О́mir ónermen órnekteledi. Qazaq tabıǵatynda ony ómir jórgegine balaıtynymyz bar. Bul turǵyda tól mádenıetimizdiń máıegine aınalǵan Kókshetaýǵa qaratyp qurmet sezimderi men lebizderin aqtaratynymyz aıqyn. Oraq tildi Shal aqynnan beri qaıtaryp sóılegenniń ózinde, áıgili Aqan seri, Birjan sal, Orynbaıdyń rýhanı dańǵylymyzdaǵy daraboz jolyn dúıim jurt maqtan etedi. Dáýir joly jalǵasyp keledi. Búgingi kúni óner kemesin órge súıregender qatarynda tunyq bulaqtaı Birjan sal atyndaǵy Kókshetaý mýzykalyq kolledji memlekettik mekemesin bólektep aıtýǵa bolar edi.
Osydan týra 35 jyl buryn qurylǵan oqý orny Kóksheniń mádenı-mýzykalyq ómirine aıryqsha oqıǵa retinde qosyldy. Alǵashqy dırektor elimizdiń aıtýly azamaty Manarbek Bekseıitov jumysqa bilek sybana kiristi. Sol kezdegi mýzyka ýchılıshesine 26 adam qabyldanyp, pıanıno, dombyra, baıan jáne úrlemeli aspaptar klasynda sabaq aldy. Izdenimpaz basshy kelesi jyly dırıjerlik-hor, ishekti aspaptar jáne án bólimderin ashýǵa qol jetkizdi. Jas ujymnyń qalyptasý kezeńindegi umytylmas áser áli kúnge sýymaǵany tań qaldyrady. Eń birinshi aǵyl-tegil qýanyshty respýblıkalyq jas oryndaýshylar konkýrsynyń dıplomanty Bolat Ámınov alyp keldi. Bul pedagog kadrlardyń kásibı biliktiliginiń óskendigin, Kóksheniń dástúrli jáne akademııalyq óner arnasynyń keńigendigin aıqyndaıtyn, sonymen birge, bolashaq kúnderdiń jarqyndyǵyna senim uıalatqan jeńis edi.
Kókshe túlekteri elimizdiń joǵary oqý oryndary men Almaty konservatorııasynda baq synap jatty. Bul joldyń da jemisti ekendigin atap ótken lázim. Qazirgi kolledj oqytýshylarynyń dırektor Qaıyrly Sársenbaevtan bastap túgelge derligi týǵan uıasynda eńbektenip jatqan azamattar. Olardyń qatarynda B.Ámınovtyń, Z.Salyqovanyń, E.Balapaevanyń, J.Jaǵyparovanyń, L.Sorokınanyń, A.Aýbakırovanyń, G.Gorbannyń, A.Esmurzenovanyń esimderi jurtshylyq arasynda zor iltıpatpen atalady. Jalpy, munda kolledjdiń úshinshi urpaq býyny jumys istep jatqany kez kelgenge úlgi bolarlyq jaǵdaı. E.Sýhovoı, R.Jumanova, S.Muhamedııarov, E.Ýstıýgova, D.Birjanov, E.Mýsaıpova, E.Kýsenkolar jańa leptiń ókilderi desek, artyq aıtqandyq emes.
Kolledjdiń aınalasynan balǵyndar shattyǵy, áýelegen án, klassıkalyq mýzyka áýeni, dombyra men qobyz úni tynymsyz qalyqtap, tolqyndanyp jatady. Qos qabatty ǵımarattan ómir nári shalqyp jatqandaı áserge bólenetinińiz anyq. Bul ujymdaǵy 47 oqytýshynyń tynymsyz da qajyrly eńbeginiń baıraǵy bıiktegeninen derek beredi. Olardyń qyzmeti pándik-sıkldik baǵytta biriktirilgen. Sabaqtar fortepıano jáne úrlemeli aspaptar, án, hor dırıjerligi, mýzyka teorııasy, jalpy bilim pánderinen tálim taratady. Kóp jyldardan beri Z.Salyqova jetekshilik etetin pedagogıkalyq tájirıbe sektorynyń jumysy da jemisti. Onyń shákirti Darıǵa Tańatarova respýblıkalyq jas mýzykanttar baıqaýynyń laýreaty atandy.
