О́skemen aıaldamalaryndaǵy jyly pavılondardy qańǵybastar panalaýda

О́skemen qalasynyń birden úsh aıaldamasynda jýyrda ǵana paıda bolǵan jyly pavılondar qańǵybastardyń súıikti ornyna aınaldy. Jobanyń tapsyrys berýshileri mundaı jaǵdaılarǵa jol bermes úshin barlyǵyn jasaǵandyǵyn atap ótýde, dep habarlady YK-news.kz. Jáne qazir qańǵybastardy pavılondardan qalaı qýyp shyǵarlaryn bilmeı otyr. Eske salsaq, 2016 jyly О́skemende jylytylatyn úsh aıaldama ornatyldy («Sport saraıy» aıaldamasynda, Qaısenov kóshesine burylystaǵy «Avtobasqarý» aıaldamasynda jáne Kúlenov atyndaǵy kentte - Moldaǵulova kóshesinde). «Pavılonǵa kireberiste elektrondy qulyptar tur, olar 22.00-de avtomatty túrde iske qosylyp, esikter buǵattalady. Úı-kúıi joqtar aldyn ala kelip, esikter jabylyp qalmas úshin, onyń astyna ártúrli zattar qoıady. Osydan keıin toptasyp, aıaldamaǵa jınalady. Biraq biz buǵan baqylaý júrgize almaımyz ǵoı. Bul polıseılerdiń jumysy. Kezekshiliktegi jaıaý polıseıler aıaldamalarǵa ara-tura baryp, kezbelerdi ol jerlerden qýyp turýy kerek. Aıta keteıik, mundaı problema Astanada da bar», - deıdi О́skemen qalalyq Jolaýshylar tasymaly jáne avtomobıl joldary basqarmasy turǵyn úı-kommýnaldyq sharýashylyǵy bóliminiń bastyǵy Asqar Jaqsylyqov. О́z kezeginde tártip saqshylary qalyptasyp otyrǵan jaǵdaıdan habardar ekendikterin jáne jyly aıaldama ıdeıasynyń qurdymǵa ketpeýi úshin baryn salyp jatqandyqtaryn aıtýda.