Qarǵyn sýǵa qarsy qamsyz bolmaıyq

Byltyr kóktemde saı-sa­lany qýalaı aqqan qyzyl sý birqatar aýyldar men oblys or­ta­lyǵyndaǵy shaǵyn aý­dan­­dardy shaıyp ketip, tur­ǵyn­dardy álekke sal­ǵany bar. Bı­yl mundaı qaýipti barynsha azaıtýdyń, boldyrmaýdyń joldary aldyn ala qarastyrylyp, saqtyq sharalary kúsheıtilip otyr. Sınoptıkterdiń boljamyna qaraǵanda, qardyń shamadan tys jaýýy saldarynan kóktemgi sý tasqyny taǵy da yryq bermeı ketýi múmkin. Búginde birneshe jedel toptyń quramyna engen tártip saqshylary men turǵyn úı kom­mýnaldyq-sharýashylyq me­kemesiniń qyzmetkerleri joldar men kóshelerdiń jaǵ­daıyna monıtorıng júr­gizýmen shektelmeı baqylaý reıdterin de uıymdastyryp otyrady. Kezekti tekserýler barysynda aýlalardy, mekeme jandaryn úıindi qardan tazalamaǵan basshylardy «qara tizimge» engizip, yqpal etý sharalary qoldanyldy. Eskertýlerge qulaq aspaǵan «tentekter» men «aqpa qulaqtar» qaltalarynan qaǵylýǵa týra keldi. Alty kásip­orynǵa 136 myń teńge aıyppul salynyp, táýbelerine keltirdi. – Qatarymyzǵa páter ıele­ri kooperatıv múshelerin de tartyp otyrmyz. Birlese ju­mys isteýdiń arqasynda 300-ge jýyq mekeme-uıymǵa habarlama taratyldy. 235 hattama toltyryldy. Al qar tazalaý jumystary sapasyz atqarylsa, eshkim de ákimshilik jaýapkershilikten qutylmaıdy. Qatań talapty bosańsytýǵa bolmaıdy. Turǵyndar kóktemde qarǵyn sýdyń zardabyn tartpas úshin barlyq kúsh-jigerdi jumyldyrýdamyz,– deıdi qalalyq jergilikti polısııa bólimi bastyǵynyń orynbasary Shámshıden Aqyshev. О́mir ESQALI, «Egemen Qazaqstan» PETROPAVL