60 jyldyq tarıhy bar altybaqan

Aıagóz degen aıadaı bulaq desedi, Jurttarda qalǵan jumbaqty kimder sheshedi. Aıagóz bolyp ǵasyrlar alǵa kóshedi, Aıagóz – Aıa, arýlar eli keshegi... Aqıyq aqyn Muqaǵalı Maqa­taevty tebirentken arýlar eli, aqyndar eli Aıagózde tarıhtan syr shertetin eskertkishter az emes. Qos ǵashyqtyń qurmetine boı kótergen bir ǵana «Qozy Kórpesh-Baıan sulý» mazarynyń ózi nege turady?! Ǵashyq demekshi, Aıagóz qalasynyń ózinde jastar jıi bas qosatyn, talaı boıjetken men bozbalany tanystyrǵan, tabystyrǵan ádemi bir jer bar. Bul – shaǵyn ǵana shahardyń «7 kvartal» aı­maǵynda ornalasqan 60 jyldyq tarıhy bar altybaqan. Qala turǵyndarynyń saǵy­nysyp bas qosatyn shýaqty meke­nine aınalǵan altybaqandy kimderdiń ornatqany belgisiz. Belgilisi, bul jerden adam arylmaıdy. Qysy-jazy. Bálkim, egde jandar jalyndy jastyq shaǵyn, bula kúnderi men qula túnderin saǵynatyn, izdeıtin bolar osy jerden. Al jas­tar aıagózdikterdi 60 jyl boıy terbetip kele jatqan altybaqannyń tarıhyna tamsanady. – Bul altybaqan bizder úshin tym ystyq. Men 1960 jyly Aıa­góz qalasynda dúnıege keldim. Balalyq, jastyq shaǵymyz osy altybaqannyń mańaıynda ótti. Altybaqan keıin Tashkent qalasynda áskerı boryshymdy ótep, joǵary oqý ornynda bilim alyp júrgen kezderimde de jadymnan bir sát óshpedi. Endi qazir meniń balalarym men nemerelerim osy jerge jıi keledi. Bul alty­baqandy jastyq dáýrenimniń menimen birge terbelgen shaqtary dep bilemin, – deıdi osynda týyp-ósken Beısen Elýbaev esimdi azamat. P.S: Qazaqtyń qabyrǵaly qalamgeri Qabdesh Jumadilovtiń «Sońǵy kósh» romanynyń bir tusyn­da «Qaıran, Altybaqan! Teatry, operasy, fılarmonııasy joq kósh­peli eldiń kóńil ashary bolǵan Al­tybaqan! Keń dalany ánmen jań­ǵyrtyp, jas júrekterdi mahabbat besiginde terbetken Altybaqan!» dep tógil­dire jazatyny bar. Aıagózdegi altybaqan osy joldardy eriksiz eske túsirdi. Azamat QASYM, «Egemen Qazaqstan» Sýretti túsirgen Berikhan TAIJIGIT