Qazaqstanda 2 myń ımporttyq taýar otandyq ónimge aýystyrylady

Astanada QR Investısııalar jáne damý mınıstrligi, «Atameken» ulttyq kásipkerler palatasy jáne júıe qurýshy kompanııalar arasynda Qazaqstan Respýblıkasynyń aýmaǵynda óndiriletin taýarlardyń qazaqstandyq qamtý úlesin ulǵaıtýdy qoldaý týraly úshjaqty kelisimge qol qoıyldy, dep jazady strategy2050.kz. QR IDM «NADLoC» jergilikti qamtýdy damytýdyń ulttyq agenttigi» AQ-da Qazaqstanda iri kompanııalardyń tehnologııalyq prosesi úshin qajetti taýarlardyń qajettigine tolyq taldaý júrgizilip, otandyq taýar óndirýshilerdiń áleýeti zerttelgeni habarlandy. Júrgizilgen taldaý nátıjeleri boıynsha «NADLoC» AQ sarapshylary 5 salada búgingi kúni 387 mln dollar somasyna sheteldik óndirýshilerden satyp alynatyn 2 myńǵa jýyq taýarlar pozısııasyn anyqtady. Mamandar ımportty almastyrý maqsatynda jańa ónim túrlerin óndirýdi uıymdastyrý kezinde joǵaryda kórsetilgen soma Qazaqstan ekonomıkasyna jumys isteıtinin atap ótti. «Júıe  qurýshy iri kompanııalar da óz tarapynan shaǵyn jáne orta bıznesti damytýǵa qoldaý kóretýge daıyn. Mysaly, «Kazsınk» JShS, «Qazaqmys korporasııasy» JShS, «ArselorMıttal Temirtaý» AQ, «Eýrazııalyq top» JShS shaǵyn jáne orta bıznestiń taýar óndirýshilerimen uzaq merzimdi yntymaqtastyq jasaýǵa jáne jergilikti kásiporyndardan bar taýarlardy satyp alýǵa daıyn», - delingen habarlamada. Osy kompanııalar otandyq óndirýshilerdiń básekege qabilettiligin arttyrýǵa, jańa jumys oryndaryn ashýǵa, shyǵarylatyn ónim jelisin keńeıtýge, sondaı-aq onyń sapasyn jaqsartýǵa baǵyttalǵan joǵaryda atalǵan úshjaqty kelisimge qol qoıýǵa qatysty. Osydan basqa, memleket qazaqstandyq kásiporyndarǵa jyl saıyn qoldaý kórsetedi. Mundaı qoldaý quraldarynyń biri «О́nimdilik - 2020» baǵdarlamasy aıasynda jalpy tanylǵan halyqaralyq standarttar boıynsha óz taýary sapasynyń sáıkestigin rastaǵan barlyq otandyq óndirýshiler ala alatyn sapa menedjmenti júıeleri men ónimdi sertıfıkattaý boıynsha shyǵyndardyń bóligin óteý bolyp tabylady.