Kolledj dırektory Qaıyrly Sársenbaev pedagogtar tarapynan oqý orny men odan tysqary jerlerde úlken kólemdegi ádistemelik jumystar atqarylyp jatqanyn aıtady. Atalǵan ujym kúshimen Qazaqstanda tuńǵysh ret «Nemis mádenıeti jáne Iogan Bahtyń shyǵarmashylyǵy» atty halyqaralyq ádistemelik konferensııa ótkizilgen. Sońǵy jyldary oqý ornynyń konserttik qyzmeti belsendi ekpin alýda. Kolledj ónerpazdary oblystaǵy mádenı sharalardyń uıytqysyna aınalyp, mektepter men balalar baqshasynyń shattyq shyraıyn asha tústi. Búgingi tańda kolledj janynda mýzyka mektebi, balalardyń estrada stýdııasy, balalar-jasóspirimder hory jumys isteıdi. Aqmola oblysynyń barlyq óner ujymdaryn joǵary bilikti kadrlarmen qamtamasyz etip otyrǵan kolledj jer-jerlerde balalar mýzyka mektebi túrindegi fılıaldaryn uıymdastyra bastaǵany da quptarlyq jaǵdaı.
Kolledjdegi óner uıalary jóninde keńinen áńgimeleýge bolady. О́ner janashyry Borıs Lagoda uıymdastyrǵan sımfonııalyq orkestrdiń dańqy oblys aýmaǵynan tysqary jerlerge de málim. Biz onyń tabystary men jetistikterin tizbelemeı-aq, osy óner ujymynyń negizinde Kókshetaýdyń úlken sımfonııalyq orkestri qalyptasqanyn qýana habarlaǵymyz keledi. Repertýarlyq tutqasy men janrlyq ereksheligi kúrdeli orkestr bıyl óziniń otyz jyldyǵyn atap ótpek.
Birjan sal atyndaǵy kolledjdi jıyrma jyl basqarǵan, Qazaqstannyń eńbek sińirgen qaıratkeri Manarbek Bekseıitov qazaq halyq aspaptary orkestrin qurǵan bolatyn. Ol ujymnyń ózindik oryndaýshylyq dástúrin qalyptastyrýda kóp eńbek sińirdi. Marqum orkestrge arnalǵan shyǵarmalardy da ózi jazyp otyrǵanyn jaqsy bilemiz. Sondaı-aq, Manarbek Qasymulynyń «Kókshetaý marshy» óner ordasynyń mýzykalyq ánurany retinde asqaqtatyp shyrqaýda. Respýblıkalyq baıqaýlardyń birneshe dúrkin jeńimpazy atanǵan orkestr Vengrııa, Polsha kórermenderiniń de rızashylyǵyna bólendi. Aıtýly azamattar A.Qulahmetovtiń, búgingi jetekshi Turlyqoja Bazarovtyń basshylyǵyndaǵy ult aspaptary orkestri Máskeýdegi «Dostyq shuǵylasy» festıvaliniń dıplomymen marapattalyp, «Otradnoe» mádenı kesheni men «Rossııa» konsert zalynda óner kórsetkeni úlken mereı sanalady.
Tunyq bulaq óner kemesi únemi órge júzýde. Qazirgi tańda kolledj túlekterin oblystaǵy barlyq óner ujymdary men mádenı-aǵartý mekemelerinen kóptep kezdestiresiz. Tipti, Máskeý, Ýfa, Marı, Astana, Almaty sahnalarynyń sheberleri atanǵandar da bar. Al Dına Qabykeeva K.Baıseıitova atyndaǵy Opera jáne balet teatrynyń ánshisi, Dáren Ǵylymov Astanadaǵy Ult aspaptar orkestriniń dırıjeri, Gúlnara Bashaeva Qazaq Ulttyq mýzyka akademııasy balalar horynyń dırıjeri, Galına Potanına Sveshnıkov atyndaǵy akademııalyq hordyń solısi bolyp jemisti qyzmet atqarýda. Talantty jastar R.Hýsıtdınova úrlemeli aspaptar halyqaralyq baıqaýynyń, aǵaıynda Sáken jáne Dáýren Birjanovtar, Natalıa Mızıýk «Shabyt» baıqaýynyń laýreattary, Edýard Sorokın Parıjde ótken Halyqaralyq konkýrstyń, Vladımır Kamerloher «Trofeı Iýgoslavıı» konkýrsynyń dıplomanttary atandy. Kolledjde qazaqtyń ulttyq halyq aspaptary sheberhanasy jumys isteıtini de jaqsy úmitterdi jetekteıdi.
Bıylǵy oqý jylynda kolledjdi 32 túlek bitirse, sonyń otyzy elordadaǵy Ulttyq mýzyka akademııasyna, Qurmanǵazy atyndaǵy memlekettik konservatorııaǵa grantpen túsip otyr.
Baqbergen AMALBEK, Kókshetaý.
Sýretterde: kolledj dırektory Q.Sársenbaev oqý-tárbıe isin josparlaýda; kolledj ómirinen kórinister.
