Din isteri zańnamasyn jetildirý – ómir talaby

Keshe Parlament Májilisinde Din isteri jónindegi agent­tik tóraǵasy Qaırat Lama Sharıf «Din isteri jáne dinı birlestikter týraly» jańa zań jobasyn tanystyryp, tusaýkeserin jasady. Qazir qoǵamymyzda kókeıkes­ti máseleniń biri bolǵandyqtan, oǵan degen qyzyǵýshylyq á degennen orasan boldy. Qaırat Lama Sharıftiń baıandamasynda jańa zań jobasynyń negizgi tu­jy­rymdamalary men erekshelikteri, maqsaty men qaǵıdattary týraly aıtyldy. Sonyń ishinde eldegi qazirgi dinı ahýalǵa sholý jasalyp, zań jobasynyń qajet­ti­ligine nazar aýdaryldy. «Dál qazir memlekettiń dinı qoǵam­dastyqtarmen tyǵyz, ózara áre­kettesýi men syndarly únqa­ty­sýy arqyly bizdiń eldegi dinsizdik, sondaı-aq dinı kózqarastyń shekten shyǵýy sııaqty keleńsiz qubylystardyń taralýyna jol bermeýge yqpal etetin ýaqyt keldi. Din – bizdiń qoǵamymyzdyń ajy­ramas bóligi. Sondyqtan da memleket Qazaqstandaǵy dinder­diń damýy­na árqashanda nazar aýda­ra­tyn bolady. Qarastyry­lyp otyr­ǵan zań jobasy qoǵam­dyq jáne dinı múddelerdiń tepe-teńdigin saqtaýǵa baǵyttalǵan», dedi ol. Dinı senim-nanym bostandy­ǵy zań jobasynda úsh negizgi qa­ǵıdatqa súıenetini aıtyldy. Olar beıtaraptyq, tolerantty­lyq jáne teńdik, dedi sheshen. Zań jobasy boıynsha dinı birlestikter 18 jasqa tolǵan azamattar­dyń bastamasymen qurylady. Bu­dan 18-ge tolmaǵan jastyń dinı birlestikke múshe bolýǵa quqy joq degen uǵym týatyn sekildi. Zań jobasy dinı birlestikterdiń qaı konfessııaǵa jatatyndyǵyn kórsetpeı, jalpylama ataýmen tirkelýine de jol bermeıtini belgili boldy. Bul «Ata joly» degen sekildi jalpylama attardy ja­my­latyn sektalardyń tirkelýin shekteıtin durys tujyrym eken. Sonymen qatar, otbasyn buzýǵa, dúnıe-múlkinen aıyrýǵa shaqyra­tyn nemese májbúrleıtin birlestikter de tirkelmeıtin bolyp shyqty. Baıandamada aýrýhanalar, qart­­tar men múgedekter úıleri jáne túrmelerde ákimshilik adam­dar­dyń dinı senim bostandyǵyn saqtaý jónindegi tilegin qanaǵat­tan­dyryp, dinı qyzmetshilerdi shaqyrýǵa kómek kórsetedi delindi. Sonymen qatar, syrttan áke­linetin dinı ádebıetterge saraptama jasaly­na­tyndyǵy aı­tyldy. Mıssıonerlik qyzmetterdi aýyz­ǵa alǵanda Q.Lama Sharıf kóp­tegen elderdi mysalǵa keltirip, olarda sheteldik mıssıonerlerge tyıym salynǵanyn nemese qyzmetterine shekteý qoıyl­ǵa­nyn atap ótti. Solardyń qata­rynda Qytaı, Grekııa, Avstrııa, Malaızııa ataldy. Al bizde bú­gingi kúni 27 memleketten shamamen 300-den astam mıssıoner kelip, tirkeýden ótipti. Olar kóbi­nese Polsha, Koreıa, AQSh, Germanııa Reseı, Ýkraına, Italııa, Shveısarııa jáne Ispanııadan kelgender eken. Zań jobasynda sheteldikter mıssıonerlik áreketti Din isteri jónindegi agenttikte tirkeýden ót­kennen keıin ǵana júrgize ala­tyndyǵy jáne jyl saıyn qaıta tirkeýden ótetindigi mindettelipti. Sheshen sózin aıaqtaǵan boıda suraqtar jaýyp ketti. So­nyń ishinde depýtat Q.Ýálı Qa­zaq­stannyń batysynda paıda bol­ǵan aǵymdardy, sondaı-aq «Asyl Arna» telearnasyn, áı­el­der men jas qyzdardyń hıdjap kııýin synap, osylarǵa qandaı tosqaýyl bolatyndyǵyn surady. Árıne, kásipker dıplomat bol­ǵan tóte suraqtarǵa múmkin­diginshe jumsaq jaýap berýge tyrysty. Sonyń ishinde hıd­jap­tyń arab bádáýıleriniń ulttyq kıimderi ekendigin derekterge súıenip aıtyp berdi. Depýtat N.Sabılıanov dinı ǵıbadat­ha­na­larǵa áke-sheshesiniń atyn berýdi shekteý týraly arnaıy bap nege engizbeske degen usynys ja­sady. Sondaı-aq ol jobada ǵıbadat­ha­nalardyń óndirispen aı­na­lysýy­na ruqsat beriletinin jaqtyrmaı­tynyn bildirdi. Ǵıba­dat­­hanalar kommersııalyq qury­lym emes qoı, sondyqtan olar­dyń óndiris­pen aınalysýyna jol berilmegeni durys, dedi depýtat. Depýtat B.Tileýhan dinı maq­satpen zań buzýshylyq jasaǵan­darǵa 50 AEK kóleminde aıyppul salýdyń az ekendigin, olarǵa qylmystyq is qozǵalýy qajetti­gin kórsetýdi surady. A.Smaıyl zań jobasynyń kirispesinde din degenniń ózi ne ekenine túsinik berilýi qajettigin eske saldy. Depýtat G.Seıitma­ǵan­betova jataq­hanada turyp, namaz oqıtyn stýdentterden qaýip­tenetinin jetkizdi. Maǵan bir ata-ana shaǵym jasap, Eýrazııa ýnıversıtetinde oqıtyn qyzy­nyń janynda turatyn qyz­dar­dyń din jolynda ekendiginen sho­shynyp, ony basqa bólmege aýysýǵa kómek berýin surady, dedi ol. Osy suraq týraly pikirin aıt­qan Sádýaqas Ǵylmanı meshitiniń ımamy Baqtybaı Qydyrbaıuly adamdardyń namaz oqıtyn jastardan qaýiptenetinine qynjy­ly­syn bildirdi. Kerisinshe, ata-ana qyzynyń ondaı ımandy adam­darmen birge júrgenine qýa­nýy kerek. Árıne, keıbir qaýipti aǵym­dardyń bary ras, biraq jas qyz­dardyń sondaılardyń qata­ryn­da ekenine kózi jetpeı turyp baıbalam salý qatelik, dedi ol. Sóıtip, kóp pikirtalastar men túrli usynystar týdyratyn zań jobasy Parlamenttiń qaraýyna alyndy.