2017 jyly qurylatyn kooperatıvterdiń sany 2 ese artady dep kútilýde

Búgin Úkimettiń keńeıtilgen otyrysynda Nursultan Nazarbaev oblys ortalyqtarynda azyq-túliktiń qoryn saqtaý úshin úlken qoımalardy salmaǵan ákimderdi synǵa aldy. «Ákimderge aıtaıyn degenim, oblystardyń ortalyqtarynda ónim saqtaıtyn qoımalar joq. Kooperatıvter alyp kelgen ónimderin qaıda jetkizedi. Baıaǵyda  azyq-túliktiń qoryn saqtaý úshin oblystarda úlken qoımalardyń qurylýy týraly tapsyryldy. Keıbirinde osyndaı qoımalar bar, al qalǵandarynda jasaqtalmaǵan. Kooperatıvter jumys isteýi úshin úlken qordy jınaıtyn qoımalar bolýy kerek. Al qazir qalaı jumys isteıdi? Olardyń dúkenderi joq», - dep atap ótti Prezıdent. Osy oraıda Elbasy kooperatıvter tıisti deńgeıde jumysqa kirisse, qazirgi kezde tolyq qýatynda jumys istemeı turǵan sút jáne et zaýyttary jetkilikti kólemde qamtamasyz etiletinin atap ótti. Úkimettiń keńeıtilgen otyrysy barysynda QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov 2016 jyly sút ónimderi jáne iri qara mal etin ázirleý baǵyttary boıynsha 157 kooperatıv qurylǵanyn jetkizdi. Ústimizdegi jyly qurylatyn kooperatıvter sany eki esege artady dep kútilýde. «Kooperatıvter ónimdi daıarlaý, saqtaý, tasylmaýmen, sondaı-aq veterınarııa, jem-shóp daıarlaý, agrarlyq hımııa qyzmetterin júzege asyrady. Jalpy, kooperatıvter aýyldy ary qaraı damytýdyń negizi bolýy tıis», - dedi Myrzahmetov.