Pavlodarda barlyq balabaqshalarǵa qazaq tilindegi tárbıe engiziledi

Pavlodar oblysynyń ákimi Bolat Baqaýov óńirdegi barlyq balabaqshalarǵa memlekettik tildegi tárbıeni engizýdi usyndy, dep habarlaıdy QazAqparat. Mundaı ıdeıany óńir basshysy Qazaqstan Prezıdenti Nursultan Nazarbaevtyń  el halqyna Joldaýynyń negizgi baǵyttaryn túsindirý boıynsha ótken keńeste bildirdi. Bolat Baqaýov óziniń orynbasary Meıram Begentaevqa jáne bilim basqarmasynyń basshysyna bul múmkindikterdi zerdeleýdi tapsyrdy. «Balalar balabaqshadan keıin mektepke barǵan kezde, qazaq tildi mektepke ne orys tildige baratynyn ózi sheshsin. Esesine, balabaqshadan keıin olardyń sanasynda memlekettik tildiń negizi qalanady. Orys jáne aǵylshyn tilderinde pánder mektepterde úıretiledi», – dep atap ótti ol. Baqaýov sondaı-aq otyrys barysynda Elbasynyń tapsyrmasy boıynsha Pavlodar oblysynda 2017 jyldan bastap kásibı jáne tehnıkalyq bilim berýdi aqysyz negizge aýystyrý júrgiziletinin aıtty.