Jeke balabaqsha ashqyńyz kelse...

Elbasynyń «100 naqty qadam» Ult josparynda mem­leket-jekemenshik áriptestigin damytýǵa aıryqsha kóńil bó­lingen. Áriptestiktiń áleýetin arttyrýǵa baǵyttalǵan qadamdar Atyraý oblysynda da júzege asyp keledi. Bul jańa úrdis tárbıe salasynda tıimdi jobaǵa aınaldy. Oǵan jekemenshik mektepke deıingi uıymdardyń jumysy dálel bola alady. Qazir munaıly aımaqta 164 balabaqsha bar, onyń ishinde 30 balabaqsha jekemenshik úlesinde. Oblystyq bilim berý basqar­masynyń basshysy Nursáýle Saılaýovanyń aıtýynsha, ótken jyly 8 balabaqsha paıdalanýǵa berilgen. Qazir 13 mektepke deıingi mekemeniń qurylysy júrip jatyr. Sonyń ózinde kezekte turǵan sábılerdiń 85 paıyzy ǵana balabaqshamen qamtylǵan. Qalǵandary, ıaǵnı úsh myńnan astam bala úıde tárbıe alýǵa májbúr. Bul problemany sheshý úshin mektepke deıingi uıymdar jelisin damytý, ózge maq­sattaǵy ǵımarattardy ja­ńar­tý, jańa qurylystar salý, memleket-jekemenshik áriptes­tigin óristetý kerek. Alaıda, zaman talabyna saı jańa is bastaýǵa aýyl tur­ǵyndary qyzyǵýshylyq tanytpaı otyr. Aımaqtaǵy 30 jekemenshik balabaqshanyń 28-i Atyraý qalasynda, qalǵany Jylyoı men Maqat aýdandarynda ashylǵan. Qalǵan aýdandarda ázirge jeke balabaqsha joq. Osy jaıtty qaperge alǵan oblys ákimi Nurlan Noǵaev Maqat aýdanynda ótken kóshpeli keńeste halyqty balabaqsha bıznesimen aınalysýǵa shaqyrdy. «Memleket balabaqshalar men mektepterdi kóptep salyp jatyr. Biraq kezek máselesin tezirek sheshý úshin bul iske jeke kásipkerlerdi tartý jumysyn kúsheıtý kerek. Bıznes bastaımyn degen azamattarǵa memleket qoldaý kórsetip otyr», – dedi aımaq basshysy. Baqytgúl BABASh, «Egemen Qazaqstan» ATYRAÝ