Dárigerlerge arnalǵan dáris

Parlament Májilisiniń depýtattary elordadaǵy Ulttyq ǵylymı kardıologııalyq ortalyqta «Nur Otan» partııasy qalalyq «О́rkenıet» fılıalynyń medısınalyq qyzmetkerlerimen kezdesti.   Májilis depýtattary Gúljan Qara­­­­ǵusova men Tatıana Iаkovleva kez­desý barysynda Prezıdenttiń bılik tar­maq­tary arasyndaǵy ókilettikterdi qaıta bólý jónindegi Úndeýiniń jáne «Qazaqstannyń Úshinshi jańǵyrýy: jahandyq básekege qabilettilik» Jol­daýy­nyń mán-mańyzyn túsindirdi. Sondaı-aq, osy jıynda «Nurly jer» turǵyn úı qurylysy baǵdarlamasynyń jobasy talqylandy. G.Qaraǵusova óz sózinde elimi­zdiń basqarý júıesi eleýli ózgeristerge baǵyt alǵanyn atap ótti. «Basqarý ókilettikteriniń bir bóligin Parla­ment pen Úkimetke berýdiń arqasyn­da bılik tarmaqtarynyń ózara is-qımylynyń jańa úlgisi paıda bola­dy. Másele osy týraly bolyp otyr. Parlament pen Úkimettiń qoǵam al­dyn­daǵy jaýapkershiligin arttyrý jumys sapasyna da oń yqpal etedi. Máselen, buryn osyǵan deıin Úkimet baǵdarlamany ázirlep, ony Prezıdent bekitetin. Endi baǵdarlamalar­dyń oryndalý jaýapkershiligi, bólingen qarajattardyń ıgerilýi, barlyǵy Úkimettiń jaýapkershiligine ótedi», – dedi depýtat. T.Iаkovleva medısına qyzmet­ker­lerine «Nurly jer» turǵyn úı qurylysy baǵdarlamasy jobasynyń jaı-japsary týraly baıandap berdi. Onyń aıtýynsha, baǵdarlamada baspa­nanyń qoljetimdiligin arttyrýdyń, qurylys kompanııalaryn turǵyn úı salýǵa yntalandyrýdyń joldary qaras­tyrylǵan. Depýtattyń sózin Ulttyq ekono­mıka mınıstrligi Qurylys jáne tur­ǵyn úı-kommýnaldyq sharýashylyq is­teri komıteti tóraǵasynyń oryn­ba­sary Baqytjan Kachakov tolyqtyr­dy. «Qurylys jumystaryn bastamas buryn  qaı óńirde qansha úı salý kerek, onyń baǵasy qaı shamada bolýǵa tıis degen máselelerdi josparlap alǵan jón. Qandaı kategorııadaǵy azamat­tar baspanaǵa óte zárý? Ony da anyq­tap almaqpyz. Turǵyn úı naryǵy­na taldaý jasaı otyryp, óńirler­degi baspanaǵa degen suranys deńgeıi­ne kóz jetkizý qajet. Osy saýaldar­dyń bárine áleýmettik saýaldama júrgizý arqyly jaýap alatyn bolamyz», – dedi B.Kachakov. Talqylaý barysynda Májilis depýtattary, «Nurly jer» baǵdarla­masynyń jobasyn ázirleýge qatys­qan quzyrly organ ókilderi kezdesýge kelgen adamdardyń suraqtaryna eg­jeı-tegjeıli jaýap berdi. Aıta keteıik, «Nur Otan» partııa­synyń qalalyq «О́rkenıet» fılıaly Pre­zıdenttiń bılik tarmaqtary ara­synda ókilettikterdi qaıta bólý máse­leleri jónindegi Úndeýin, sonymen qatar, Memleket basshysynyń halyqqa ar­naǵan Joldaýyn elordadaǵy medı­sınalyq eńbek ujymdaryna túsin­dirý jumystaryn jalǵastyra beretin boldy. Arnur ASQAR, «Egemen Qazaqstan» ASTANA