Batystyń keıbir kınosynshylary Monǵolııadaǵy búrkitshi qazaq qyzy Aısholpan týraly fılmniń shynymen de derekti ekenine kúmán keltirýde. Bul týraly búgin BBC News jazdy. Atalǵan týyndy dúısenbi kúni Bafta baıqaýyna usynyldy.
Ákesinen qusbegilikti úırengen 13 jasar Aısholpan Nurǵaıyp Monǵolııanyń ońtústik batysyndaǵy Baıan О́lgeı aımaǵynda turady. Aısholpan týraly rejısser Otto Belldiń derekti fılmine batys kınotanýshylary "derekten góri áreketi kóp fılm", "ertegiden turatyn derekti fılm" degen baǵalar berse, keı sarapshylar "kóshpendi qazaqtardyń tabıǵatyn asha almaǵan, shıki túsirilgen" deıdi.
Amerıkalyq tarıhshy Adrıen Mamor "er adamnyń ústemdik qurǵan sońǵy 2000 jylda alǵash ret qyz bala erliginiń osyndaı bıikke kóterilip dáriptelýin" joǵary baǵalaıdy. Degenmen, Mamor Aısholpannyń qusbegilikpen aınalysýyn onyń áýletimen baılanystyryp, "12 urpaq boıy qyz bala súımegen áýlette Aısholpannyń er minezdi bolyp ósýi tań qalarlyq dúnıe emes" deıdi.
Jalpy, Otto Belldiń fılm túsirýine túrtki bolǵan Izraıl fotografy Asher Svıdenskııdiń BBC-ge arnap túsirgen sýreti eken. Sýretti kórgennen keıin rejısser 2014 jyly Aısholpan týraly fılm túsirýge bekinipti.
Fılm týraly sarapshylardyń syn aıtatyn taǵy bir tusy - fılmde Aısholpan radıodan qusbegilerdiń jarysy bolatynyn estip, oǵan qatysýǵa ata-anasynan ruqsat suraýy. Kınotanýshylar osy jerde Aısholpannyń minezi ashylmaı qalǵanyn aıtady.
Kıno synshylary Aısholpannyń quzdan tómen túsetin jeri men ákesiniń jippen demep turatyn tusyn jáne osy sekildi birneshe áserli jerlerdi "shynaıy emes, kadrdyń ádemi shyǵýy úshin ádeıi jasalǵan" dep synaıdy. Degenmen, rejısser bul synmen múlde kelispeıdi. "Aısholpannyń uıadan balapan alyp túsetin jerin men bir dýblmen aldym. Bul sport oıyndarynan tikeleı habar taratýmen parapar nárse", - deıdi rejısser. Sarapshylardyń taǵy bir kúmánmen qaraıtyn jeri Aısholpannyń ákesi Aǵalaıǵa qatysty. Aǵalaı Aısholpannyń qusbegilikpen aınalysýy úshin óz ákesiniń batasyn alatyn jeri shynaıy bolǵanymen, batys synshylary bul kadrdyń da fılm úshin ádeıi túsirilgenin aıtady. Alaıda, Otto Bell bul tusta da synshylardyń pikirin joqqa shyǵarady.
Degenmen, Belldiń ssenarsıin Aısholpannyń ózi maquldaǵan.
"Men 10 jasymnan bastap qusbegilikke qyzyǵa bastadym", - deıdi Aısholpan BBC-ge bergen suhbatynda.
Aısholpannyń aıtýynsha, kóptegen eresek er adamdar qyz balanyń qusbegilikke shyqqanyna tańyrqaı qaraǵan. Degenmen, jarysty uıymdastyrýshylar Aısholpanǵa kóp kómek bergen.
