaqtarmen sóılesip, aıtýly qýanyshtarymen bólistik.
«Bular kimder? Legıonerler me?..»
Baqytjan Zııabekov, Shymkenttegi Qysqy sport túrleri mektebiniń dırektory, Qazaqstannyń eńbek sińirgen jattyqtyrýshysy: – Sportshylarymyz Ýnıversıadaǵa úlken daıyndyqpen keldi. Fınlıandııada, Belorýssııada, Reseıde oqý-jattyǵý jıyndaryn ótkizdi. Qytaı men Fınlıandııada ótken Álem kýbogynyń kezeńderine qatysty. Ýnıversıadaǵa bir apta qalǵanda elge oralyp, sońǵy daıyndyqtaryn pysyqtady. Shynymdy aıtaıyn, bizdiń sportshylarymyz aǵa jattyqtyrýshy Murat Ábýtálipov ekeýmizdiń aıtqan boljamymyzdan asyp tústi. Jolda jatqan batpan quıryq joq, bir altyn, bir qola medaldan úmitimiz bolǵan. Altyndy Janbota alaryna sendik, Baǵlan kem degende qolaǵa ilinedi degen oı boldy. Jibek jarys qarsańynda aıaǵynyń sińirin sozyp alǵandyqtan, qatysa alar ma eken dep qaýiptendik. Biraq, Jibek sensasııa jasady. Kúmis medal aldy. Janbota men Baǵlan irikteý syny men fınal, sýperfınalda qarsylastarynan quryq boıy ozyp ketti. Elden bir mal ákelip soıyp, quran oqytqanmyn. Jarys kezinde Allaǵa minájat etip, tilek tilep otyrdym. Baǵlan alǵashqy jarysynda qulap qalyp, qatty qobaljyǵan edi. Bárin jınap, tolqynystaryn basatyndaı sóz taptyq, jigerlendirdik. Biraq, sizdiń keı aǵaıyndarǵa ókpemiz bar ekenin jasyrmaımyn. Baspasóz máslıhatynda bir jýrnalıst: «Biz bilgen Shymkentte qar joq, bul legıonerlerdi qaıdan ákeldińizder?», dep surap kúıdirdi. Jýrnalıstiń sportty jazyp júrip, sportty bilmeıtini tańǵaldyrdy. Sońǵy qysqy Olımpıadaǵa Shymkentten úsh sportshy qatysty. Janbota Aldabergenova qazaq sportshylarynyń ishinen alǵashqy altylyqqa kirdi. Jibek Arapbaeva Azııa oıyndarynda kúmis medal alǵan. Osyny ózimizdiń jýrnalıster bilip, osyndaı suraq qoımaýy kerek edi. Elbasy Ońtústikte qysqy sport túrlerin óristetý kerek degen. Kóregen basshy ulystyń uıytqysy ońtústikte qazaq sportshylarynyń óserine sendi. Endi mine, sonyń tátti jemisin jep jatyrmyz. Oblys ákimi Janseıit Túımebaevqa rahmet. Bizdi qoldaýǵa aýdan, qaladan bir top jankúıerdi jiberdi. Oblystyń sport jáne dene tárbıesi basqarmasynyń basshysy Álibek Nurtaev pen Shymkent qalasy ákiminiń orynbasary Qaırat Nurtaı jarystyń sońyna deıin bolyp, sportshylarymyzǵa qoldaý kórsetti. Ońtústik jampozdarynyń erligi qazaq sport tarıhynyń jarqyn belesteri. Biz úshin jarys búgingimen bitpeıdi. Endi Olımpıada oıyndaryna daıyndyqty bastap ketemiz.Janbota men Baǵlan: «Biz eldiń úmitin aqtadyq»
Janbotanyń anasyn ushyratqanbyz. «Men kóńil-kúıimdi aıtyp jetkize almaımyn. Júregim keýdeme syımaı tur, aǵataı». Túsindik. Biraz áńgimelestik. Alty perzentiniń úshinshisi, toıǵan qozydaı tompıǵan Janbotasy Olımpıada oıyndarynda da, Ýnıversıada da qazaq qyzdary ishinen óshpesteı iz qaldyrdy. Janbota jekeleı synda da altynǵa synyq súıem jerden súringen. Bári ádemi edi. О́kshelep kele jatqan Qytaı sportshysynan ondaǵan upaı alda bolǵanymen, sońǵy sekýndta ǵana áttegen-aı degizip, bir otyryp baryp túzeldi. Janbota aıtady: – Bizdi marapattaý úshin minbege shaqyrǵanda kózimniń qıyǵymen Qytaı sportshysynyń moınyndaǵy altynǵa qyzyǵyp qaraı berdim. Shirkin-aı, meniń moınymda da altyn medal bolsa ǵoı dep armandadym. Qudaı nıetimizdi qosh kóripti. Áý basta maǵan altyn medal eseptelgenin bilemin. Jaýapkershilik úlken. Qatty tolqydym. Baǵlanǵa rahmet. Ekeýmiz Qazaqstan qorjynyna altyn medal salǵanymyzǵa, eldiń úmitin aqtaǵanymyzǵa qýanamyn. Biz, Jibek ápkemiz ekeýmiz – M.Áýezov atyndaǵy OQMÝ-diń stýdentterimiz. Baǵlan Shymkenttegi Akademııalyq ınnovasııalyq ýnıversıtettiń stýdenti. Bizdiń jeńisimizge qurbylarymyz qatty qýandy. Eldiń jáne Elbasynyń senimin aqtaǵanymyzǵa biz de qýandyq. Baǵlan aıtady: – Janbota ekeýmizdiń ıyǵymyzǵa úlken júk artyldy. Kóńilde ekiudaı kúı boldy. Birinshiden, óz eliń, óz jerińde ótip jatqan Ýnıversıadada jeńiske jetpeseń, jankúıerlerińniń úmitin urlaǵandaı, kóńilin jetimsiretkendeı bolasyń. Ekinshiden, óz elińde ótip jatqan soń tolqý basym bolady eken. Biraq biz, Janbota ekeýmiz barlyq múmkindikti qalt jibermeı, bárin taza oryndadyq. Ishtegi qobaljýymyzdy jeńýge bapkerlerimiz jáne aǵalarymyz kóp kómektesti. Bizge úmit artqan elimizdiń senimi kóńilimizge demeý boldy.Kók týdyń jelbiregeni...
Bizdiń sportshylarymyz keremet qoı. Jibekke áýeli dárigerler aıaǵyń syndy dep jarysqa qatysýǵa ruqsat bermepti. Qaısar qyz qasarysyp turyp alǵan. Jarysqa bir kún qalǵanda qatysýǵa ruqsat alǵan. Úlgi alatyn dańqty apalary bar bizdiń qyz osylaı erlik kórsetti. Janbota men Baǵlan. Marapattaý. Kóz aldymyzda úsh memlekettik týdy ákele jatyr. Bir jarym mıllıardqa jýyq halqy bar Qytaıdyń alqyzyl týy qazaq baıraǵyn ortaǵa alyp keledi. Sony kórgende kózge jas tyǵyldy. Myqty ekensiń, Alash. Bar bol, Qazaq eli!.. Ishteı osylaı dep súısindik. Baqtııar Taıjan, «Egemen Qazaqstan»
