Alataý aýdanyna quıylǵan ınvestısııa 8 jylda 32 ese ósken

8 jyl ishinde Almaty qalasynyń Alataý aýdanyna ınvestısııalar 32 ese ósti, dep habarlady qala ákimdigi. Almaty qalasynyń Alataý aýdanynda Ýnıversıadanyń basty nysandary – «Almaty Arena» jáne Atletıkalyq aýyl salyndy. «Almaty Arenaǵa» tikeleı jaqyn mańaıda 15,6 myń páterge arnalǵan shaǵyn aýdan, sonyń ishinde «Eski úıler» baǵdarlamasy boıynsha 9 qabatty eki turǵyn úı boı kótergen. 3 jyl ishinde taǵy 16 myń páterge arnalǵan 279 úı salynbaq. Ýnıversıada jáne áleýmettik ınfraqurylym nysandarynyń aýqymdy qurylysy úshin Alataý aýdany ınjenerlik jelileriniń qýattylyqtary ulǵaıtylǵan. Ýnıversıadaǵa daıyndyq kezeńinde aýdanda 160 shm elektr jelisi, 200 shm magıstraldy gaz jelileri, sondaı-aq 34 shm sý qubyry ótkizilgen. Budan bólek, ákimdiktiń aqparaty boıynsha, aýdanda 30 shm jańa jol salynǵan, qoldanystaǵy 70 shm jolǵa asfalt tóselgen. Jańa ákimshilik ortalyqtyń tolyq ınfraqurylymy qalyptastyryldy: ákimdik, sot jáne prokýratýra, salyq, órt deposy, HQKO, Arnaıy HQKO, muraǵat, AIIB. Áleýmettik nysandar salynǵan: 4 jańa emhana, 9 mektep, 12 memlekettik balabaqsha. Aýdandy abattandyrý jáne kógaldandyrý boıynsha aýqymdy jumystar júrgizilgen. «Almaty Arena» saıabaqtary búginde zamanaýı sýarý júıelerimen jaraqtandyrylǵan. «Osy sharalardyń nátıjesinde Alataý aýdanynyń ınvestısııalyq tartymdylyǵy artty. 8 jyl ishinde aýdanǵa ınvestısııalar – 32 ese, ónerkásiptik ónim óndirisi  12,3 ese ósti. Meıramhanalar sany – 1,7 ese, qonaq úıler 1,5 ese ósti», - delingen habarlamada. Osy rette, salyq túsimderi 3 ese 3,7 mlrd teńgeden 22,5 mlrd teńgege deıin ósken.