IIM áleýmettik jelilerdegi qaýipti oıyn jaıly málimdeme jasady

QR IIM áleýmettik jelilerde taralǵan «sýısıd oıyny» úshin qabyldanǵan sharalar jaıly habarlady. Memlekettik til jáne aqparat departamentiniń dırektory Almas Saýdbaev qazirgi ýaqytta áleýmettik jelilerdegi ólimge aparatyn toptardy anyqtaý maqsatynda monıtorıng júrgizilip jatqanyn aıtty. «Sońǵy kezderde ǵalamtorda ózine-ózi qol jumsaýdy úgitteıtin «Kók kıt» («Sınıı kıt»), «Tynysh úı» («Tıhıı dom») atty toptar jyldam taralyp ketti. Jasóspirimderdi qyzyqtyrý úshin aldymen oıynǵa kirýdi usynady, bul oıynnyń sońy ólimmen aıaqtalady eken. Al onyń moderatorlary jańadan tirkelgen adam jaıly búkil málimetti bilip, psıhologııasyna keri áserin tıgizetin tustaryn qoldanady. Bul áreketter Qylmystyq kodekstiń 105-baby, 3-tarmaǵy boıynsha jazaǵa tartylady. QR IIM málimeti boıynsha 2016 jyly kámeletke tolmaǵandardy ólimge ıtermeleý áreketi boıynsha 9 qylmystyq is anyqtalǵan. Alaıda, olardyń arasynda áleýmettik jeliler arqyly sýısıdke aparatyn jaıttar tirkelmegen. «Áleýmettik jeliler ózge elderdiń tehnıkalyq alańynda ornalasqandyqtan, bizdiń qolymyzda tek zańǵa qaıshy keletin toptarǵa shekteý qoıý ǵana keledi. Sýısıd oqıǵalarynyń aldyn alý úshin árbir ata-ana balanyń vırtýaldy ómirin qadaǵalaýy tıis, sondaı-aq teris áreketter baıqalǵan jaǵdaıda polısııa qyzmetkerlerine habarlasyp, isti tolyǵymen baıandaýy kerek. Osy arqyly tıisti sharalar qabyladanady», – dedi Almas Saýdbaev. Buǵan deıin «Otbasyn qoldaý jáne otbasylyq qundylyqtar boıynsha qazaqstandyq ata-analar qaýymdastyǵy» jetkinshekterdi atalmysh oıyndarǵa tirkelýdiń aldyn alýǵa shaqyrǵan bolatyn. Aıta keteıik, «Sınıı kıt» toby arqyly jańadan paıda bolǵan oıyndarǵa tirkelýdi  shaqyrady. Onyń sharty boıynsha árbir qatysýshy 50 tapsyrmany oryndaýy tıis. Aldymen, qolyna ótkir zatpen kıttiń sýretin salýy kerek. Al eń sońynda ózin ózi óltirýi qajet. Bul is oryndalmaǵan jaǵdaıda uıymdastyrýshylar onyń jaqyndaryna zııanyn tıgizetinin aıtyp qorqytady.