Aýyl muǵaliminiń ahýaly alańdatady

«Egemen Qazaqstan» gazetiniń bıylǵy 19 qańtardaǵy №12 sanynda Aýyl muǵaliminiń ahýaly» atty maqalany kózimiz shaldy (avtory – Temir Qusaıyn). Bul maqala ustazdar qaýymyna úlken oı saldy. Shyndyǵynda, áleýmettik máselesi sheshilmegen muǵalim qalaı alańsyz eńbek etedi? Eńbekaqy kólemin arttyrý memleket qazynasyna qıynǵa tússe de, áleýmettik jaǵ­daıyna qaraılasýǵa bolar edi. Jasy­ratyny joq, Keńes Odaǵy kezinde ustazdar qaýymynyń mártebesi de, turmys-tirshiligi de joǵary boldy. Máselen, muǵalimderge aı saıyn 44 kvt/saǵ. elektr ener­gııa­sy, sondaı-aq, jylyna 5 tonna kómir beriletini esimizde. Osy rette elimizdiń otyn men energetıka ortalyǵy sanalatyn Pavlodar oblysy aýmaǵynda jergilikti bilim salasynyń qyz­metkerlerine joǵarydaǵy áleýmettik jeńildikter men kómek­terdi usynsa ájeptáýir serpilis týǵyzar edi. Taǵy bir ózekti másele, kezinde Pavlodar oblysynyń muǵa­limder bilimin jetildirý ınstıtýty janynan pedagog mamandardyń densaýlyǵyn túzeýge baǵyttalǵan «Aǵartý» atty profılaktorıı bolyp edi. Atalǵan ortalyqta muǵalimder kásipodaq arqyly tegin em-dom alatyn. Iаǵnı, bilimin jetildirý kýrsyna barǵan muǵalimder qaýymy densaýlyqtaryn da túzep qaıtatyn. Qazir bul mekeme jekeniń qolyna ótip basqa salada qyzmet kórsetedi. Al búginde ortalyqqa bilimin jetildirýge barǵan muǵalim eki apta, keıde bir aı ýaqyt boıy páter jaldap, jatyn oryn izdep júrýge májbúr bolyp otyr. Jýyrda Bilim jáne ǵylym mınıstrligi jańa formatta oqytý baǵdarlamasyn qa­byldap, muǵalimderdi túrli kýrstarda oqytýǵa Úkimetten qyrýar qara­jat bólinip jat­qa­nyn jarııalady. Osy arada álgi qıyndyqtardy esepke alyp, tıimdi sheshýdiń joldaryn qarastyrý kerek dep oılaımyz. Sondaı-aq, ustazdardyń zeınetkerlik jasy da qaıta qa­raýdy qajet etedi. Mysaly, ju­mysy qaýipti áskerıler men ishki ister organdary qyz­­metkerlerin 45 jasynda zeınetke shyǵaratyny bel­gili. Sol sııaqty muǵa­lim­der qaýymynyń da ju­mysy je­ńil emes. Olar kún­delikti fı­­zıkalyq jáne psıho­lo­gııalyq turǵydan erte qajı­tyn mamandyq ıeleri. Iаǵnı, muǵalim qyzmetin saralap, arnaıy zertteýler júr­gizip, qo­rytyndy jasaıtyn ýa­qyttyń kelgeni anyq. Abaı IKEShOV, Máshhúr-Júsip Kópeev atyndaǵy orta mekteptiń bıologııa jáne hımııa pánderiniń muǵalimi Pavlodar oblysy, Baıanaýyl aýdany, Jańajol aýyly