Astanada gerontologııa qyzmeti boıynsha check-up ortalyq ashylady

Astanada gerontologııa qyzmeti boıynsha check-up ortalyq ashylady. Bul týraly ákimdiktiń otyrysynda belgili boldy. «Bizde gerontologııa qyzmeti joq. Ústimizdegi jyldyń 9 mamyryna qaraı biz osy batyl jobany tolyq daıyndap shyǵaramyz. 4-shi qalalyq emhananyń bazasynda biz soǵys ardagerlerine jáne olarǵa teńestirilgen tulǵalarǵa, qarttarǵa jáne kóp balaly analarǵa arnalǵan zamanaýı check-up ortalyq ashýdy josparlap otyrmyz. Atalǵan ortalyq tolyqtaı zamanaýı medısınalyq qural-jabdyqtarmen jaraqtalatyn bolady. Barlyǵy bir jerde ornalasyp, qart adamdardyń ıgiligine jumys isteıdi», - dedi Astana qalasynyń densaýlyq saqtaý basqarmasynyń basshysy Erik Baıjúnisov. Ákim Áset Isekeshev atap kórsetkendeı, baǵdarlamada halyq densaýlyǵyn basqarýdyń sektoraralyq júıesine kóshý qarastyrylǵan. «Memleket basshysy densaýlyq kóp jaǵdaılarǵa baılanysty dep birneshe ret aıtqan bolatyn: Birinshi – salaýatty ómir salty, buqaralyq sportty damytý. Ekinshi – sapaly tamaqtaný. Úshinshi – sapaly aýyz sý. Tórtinshi – ekologııa. Besinshi – densaýlyq saqtaý salasyndaǵy qyzmetterdiń sapasy. Osy 5 baǵyttyń árqaısysy boıynsha naqty is-qımyl josparyn ázirleý qajet. Biraq olar ózara baılanysty bolýy tıis», - dedi qala basshysy. Astana qalasynyń densaýlyq saqtaý basqarmasynyń basshysy Erik Baıjúnisovtyń aqparatyna sáıkes, qazirgi ýaqytta turǵyndardyń densaýlyǵyn jaqsartý boıynsha jumys júrgizilýde. Aımaqtyń áleýmettik saýlyǵynyń basty kórsetkishteriniń biri azamattardyń ómir súrý uzaqtyǵynyń boljamy bolyp tabylady. Astanada atalǵan kórsetkish sońǵy úsh jylda 74,3 -ten 75,4 jasqa deıin uzardy jáne el boıynsha eń joǵarǵy kórsetkish bolyp tabylady. Úsh jylda bala ólimi jańa týǵan 1000 sábıge shaqqanda 7,5-ten 6,4-ke deıin tómendedi, al ana ólimi 100 myńǵa 16,3-ten 7,3-ke deıin tómendegen jáne bul qarqyn ústimizdegi jyly da saqtalyp otyr. Sondaı-aq, búgingi kúni Astanada turatyn halyqtyń 24% belsendi túrde sportpen shuǵyldanatyny aıtyldy. Dúnıejúzilik Densaýlyq saqtaý uıymy mamandarynyń pikirinshe, bul kórsetkish 30%-ǵa jetip, odan asqan kezde halyqtyń qan aınalymy júıesiniń aýrýlarynan jáne onkologııalyq aýrýlardan ólim deńgeıi edáýir tómendeıdi. Qadamdyq qoljetimdilik jobasy sheńberinde biryńǵaı elektrondyq medısınalyq karta quryldy. Joba Astana Innovations AQ-ymen birlesip ázirlendi. Qazir barlyq jumystar aıaqtaldy. 1 aqpannan bastap ony barlyq medısınalyq mekemeler boıynsha engizý josparlanǵan. Atalǵan júıe dárigerlerdi qaǵaz qujat aınalymynan bosatýǵa múmkindik beredi, al aýrýhanalar men emhanalarda tirkeý oryndarynan kartany jáne muraǵattan aýrý tarıhyn izdemesten, Biryńǵaı aýrý tarıhy toltyrylatyn bolady.