Munaı arzandady. AQSh óndirisi OPEK+ kelisimin zaıa ketirýde

Búgin Astana ýaqytymen tańǵy saǵat 09:00-de Brent markaly munaı quny 1,89 paıyz arzandap, 54,56 dollarǵa bir-aq quldyrady. Qara altynnyń arzandaýyna sebep bolǵan AQSh óndirisiniń kúrt artýy men naryqta munaıǵa degen suranystyń azaıýy, dep jazady investing basylymy. Sońǵy eki aı boıy OPEK+ kelisiminiń arqasynda munaı baǵasy barreline 56-57 dollar aralyǵynda saqtalǵan edi. О́tken jyldyń jeltoqsanynda munaı eksporttaýshy elder uıymy men uıymǵa kirmeıtin memleketter jyldyń ortasyna deıin óndiristi táýligine 1,8 mln barrelge azaıtamyz dep kelisken. Al qazirgi tańda osy jospardyń 1,1 mln barreli oryndaldy. Qazaqstan bolsa, ózine tıesili 20 myń barreldi artyǵymen oryndap, ótken jylǵy kórsetkishpen salystyrǵandla qazirgi tańda óndiristi táýligine 30 myń barrelge azaıtty. Osynyń nátıjesinde qymbattaı túsken munaı baǵasyna AQSh-taǵy WTI markaly munaı óndirisiniń kóbeıtilýi keri áser etti. Osy aptada AQSh-taǵy jumys istep turǵan burǵylaý qurylǵylarynyń sany 2015 jyldyń qazanynan bergi rekordtyq kórsetkishke jetip, 583-ke jetti. Nátıjesinde óndiris kólemi de arta tústi. Sonymen qatar álem boıynsha janarmaı suranysynyń tómendeýi de ınvestorlardyń alańdaýshylyǵyn týdyryp otyr. Qytaıdyń munaı ımporty da azdap tómendegeni aıtylady jergilikti aqparat quraldarynda. Importqa suranystyń tómendigi Qytaı ekonomıkasynyń damý qarqynynyń báseńdeýimen baılanysty.