Ár Joldaýdyń óz jańalyǵy bar

Prezıdenttiń «Qazaqstannyń Úshinshi jańǵyrýy: jahandyq básekege qabilettilik» atty kezekti Joldaýynyń basym baǵyttaryn túsindirý jáne nasıhattaý maqsatynda Parlament Májilisiniń depýtattary Gúlmıra Isimbaeva men Ábdimanap Bekturǵanov jáne «Nur Otan» partııasy Almaty qalalyq fılıaly tóraǵasynyń birinshi orynbasary Juldyz Omarbekova Abaı atyndaǵy ulttyq pedagogıkalyq ýnıversıtettiń oqytýshylyq-professorlar quramymen, stýdenttermen kezdesti.  Eńbek joly men qyzmet laýazymy bilim salasymen birge órilgen depýtattardyń qarashańyraq oqý ordasyna at basyn burý maqsaty – egemen eldiń turaqty damýyn qamtıtyn, memlekettiń barlyq salasyna serpin beretin, postındýstrııalyq qoǵamdy qalyptastyratyn ónerkásiptik-ınnovasııalyq damý baǵdarlamasynyń saıa­sa­tyn usynatyn, jańa teh­nologııalyq-ınnova­sııa­lyq da­mýdy qoldaıtyn tarıhı qujat jaıly tolyq ári tereń túsinikteme berip, mazmuny men mańyzyn ujymmen birge talqylaý. Elbasynyń strategııalyq josparlarynyń alǵa ba­sýy­nyń nátıjesinde eki qadam­dy artqa tastap, úshinshi jań­ǵyrýǵa qadam basty. Mem­leket basshysy mán berip otyrǵan basymdyqtar men ba­ǵyt­tardyń árqaısysy halyq úshin mańyzdy. Á.Bekturǵanov negizgi bes basym­dyqtyń árqaısyna jeke toq­tala turyp, Joldaýdaǵy bilim, til, teh­nologııalyq damý másele­lerine qatysty oı-pikirin tarata aıtty. Ǵylym men tehnıkanyń damyǵan zamanynda elimizde ónerkásiptiń revolıýsııalyq elementterin engizý qajet. Osyǵan oraı jańa ınnovasııalyq startaptardy meńgerý, ǵylymı-tehnıkalyq áleýetti damytý, tehnologııanyń sońǵy jańalyqtarynan habardar bolyp, oǵan qol artý – Qazaqstan jastary úshin arman emes, kúndelikti ómirde úırenýge, talpynýǵa tıis qajettiligi bolýy kerek. Depýtattar balany  alty jasynan mektepke berý, on eki jyldyq bilim júıesi, úshtildilik máselesine oraı qoıylǵan saýaldarǵa naqty jaýap berip, túıini áli tolyq tabylmaǵan túıtkildi jaıttarmen sát saıyn betpe-bet kelip, tyǵyryqqa tirelip júrgen ustazdardyń usy­nysyn tyńdady. «Elbasy 1997 jyly jasaǵan alǵashqy Joldaýynan keıin Qazaqstan halqyna arnap 21 ret Joldaý jasady. Ár Joldaýdyń máni de, orny da bólek, eshqashan biri ekinshisin qaıtalaǵan emes, ár Joldaýdyń óz jańalyǵy bar. Joldaýda bilim, onyń ishinde jastarǵa kásiptik-tehnıkalyq bilim berý, osy salada mamandar daıar­laý, aýyl men qala mektep­terin teńestirý, jańa mek­tepter salý – óte mańyzdy jumys. Buǵan bilim salasy­nyń qyzmetkerlerin óte jaýap­kershilikpen qaraýǵa shaqy­ramyn. Joldaýdyń túpki máni halyq qamy bolǵan­dyqtan, bilim berý, densaý­lyq saqtaý, aýyl sharýa­shylyǵy salasy boıynsha aı­tylǵan baǵyttar men ilgeri­rekte qabyldanǵan ilkimdi baǵ­darlamalar boıynsha iste­letin jumys bir sátke toq­tamaýy kerek», – dedi Gúlmıra Isimbaeva. Depýtattar bılik qury­ly­myndaǵy ókilettik bólý máselesine oraı týyn­daǵan konstıtýsııalyq ózge­riske baılanysty da dáıek­ti túsinikteme jasady. Ja­handaný úrdisinen qalyspaı, zamanaýı ıgilikterdi óz boıyna biriktirip, qoǵammen ushtastyra alatyn jastardy jańa turpatty kezeńge saı bilim berip, tárbıeleý ustazdar aldyndaǵy uly jaýapkershilik ekenin eske salyp, Joldaýdan týyndaıtyn mindetterdi júzege asyrýǵa bar kúsh-jigerdi jumyldyryp, birge atqarýǵa shaqyrdy. Aıgúl AHANBAIQYZY, «Egemen Qazaqstan» ALMATY