Munaı óndirýdiń jyldyq kólemi 81 mln tonnaǵa deıin ulǵaıady

Munaı óndirýdiń jyldyq kólemi 81 mln. tonnaǵa deıin ulǵaıtylady. Bul týraly búgin Úkimet otyrysynda QR Energetıka mınıstri Qanat Bozymbaev málimdedi. «Birinshi jartyjyldyqqa arnalǵan josparǵa Energetıka mınıstrliginiń 10 is-sharasy engizildi. Bul turǵyda munaı-gaz salasynyń damýy úshin qajetti sharalar qamtyldy. Birinshiden, munaı óndirýdiń naqty kólemi ındeksin 103,8 paıyzǵa jetkizý úshin munaı óndirýdiń jyldyq kólemi 81 mln. tonnaǵa deıin ulǵaıtylady. Bul rette Qashaǵannan - 5 mln. tonna, Teńiz ken ornynan - 27,5 mln. tonna, sondaı-aq Qarashyǵanaq ken ornynan 11,8 mln. tonna munaı óndirilmek. Jartyjyldyqta 40,7 mln. Tonna munaı óndirý josparlanyp otyr. Al munaıdyń eksporty 65 mln. tonnany quraıdy», - dedi Bozymbaev. Onyń sózine qaraǵanda, gaz óndirýdiń fızıkalyq ındeksi 103, 6 paıyzǵa jetý úshin gaz óndirýdiń jyldyq kólemi 48, 1 mlrd. tekshe metrge deıin ulǵaıtylatyn bolady. Osy oraıda Qashaǵannan - 3,1 mlrd. tekshe metr, Teńizden- 14,4 mlrd. tekshe metr, Qarashyǵanaqtan -18 mlrd. tekshe metr gaz qamtamasyz etiledi. Jalpy, birinshi jartyjyldyqta 24,5 mlrd. tekshe metr gaz óndirý josparǵa engizildi. Belgili bolǵandaı, eksport kólemi 13, 7 mlrd. tekshe metrge jetkizilmek.