Brazılııa ulttyq quramasy men «Barselonanyń» shabýlshysy Neımar «Aqtóbe» fýtbol klýbyn 50 jyldyq mereıtoıymen quttyqtady.
25 jastaǵy fýtbolshymen onyń otandasy ári «Aqtóbeniń» jańa oıynshysy Vıtor Jýnıor kezdesti.
Komandanyń áleýmettik jelilerdegi resmı paraqshalary qazaqstandyq komandanyń jeıdeshesine quttyqtaý sózderin jazyp, qoltańbasyn qoıyp bergenin habarlady. Bul jeıde jaqyn arada ashylatyn klýbtyń mýzeıinde saqtalady.
«Aqtóbe» fýtbol klýbynyń mýzeıinde álemdi óz ónerimen tánti etip júrgen talantty fýtbolshynyń jeıdeshesi saqtalatyn bolady. Neımar buǵan deıin Qazaqstan premer-lıgasy jaıly jaqsy bilmeıtinin aıtqanmen, aldaǵy ýaqytta bizdiń ujymǵa, sondaı-aq dosy Vıtor Jýnıorǵa jankúıerlik etetinin málimdedi», – dep jazdy klýbtyń ınstagramdaǵy paraqshasy.
Buǵan deıin Jýnıor Brazılııanyń ańyzyna aınalǵan, «Barselonanyń» burynǵy oıynshysy Ronaldınomen de kezdesip, «Aqtóbeniń» murajaıy úshin qoltańbasyn alǵan bolatyn.
