Keshe 4-shi altyn medaldy Qazaqstan quramasyna qarsylastarynyń qolynan julyp alǵan altyn qyz Iýlııa Galyshevaǵa minezdeme bergenimiz esimizde. Oqyrmannyń da esinde bolar! Sonda Iýlıanyń kózdegeni kóz ushyndaǵy bıikter ekenin bilgendeı aıtqan edik. О́ıtkeni, jastar arasyndaǵy barsha jarysty bylaı qoıǵanda, 2010 jáne 2014 jyldary eki birdeı qysqy Olımpııalyq oıyndardyń otyna «súńgip» shyqqan qazaqstandyq frıstaıl-mogýlshy shyn máninde ózin sondaı salqynqandy ustady.
Búgingi ótken juptasyp óner kórsetýde álem chempıonatynyń (2015 j.) chempıony, Dúnıejúzilik Ýnıversıadanyń eki dúrkin (2015, 2017 jj.) chempıony Iýlııa Galyshevanyń reseılik áriptesine qaraǵanda juldyzy joǵary boldy. Sulý da symbatty sportshy qyzdyń kórkem de kerbez ónerine tóreshiler bir aýyzdan joǵary baǵa qoıdy. Juptasyp teń jarysqan frıstaıl-mogýlshylar kóz ilespes jyldamdyqpen jarysyp, aspanda da qaýyrsynsha qalyqtaı aınalyp, barsha kóremenderin tamsandyrdy.
Alaıda, ıá, alaıda... Alataýdyń qoınaýynda almas qylyshtaı jarqyrap turǵan Shymbulaq shatqaly Iýlııa qyzdy taǵy da bir jebep jiberdi. Iýlııa Galysheva – chempıon!
Qazaqta jeti sany kıeli, qasıeti qandaı!!! Sol jetinshi altyn medaldy Iýlııa Qazaqstannyń qorjynyna esh qınalmastan ákelip saldy. Jarys bastalǵan alǵashqy kúnnen qyr sońynan qalmaı qabattasyp kele jatqan reseılik sportshy Elızaveta Bezgodovoı bul joly kósh boıy artta qaldy. Tóreshiler qarsylastarǵa 17:8 degen baǵa qoıdy.
Iýlııanyń jeńisin kózben kórgen Dmıtrıı Reıherdtiń delebesi qozbady dep qalaı aıtamyz!? Áıtpese, osy Dmıtrıı keshegi kúni Qazaqstanǵa asa qymbat 5-shi altyn medaldy alyp turyp, «bul meniń sońǵy ýnıversıadam, osy altynǵa da qanaǵat», degendeı bolyp edi.
...Alataýdyń eteginde qyrandaı qaıta silkingen Dmıtrıı Reıherd taǵy da aıdy aspanǵa shyǵardy. Dımanyń keshegi sózine «ılanǵan» kórermen bar úmitin ony úzeńgiles áriptesi Pavel Kolmakovqa artyp otyrǵan. Erler arasyndaǵy juptasyp jarysýda frıstaıl-mogýlshy Pavel Kolmakov ta jurtty uıatqa qaldyrmady. Júldeli úshinshi orynǵa taban tirep, qola medal ıelendi.
Sonymen, XXVIII Ýnıversıadada 28 jastaǵy óskemendik Dmıtrıı Reıherd fınaldyq básekege sharshamaı jetip, ekinshi márte altyn medaldy moınyna taqty. Bul – qazaqstandyq sportshylardyń HHVIII Dúnıejúzilik qysqy Ýnıversıadadaǵy 8-shi altyn medali!
9-shy altyn medal qaltada edi, átteń... Galıa!
Alǵashqy saıystarda kózge túsýge qysyla-qysyla júrip otandastaryna kúmis medal syılaǵan Galına Vıshnevskaıa ekinshi saıysta adam tanymastaı ózgerdi. Alǵashqy altyndy dúrkiretip alyp kelgen Alına Raıkovanyń ózin 12-shi orynda qaldyryp, Ýnıversıada jeńimpazy atandy emes pe?! Úshinshi kezek. Pasıýt. Bir-birine ilinisip quıryq tistese júgirgen bıatlonshylar arasynan sýyrylyp alǵa shyqqan mergen qyz Galınamyz á degennen-aq kórsetkish boıynsha 23 sekýnd alǵa shyqty. Birinshi shepte jata qalyp oq atqanda da múlt ketpedi. Tamasha! Bárin de óz kózimen kórip, qýanyshyn jasyra almaı «Iá, sát!», dep aq jol tilep otyrǵan kórermen Galınanyń vıntovka ustaǵan ýysynan altyn medal kórgendeı sezimde jelpinip otyrdy. 10 shaqyrymdyq qashyqtyqtaǵy kelesi shepke kelgen Galına Vıshnevskaıa reseılik áriptesi Larısa Kýklınadan 1 mınýt 32 sekýnd (!) alda kele jatty. Vıntovkasyn kezenip tura qalǵan Galına dál osy jerde búldiredi dep kim oılaǵan!?..
Galına myltyǵyn kezenip tura qalmaı, jarys sharty boıynsha jata qalyp nysanany kózdeýi tıis edi. О́te saq otyrǵan tóreshiler búginge deıin altyn da, kúmis te alyp úlgergen mártebeli sportshymyzdy dál osy jerden jarystan shyǵardy da tastady.
Bári de kesh. Ret sany jaǵynan 9-shy altynymyz osylaısha Galınanyń qolynan sýsyp tústi. О́te ókinishti!
Almaty Ýnıversıadasyn Galına Vıshnevskaıa bir altyn, bir kúmis medalmen merziminen buryn aıaqtady.
Jalpy bıatlondaǵy pasıýt – bir-birine ilese júgiretin sport túri ómirge kesh kelgenine qaramastan, ǵalamdyq jarystarda óz ornyn tapqan. Galınanyń búgingi qateligine kúıingen Vankýver qysqy Olımıadasynyń kúmis júldegeri Elena Hrýstalevadan bolǵan oqıǵaǵa saraptama berýin ótingen edik.
– Birinshi shepten ózderińiz de kýá boldyńyzdar, Galına qınalmaı ári óte jeńil ótti, – dedi Elena. – Júgirisinde de min joq. Atýy da jaman bolǵan joq. Bul jarystyń bir qıyndyǵy sol – bir jatyp atyp, bir turyp atý kerek. Osy arada Galına ózin-ózin ustaı almaı qaldy. Shatasty. Jattyǵý sátinde de shatasyp jatatynymyz bar, sol qaıtalandy. Pasıýt pen mass-starttyń ereksheligi de sonda. Amal qansha, óte ókinshti-aq...
Jarystar jalǵasýda.
Muz aıdynyna mánerlep syrǵanaýshylarymyz shyqty...
ALMATY
Baqtııar TAIJAN,
Talǵat SÚIINBAI,
«Egemen Qazaqstan»
