Mal aýrýy beleń alyp tur

Atyraý oblysynda aýyl sharýashylyǵy qarqyndy damyp keledi. Mal sany, odan óndirilgen ónimder kólemi artqanymen, sheshýin kútken máseleler áli de bar. Qyzylqoǵa aýdanynda oblys ákimi Nurlan Noǵaevtyń tóraǵalyǵymen ótken keńeste mal sharýashylyǵy tóńiregindegi túıtkildi jaıttar aıtyldy. Shyny kerek, alystaǵy aýyl halqy memlekettik baǵ­dar­lamalardyń ıgiligi men qoljetimdiligi jaıynda bile bermeıdi. «Sybaǵa», «Qulan», «Altyn asyq» baǵdarlamalary boıynsha Isataı, Qurmanǵazy, Maqat aýdandary men Atyraý qalasy mal satyp alý josparyn oryndamaǵan. Muny óńir basshysy nasıhat pen aqparattyń azdyǵymen baılanystyrady. Qyzylqoǵa aýdany aýyl sharýashylyǵyn óristetýge qolaıly meken. Alaıda, tórt túlik mal arasynda juqpaly derttiń azaımaı otyrǵany alań­­­daýshylyq týǵyzady. О́t­­ken jyly «Jasqaırat» jaýap­­­kershiligi shekteýli serik­­testiginde 635 bas qoı pasterellez aýrýynan óldi. Taısoıǵan aýylynda brýsellezge shaldyqqan 47 bas iri qara, 507 bas qoı-eshki maly túgeldeı joıyldy. Aýdan ákimi Maqsot Muqanov mal basynyń ósýine brýsellez indetiniń keri áser etip otyrǵanyn jasyrmady. «Jyl saıyn myńǵa jýyq mal juq­paly dertke shaldyǵady. Aýrýdyń aldyn alý jumystary áli nátıje bermeı keledi», dedi ol. Mal aýrýyna baılanysty taǵy bir derek, ótken jyly mu­naıly aımaqta 6 912 bas iri qara nodýlıarly dermatıt dertine shaldyqqan edi. Buryn-sońdy elimizde kezdespegen indetten 1150 bas mal óldi. Bul derttiń sebebin mamandar aýa raıynyń ystyq bolýyna oraı qan sorǵysh jándikterdiń tym kóbeıýimen túsindirdi. Áli kúnge deıin atalǵan aýrýmen aýyryp shyqqan janýarlardyń vırýs tasymaldaý­shy retindegi qaýpi ashyq másele bolyp tur. Oblystyq veterınarııa basqarmasynyń basshysy Nur­baı Ábdirahmanovtyń aıtýynsha, aýrýǵa shaldyqqan janýarlardy emdeý úshin 5 mln teńgege jýyq qarjy bólingen. Sondaı-aq, 785 adamǵa ólgen maldary úshin ótemaqy tólendi. Al naýryz aıy­nan bastap iri qara malǵa aýrýǵa qarsy ekpe júrgiziledi. Baqytgúl BABASh, «Egemen Qazaqstan»