Belgili prodıýser Baıan Esentaeva KeshYOU tobynyń jańa quramyn tanystyrdy. Bul týraly tengrinews.kz habarlady.
Onyń aıtýynsha, toptyń burynǵy quramynan tek Baljan Bıdash qana qalǵan. Oǵan «Lashyn» tobynyń burynǵy músheleri Sara Amangeldi men Elızat Berikova qosyldy, sondaı-aq, qazaq estradasyna jańadan kelgen Nazym Ábildına da bar.
«Biz toptyń konsepsııasyn tolyǵymen ózgerttik. Meniń oıymsha 10 jyl ishinde KeshYOU tobynda vokaly men horeografııasy joǵary deńgeıdegi uzyn boıly úsh qyzdyń óner kórsetýi jurtty jalyqtyryp jibergen sııaqty. Endi trıo emes kvartet qurý týraly sheshim qabyldadyq. Osyǵan saı baǵytymyzdy da ózgertýimiz múmkin. Al burynǵy KeshYOU tobynyń mýzykalyq repertýary jaǵynan eshnárse qalmaıdy. Degenmen, burynǵy hıt ánderdi qaıtadan oryndaıtyn bolamyz, al jańa shyǵarmashylyǵymyz múldem basqa baǵytta bolady», – dedi Esentaeva.
Ol sondaı-aq, aldaǵy ýaqytta toptyń daıyndap jatqan eki ániniń birine klıp túsiriletinin atap ótti.
«Qatarymyzǵa kastıng arqyly Nazym Ábildına qosyldy. Negizi odan da jaqsy ánshiler qatysqan. Alaıda, Nazymnyń jan-dúnıesi múldem bólek. Jymıyp kúlgeniniń ózi-aq kez kelgen jandy eriksiz baýrap alady. Tańdaý kezinde onyń osy bir qasıetine erekshe toqtaldym. Onyń ústine bala kúninen sahnada án aıtyp kelgen eken», – dedi prodıýser.
Al toptyń burynǵy ánshisi Juldyz О́mirǵalı prodıýseriniń úmitin aqtamaǵan kórinedi. «Qyzdarymnyń ózim kútken nátıjeden asyp túskenin qalaımyn. Biraq birge júrgen eki jyl ishinde Juldyz ony oryndaı almady. Degenmen, prodıýserlik ortalyqta jumysyn jalǵastyra beredi. Adamı turǵydan alyp qaraıtyn bolsaq, óte sypaıy jan», – dedi Baıan Esentaeva.
