Úmitterdi úkileıtin ortalyq

Ár adamnyń, ár otbasynyń arman-muraty urpaq jalǵastyrý ekeni sózsiz. Alaıda, taǵdyrdyń jazýymen, ártúrli sebeptermen balaly bolý baqytyna qol jetkize almaıtyn jandar da kezdesip qalady. Adam balasynyń osyndaı ózekti máselesin sheshýde medısına ǵylymy kómekke keldi. Bul – analardy jasandy uryqtandyrý jolymen ómirge sábı ákelý múmkindigin syılaý. Álem elderinde bedeýlik 8-29 paıyz sheginde bolyp keledi. Qazaqstanda otbasy juptarynyń 16 paıyzynda bedeýlik kezdesedi. 2016 jyly bedeýlik dertinen emdelýge 1348 otbasylyq jup dárigerlik kómekke júgingen, sonyń ishinde 674 juptyń emde­lýiniń jalǵyz joly qosalqy reprodýktıvtik tehnologııalardy, sonyń ishinde EQU jáne IKSI bolǵandyqtan oblystyq perınataldyq ortalyǵynyń keńes berý-dıagnostıkalyq bóliminiń bedeýlik kabınetine baǵyttaldy. Osy juptardyń bedeýliginiń eń qysqa merzimi – 7 jyl. Jyl saıyn Qazaqstanda EQU baǵdarlamasyna 700-800 kvota, al Aqtóbe oblysyna 40 kvota bólinedi. Sonymen qatar, EQU qajet 674 juptyń 300-i kvota alý úshin qajetti ólshemderge saı bolǵan. Osyǵan oraı oblystyq perı­na­taldyq ortalyǵynyń keńes berý-dıagnostıkalyq bóli­min­de ekstrokorporaldyq orta­lyǵy ashyldy. Ortalyqta bedeý­likti qosalqy reprodýktıvti tehno­logııalarmen emdeý ádisi qoldanylady. Oblystyq perınataldyq ortalyqtyń basshysy Ashat Balyqovtyń aıtýynsha, búginde 2000-ǵa jýyq bedeýlik belgisi bar analar kezekte turǵan kóri­nedi. Buǵan deıin Almaty, Astana qalalarynda jasandy uryq­tandyrý jolymen balaly bolýǵa 40 kvota bólinse atalmysh ortalyqta 50 anaǵa osyndaı medı­sınalyq kómek kórsetilýde. Analardy jasandy uryqtandyrý ártúrli jaǵdaılarǵa baılanys­ty 250-280 myń teńge kóleminde túsedi. Al bul kórshiles Orynbor oblysynda 2-5 myń AQSh dollary bolady. Ortalyqty kúrdeli jón­deýge 60 mıllıon teńge qarjy jumsaldy. Mekemeni medı­sınalyq jaraqtarmen jabdyqtaý 420 mıllıon teńgege tústi. – Bizdiń ortalyq medısı­nalyq qondyrǵylarmen jaraq­tandyrylýy boıynsha TMD elderindegi biregeı mekeme. Shetel­dik qondyrǵy arqyly bala­lardyń ana jatyryndaǵy damýyn aıqyn anyqtaımyz. Osy qondyrǵy arqyly múgedek balalardyń ómirge kelýiniń aldyn alýǵa múmkindigimiz bar, bul TMD elderinde joq. Bizge osyndaı jaǵdaı jasaǵany úshin Elbasymyzǵa, óńir basshysyna alǵysymyz sheksiz, – deıdi ortalyqtyń medısınalyq-genetı­kalyq qyzmetiniń meńgerý­shisi Lıýbov Boıko. Satybaldy SÁÝIRBAI, «Egemen Qazaqstan» Aqtóbe oblysy