Tarazda alashtanýǵa arnalǵan ǵylymı eńbekter tanystyryldy

Bıyl Alash qozǵalysyna 100 jyl tolady. Ataýly data qarsańynda Taraz memlekettik pedagogıkalyq ınstıtýtynda "Alash jáne ult qaıratkerleri" jáne "Alash jáne ult ádebıeti" kitaptarynyń tanystyrylymy ótti, dep habarlaıdy oqý ornynyń Aqparattyq-ımıdjdik qyzmetiniń basshysy Jandar Asan. Monografııalyq eńbekterde Alash zııalylarynyń shyǵarmashylyq muralaryn zerdeleý jáne ony búgingi kúnmen baılanystyra otyryp jandandyrý máseleleri qarastyrylǵan. Atap aıtqanda, "Alash jáne ult ádebıeti" oqý-ádistemelik quralynda XX ǵasyrdyń basyndaǵy qazaq ádebıetiniń tarıhy men damý úrdisindegi ózindik erekshelikteri, sol kezeńdegi túrli ádebı baǵyttaǵy aqyn-jazýshylardyń ómiri men shyǵarmashylyǵy, ulttyq ádebıetimizdiń san ǵasyrlyq tarıhynyń eń jarqyn betteri jan-jaqty saralanǵan. Sonymen qatar, pán boıynsha arnaıy bilimdi baqylaýǵa arnalǵan testtik tapsyrmalardyń úlgileri usynylǵan. Oqý-ádistemelik quraly joǵary oqý oryndarynda "Qazaq tili men ádebıeti" mamandyǵy boıynsha júrgiziletin "XX ǵasyr basyndaǵy qazaq ádebıeti" páni men orta mektepterdiń joǵarǵy synyptarynda júrgiziletin "Alashtaný" kýrsyn oqytýda qoldanýǵa negizdelgen. Kitap avtorlary – TarMPI-dyń Qazaq fılologııasy kafedrasynyń meńgerýshisi, pedagogıka ǵylymdarynyń doktory, professor Tursynaı Ábdiqadyrova jáne ǵylym magıstri Edilbek Ábdimomynov. Al "Alash jáne ult qaıratkerleri" monografııasynda Alash qaıratkerleriniń ulttyq til mádenıetine, ulttyq oılaý júıesine, etnopedagogıka salasyn qalyptastyrýǵa, ádebıet pen mádenıet salalaryna qosqan úlesteri qamtylǵan. "Ǵylymı eńbekte eń basty qundylyǵymyz – Qazaqstannyń táýelsizdigi, qoǵamymyzdaǵy ulttarymyzdyń birligi jáne joǵary rýhanııat, ulttyq tarıh pen mádenıet, ulttyq tildiń qudyrettiligi jolynda kúresken ult zııalylarynyń eńbekteri zerdelengen. Sondaı-aq, monografııada bolashaq urpaqty ımandylyqqa, adamgershilikke, otansúıgishtikke tárbıeleýde Alashtyń arda azamattarynyń eńbekteri men paıymdy pikirleriniń túıinderi saralanyp, oqyrman qaýymǵa usynylǵan", – deıdi ǵylymı eńbek avtory Tursynaı Ábdiqadyrova.