Búgin oblys ákimi J.Túımebaev Almaty qalasynda ótip jatqan 28-shi Búkilálemdik qysqy Ýnıversıadanyń jeńimpazdary men júldegerlerin qabyldady, dep habarlady OQO ákiminiń baspasóz qyzmeti.
Baıraqty básekede el namysyn qorǵap, Ýnıversıada oıyndaryndarynda jetken jetistikteri úshin ákim olarǵa alǵysyn bildirip, ystyq yqylasyn jetkizdi. Sonymen qosa, alǵys hatpen marapattap, qarjylaı syılyq tabys etti.
«Ýnıversıada Qazaqstan Respýblıkasynyń ulttyq jobasy jáne elimizdiń 25 jyldyq tarıhyndaǵy eń iri mýltısporttyq is-sharasyna baǵalanyp otyr. Bul tarıhı jeńiske búkil qazaq eli men Elbasymyz jáne úsh mıllıonǵa jýyq turǵyny bar ońtústik jurty da erekshe qýanyshqa bólendi. Sportshylarymyzdyń arqasynda, joǵary deńgeıdegi Álemdik baıraqty básekede elimizdiń kók baıraǵy jelbiredi.Sizder bizdiń jigerli kúres pen asqaq jeńisterge toly Ulttyq Rýhymyzdy pash ettińizder. Sizderdiń jeńisterińiz sportty damytýǵa barlyq jaǵdaıdy jasaǵan Elbasymyz Nursultan Ábishuly Nazarbaevtyń sport salasyna degen qamqorlyǵynyń jáne qoldaýynyń jarqyn dáleli», - dedi aımaq basshysy.
Almaty qalasynda bastaý alǵan jarystyń birinshi kúni el qorjynyna frıstaıl sportynyń akrobatıka tásilimen sekirýden Jibek Arapbaeva kúmis medal utyp alsa, Janbota Aldabergenova qola medalge qol jetkizip, el quramasyn komandalyq esepte tórtinshi orynǵa shyǵardy. Al, 31 qańtar kúni, J.Aldabergenova men Baǵlan Ińkárbek komandalyq saıysta altyn medalǵa qol jetkizdi.
"Jerlesterimizdiń Ýnıversıada tórinde jasaǵan úlken erlikteri úshin I oryn alǵan sportshylarymyzǵa úsh mıllıon teńge, II jáne III oryn alǵan sportshylarymyzǵa eki mıllıon teńge, al jattyqtyrýshy Murat Ablıatıfovqa 2 mıllıon teńge kóleminde qarjylaı syılyq berildi", delingen habarlamada.
