Soltústik Qazaqstanda 100-ge jýyq eldi mekendi sý basýy múmkin

Soltústik Qazaqstan oblysynyń ákimdiginde evakýasııalyq komıssııanyń otyrysy ótti, dep habarlaıdy SQO TJD baspasóz qyzmeti. Jınalysqa qatysýshylar óńirlik evakýasııalyq komıssııanyń tótenshe jaǵdaı kezindegi halyqtyń qaýipsizdigin qamtamasyz etýdegi daıyndyǵyn talqylady. Boljam boıynsha, Soltústik Qazaqstan oblysyndaǵy sý tasqyny ortasha jyldyq kórsetkishten joǵary bolmaq. SQO TJD basshysynyń orynbasary Erik Sarybaevtyń aıtýynsha, oblys aýdandaryndaǵy evakýasııalyq jospar qosymsha túzetýdi qajet etedi. «О́tken jylǵy saraptamalardy qorytyndylaı otyryp, departament 94 eldi meken men sý tasqynynyń qaýpi bar Petropavl qalasyn esepke qoıdy. Olardyń kóbi Esil, Taıynsha jáne Aqqaıyń aýdandaryna tıesili», – dep atap ótti Erik Sarybaev. «Halyqpen jınalys ótkizip, sý tasqyny kezindegi is-áreketter erejesin úıretý qajet. Adamdardy evakýasııalaý boıynsha jattyǵýlar ótkizý kerek. Bizdiń mindetimiz – sý tasqynynyń zardabyn azaıtyp, eldi mekenderdi qorǵaý, adam shyǵynyn boldyrmaý, turǵyndardyń qalypty ómir súrýine jaǵdaı jasaý», – dep túıindedi oblys ákiminiń orynbasary Anarhan Dúısenova.