Úkimet Prezıdent tapsyrmalaryn oryndaý boıynsha jalpyulttyq jospar ázirledi

QR Úkimetiniń otyrysy barysynda QR Prezıdentiniń «Qazaqstannyń úshinshi jańǵyrýy: jahandyq básekege qabilettilik» Qazaqstan halqyna arnaǵan Joldaýynda belgilengen damý basymdyqtaryn oryndaý boıynsha jalpyulttyq jospar usynyldy. Ulttyq ekonomıka mınıstri T.Súleımenov birinshi basymdyq – jedeldetilgen tehnologııalyq jańǵyrtylý aıasynda sıfrlyq ındýstrııany, ekonomıkanyń negizgi salalarynyń tehnologııalyq qaıta jaraqtalýyn damytýǵa baǵyttalǵan 19 shara qarastyrylǵanyn baıandady, onyń ishinde tórtinshi ónerkásiptik revolıýsııa, ınvestısııalar tartý, kólik ınfraqurylymyn damytý, sonymen qatar ǵylymı áleýetti damytý bar. Jobada «Sıfrlyq Qazaqstan» memlekettik baǵdarlamasy, Eldiń eksporttyq-ınvestısııalyq strategııasy, AО́K memlekettik baǵdarlamasynyń qabyldanýy tárizdi jańa baǵdarlamalyq qujattardyń ázirlenýi, sonymen qatar «Nurly Jol» memlekettik baǵdarlamasyna ózgerister engizý jáne ónimdi jumyspen qamtý men jappaı kásipkerlikti damytý qarastyrylǵan. Ekinshi basymdyq – bıznes ortany túbegeıli keńeıtý jáne jaqsartý aıasynda 18 shara qarastyrylǵan, olar eń jaqsy bıznes ortany qalyptastyrýǵa jáne memlekettiń ekonomıkaǵa qatysýyn tómendetýge baǵyttalǵan. Aımaqtyq deńgeıde jappaı kásipkerlikti damytý, bıznestiń barlyq túrleri úshin shyǵyndardy azaıtý boıynsha sharalar kesheni qabyldanatyn bolady. Bıznesti júrgizý jeńildigi boıynsha qalalar men aımaqtardyń reıtıngi engizilip, olarǵa arnaıy syıaqy taǵaıyndalady. Úshinshi basymdyq – makroekonomıkalyq turaqtylyq aıasynda 11 baǵyt qarastyrylǵan, olar ınflıasııany kezeń-kezeńimen 3-4% deıin tómendetýge, bank sektoryn saýyqtyrý,a otandyq qor naryǵyn jandandyrýǵa, bıýdjettik rásimderdi jeńildetýge baǵyttalǵan. Tórtinshi basymdyq aıasynda – adamı kapıtaldy damytý boıynsha 10 shara qarastyrylǵan. Bilim salasynda oqý baǵdarlamalary jańartylyp, úsh tilde bilim berýge kezeń-kezeńimen kóshý qamtamasyz etiledi, eńbek naryǵynyń talaptaryna sáıkes kásiptik standarttar jańartylady.  Densaýlyq saqtaý salasynda mindetti áleýmettik medısınalyq saqtandyrý júıesin aqparattandyrý jáne bul júıeni halyq arasynda túsindirý boıynsha jumystar atqarylady. Zeınetaqy tólemderin jáne balanyń týýyna beriletin bir rettik járdemaqy mólsherin kóterý maqsatynda áleýmettik qamsyzdandyrý máseleleri boıynsha zańnamalyq aktiler qabyldanady. Sonymen qatar kúnkóristiń eń tómengi deńgeıi kóleminiń qurylymy qaıta qaralady. Besinshi basymdyq – ınstıtýttyq ózgerister, qaýipsizdik jáne sybaılas jemqorlyqpen kúres aıasynda 9 shara qarastyrylǵan. Menshik quqyqtaryn qorǵaýdy kúsheıtý boıynsha barlyq zańnamaǵa revızııa júrgiziledi, EYDU usynystaryn engizý boıynsha Jol kartasy ázirlenedi. Ulttyq qaýipsizdikti qamtamasyz etý maqsatynda 2017-2020 jyldarǵa arnalǵan dinı ekstremızmge jáne terrorızmmen kúres boıynsha Memlekettik baǵdarlamalar men kıberqaýipsizdik tujyrymdamasy ázirlenedi. Sonymen qatar memlekettik satyp alýlar salasynda zańnamany jetildirý maqsatynda ortalyqtandyrylǵan qyzmet qaǵıdaty boıynsha memlekettik satyp alýlardyń biryńǵaı júıesin engizýdi qarastyratyn zań jobasy ázirlenedi. Aldaǵy onjyldyqta jańa ındýstrııalar men jańa ósim modelin qurý úshin Qazaqstanda Eldiń jańa tehnologııalyq qurylymǵa kóshýiniń biryńǵaı strategııasy daıyndalady. Osy maqsatta «Qazaqstan 2025 – Ulttyq tehnologııalyq bastama» Strategııalyq jospar ázirlenedi.