Sýretshi Muhambetqalı Dúısembaetyń kórmesi ótti

Jarylyp ketken jer, qańyrap qalǵan bos besik, synǵan shańyraq – ıesiz qalǵan jer men shańyraǵy ortasyna túsken el... О́lip jatqan balyqtar, besikti shyrmap alǵan sur jylandar – shetinegen balalar men eldi meńdegen dert... Bul – Aral teńiziniń taǵdyry aıryqsha alańdaýshylyq týǵyzyp turǵan kezeńdegi ekologııalyq máseleni, sol aımaqty meken etken turǵyndardyń qasiretin dóp basyp kórsete bilgen sýretshiniń «Aral taǵdyry» atty aıryqsha týyndysy. «T.Júrgenov atyndaǵy О́ner akademııasynda oqyp júr­gende elge barǵanymda úsh jasar nemere qaryndasym shetinep ketti. Biz jaqta sý kóbinese ashy bolatyn. Oınap júrgen bala sondaı ashy sýdy iship qoıǵan eken... Sol shetinep ketken qaryndasyma arnap «Aral taǵdyry» degen gobelendi toqydym. Keıinnen «Jer-Ana shaqyrady», «Aral» serııasy degen kartınalarymdy saldym. Jas kezimde osyndaı sıýrealıstik baǵytta kóp jumys istedim», dep túsindiredi sýretshi Muhambetqalı Sam­ratuly óziniń osy eńbeginiń mánisin. Ár alýan janrly, kóp qyrly sýretshi, túrli stıl men tehnıkalarda: qoldanbaly-óner, gobelen, grafıka, keskindeme jáne akvarel túrlerimen jumys isteıtin qylqalam ıesi, Qazaqstan Sýretshiler odaǵynyń múshesi Muhambetqalı Dúısembaev Memlekettik Ortalyq mýzeıinde «О́ner – tunyp turǵan qupııa» atty kór­mesin ótkizdi. O.Tańsyqbaev atyndaǵy Almaty sándik-qoldanbaly óner kolledjinde 22 jyldan beri oqytýshy bolyp jumys istep kele jatqan sýretshi M.Dúısembaev kórmesinde kórer-mender nazaryna óziniń jeke kolleksııasynan alynǵan 70-ten astam jumysyn usynypty. Sýretshiniń «Turar Rys­qulov», «Ah­met Baıtursynov», «Din­mu­hamed Qonaev» atty qazaq zııalylarynyń portrettik gobelender serııasynan bastap, ómirdiń bir sáttik kórinisterin qaǵazǵa qapysyz, názik sezimmen, shynaıy túsirý arqyly aýyl ómirine degen saǵynysh sezimine toly «Balalyqty eske alý», «Kórshi» atty akvareldik týyn­dylary, sonymen qatar, ekologııa taqyrybyndaǵy «Ýaqyt tragedııasy», «Ekologııa», «Aral» gobelenderi syndy Aral tragedııasyna arnaǵan shyǵarmalary, «Meniń Qazaqstanym» atty kartınasy eshkimdi beıjaı qaldyrmasy anyq. Mıra BAIBEK, «Egemen Qazaqstan» ALMATY